ມາເລເຊຍ ຜູ້ນຳໃນການລົງທຶນສູນຂໍ້ມູນໃນອາຊີຕາເວັນອອກສ່ຽງໃຕ້

 ໂດຍມີການລົງທຶນໃນຂະແໜງການດັ່ງກ່າວ ສູງເຖິງ 23.3 ຕື້ໂດລາ.
ບົດລາຍງານລະບຸວ່າ:ມາເລເຊຍ ມີການປະມວນຜົນຂໍ້ມູນປະຈໍາປີສູງເຖິງ 429 ເມກາວັດ ຊຶ່ງໄດ້ລື່ນກາຍເພື່ອນຮ່ວມພາກພື້ນໃນດ້ານການລົງທຶນສູນຂໍ້ມູນ. ໂດຍການຂະຫຍາຍຕົວຄັ້ງນີ້ເປັນຜົນມາຈາກການລົງທຶນຂອງບໍລິສັດເຕັກໂນໂລຊີຍັກໃຫຍ່ເຊັ່ນ:Microsoft, Amazon Web Services, Google ແລະ Oracle.
ປະຈຸບັນ, ມາເລເຊຍມີສູນຂໍ້ມູນທີ່ກຳລັງດຳເນີນງານ 54 ສູນ ພ້ອມກຳລັງການປະມວນຜົນ 504.8 ເມກາວັດ, ໂດຍເມືອງຍະໂຮ ເປັນຜູ້ນຳດ້ານປະສິດທິພາບເຕັກໂນໂລຊີຂໍ້ມູນຂ່າວສານ ແລະ ຍ່ານກລັງ ວັນເລ ຍັງຄົງເປັນຕະຫຼາດຫຼັກ.
ທັງນີ້, ມາເລເຊຍໄດ້ລົງທຶນດ້ານດີຈີຕອນໃນໄລຍະເດືອນມັງກອນຫາເດືອນຕຸລາປີ 2024ລວມທັງໝົດ 141 ຕື້ລິງກິດ ຊຶ່ງເພີ່ມຂຶ້ນ 3 ເທົ່າຈາກປີ 2023.
ທ່ານ ຄຣີ ອອຍ ກຳມະການຜູ້ຈັດການກຸ່ມບໍລິສັດ Knight Frank Malaysia ກ່າວວ່າ: ມາເລເຊຍ ມີຄວາມມຸ່ງໝັ້ນໃນການປະດິດສ້າງທາງດ້ານເຕັກໂນໂລຊີ ແລະ ຄວາມຍືນຍົງ ຊຶ່ງເຮັດໃຫ້ກາຍເປັນຈຸດໝາຍປາຍທາງທີ່ໜ້າສົນໃຈສໍາລັບການລົງທຶນດ້ານສູນຂໍ້ມູນ.
ທ່ານ ເອມີ ຫວ່ອງ ຜູ້ອໍານວຍການບໍລິຫານ ຝ່າຍການຄົ້ນຄວ້າແລະທີ່ປຶກສາ ຂອງ Knight Frank Malaysiaກ່າວຕື່ມວ່າ: ສະຖານະຜູ້ນຳບໍ່ພຽງແຕ່ເຮັດໃຫ້ມາເລເຊຍໄດ້ປຽບໃນການແຂ່ງຂັນ. ແຕ່ມັນຍັງເປັນສັນຍານສະແດງຄວາມພ້ອມຂອງມາເລເຊຍໃນການຊຸກຍູ້ເສດຖະກິດດີຈີຕອນໃຫ້ຂະຫຍາຍຕົວໃນໄລຍະຍາວ.