ແມ່ຍິງ​ແຂວງເຊກອງ ແລະ ກະຊວງ ຍທຂ ແລກປ່ຽນບົດຮຽນ

ໂອກາດນີ້, ທ່ານ ນາງ ມະໂນລາ ສຸດທິຈັກ ໄດ້ລາຍງານຜົນການຈັດຕັ້ງປະຕິບັດວຽກງານແມ່ຍິງແຂວງເຊກອງ ໃຫ້ຮູ້ວ່າ: ໂດຍປະຕິບັດຕາມແຜນພັດທະນາ 5 ປີ ຂອງສະຫະພັນແມ່ຍິງແຂວງ (2025-2029), ແຜນດໍາເນີນງານ ປະຈໍາປີ 2026 ຂອງຄະນະປະທານສະຫະພັນແມ່ຍິງແຂວງ ໄດ້ນໍາພາ-ຊີ້ນໍາຈັດຕັ້ງປະຕິບັດວຽກງານສະຫະພັນແມ່ຍິງຕາມ ພາລະບົດບາດ ມີຜົນສໍາເລັດຕາມເປົ້າໝາຍ ໃນ 7 ໜ້າວຽກທີ່ພົ້ນດັ່ນຄື: ວຽກງານສຶກສາອົບຮົມການເມືອງ-ແນວຄິດ ແມ່ນໄດ້ຈັດຕັ້ງເຜີຍແຜ່, ເຊື່ອມຊຶມບັນດາເອກະສານສຳຄັນຂອງຊາດ, ຂອງພັກ, ຄຳສັ່ງແນະນຳ ແລະ ນິຕິກຳຕ່າງໆ, ພ້ອມທັງໂຄສະນາເຜີຍແຜ່ຜ່ານສື່ທ້ອງຖິ່ນ ແລະສູນກາງເປັນປະຈຳ; ວຽກງານກົງຈັກການຈັດຕັ້ງ ໄດ້ເຄື່ອນໄຫວຊຸກຍູ້ບັນດາຮາກຖານ, ໜ່ວຍ ໃຫ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານຮອບດ້ານ ຕິດພັນກັບວຽກງານ 3 ດີ ປະຈໍາປີ 2025 ສໍາເລັດ 82%; ລົງຕິດຕາມ ແລະ ກວດກາ, ຊຸກຍູ້ການຈັດຕັ້ງປະຕິບັດວຽກງານຮອບດ້ານ ຂອງສະຫະພັນແມ່ຍິງເມືອງ, ໄດ້ປະຕິບັດນະໂຍບາຍຕໍ່ຄອບຄົວສະມາຊິກກອງທຶນ ທີ່ເສຍຊິວິດ ເປັນເງິນ 31,095,000 ກີບ; ວຽກງານໃຫ້ຄໍາປຶກສາປົກປ້ອງສິດຜົນປະໂຫຍດຂອງແມ່ຍິງ-ເດັກ ແມ່ນໄດ້ເປັນເຈົ້າການຊຸກຍູ້ ແລະ ຈັດຕັ້ງປະຕິບັດຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ; ວຽກງານປົກປັກຮັກສາ ແລະ ພັດທະນາປະເທດຊາດ ກໍໄດ້ຜັນຂະຫຍາຍແຜນພັດທະນາແມ່ຍິງລາວ 5 ປີ ໃນ 19 ເປົ້າໝາຍ, 31 ແຜນວຽກ, 144 ວຽກງານຈຸດສຸມ ແລ້ວຫັນມາເປັນແຜນພັດທະນາແມ່ຍິງແຂວງ 5 ປີ ໃນ 8 ເປົ້າໝາຍ, 25 ແຜນວຽກ, 68 ວຽກງານຈຸດສຸມແລະວຽກງານອື່ນໆອີກ.

ຈາກນັ້ນ, ທັງສອງຝ່າຍໄດ້ແລກປ່ຽນບົດຮຽນນໍາກັນ ໂດຍສະເພາະ ໃນການປະຕິບັດວຽກງານ 3 ດີ, ວຽກງານການຮ່ວມມື ແລະ ການພົວພັນວຽກງານ ລະຫວ່າງ ສູນກາງ ແລະ ທ້ອງຖິ່ນເພື່ອຮັບປະກັນໃຫ້ວຽກງານແມ່ຍິງ ໄດ້ປະຕິບັດຕາມພາລະບົດບາດ ຢ່າງເຂັ້ມແຂງ.

ຂ່າວ: ອັດສະວິນ