ຫຼັງຈາກທີ່ "CrowdStrike" ບໍລິສັດໃຫ້ບໍລິການດ້ານຄວາມປອດໄພຊັອຟແວ ເຮັດການອັບເດດລະບົບ ຈົນສົ່ງຜົນໃຫ້ຜູ້ໃຊ້ບໍລິການລະບົບແພລັດຟອມ Windows ທົ່ວໂລກ ເກີດອາການໜ້າຈໍສີຟ້າ ຫຼື BSOD ບໍ່ສາມາດໃຊ້ງານໄດ້ເປັນໄລຍະເວລາດົນ ສົ່ງຜົນກະທົບຕໍ່ຫຼາຍບໍລິສັດທົ່ວໂລກ.
ລ້າສຸດ ບໍລິສັດ Microsoft ເຈົ້າຂອງແພລັດຟອມ Windows ເປີດເຜີຍວ່າ: ອຸປະກອນທີ່ໃຊ້ລະບົບປະຕິບັດການ Windows ປະມານ 8.500.000 ໜ່ວຍທົ່ວໂລກ ຕ້ອງຢຸດເຮັດວຽກຫຼັງຈາກໄດ້ຮັບຜົນກະທົບຈາກບັນຫາລະບົບໄອທີຂັດຂ້ອງ ຊຶ່ງຖືເປັນການລາຍງານຈຳນວນໂຕເລກຂອງຄອມພິວເຕີທີ່ບໍ່ສາມາດໃຊ້ວຽກລະບົບປະຕິບັດການ Windows ຢ່າງເປັນທາງການຄັ້ງທຳອິດ ແລະ ອາດເປັນເຫດໃຫ້ລະບົບໄອທີຫຼົ້ມຄັ້ງຮຸ່ນແຮງທີ່ສຸດໃນປະຫວັດສາດ.
ໂພສຂອງທ່ານ ເດວິດ ເວສຕັນ ຮອງປະທານບໍລິສັດ Microsoft ລະບຸວ່າ: ເຖິງແມ່ນວ່າໂຕເລກຂອງອຸປະກອນທີ່ໄດ້ຮັບຜົນກະທົບຈາກລະບົບໄອທີຂັດຂ້ອງທົ່ວໂລກຈະຢູ່ທີ່ບໍ່ເຖິງ 1% ຂອງຄອມພິວເຕີທີ່ໃຊ້ລະບົບປະຕິບັດການ Windows ທົ່ວໂລກ ແຕ່ຜົນກະທົບທາງເສດຖະກິດ ແລະ ສັງຄົມໃນວົງກວ້າງ ສະທ້ອນໃຫ້ເຫັນວ່າອົງການຕ່າງໆໃຊ້ວຽກຊັອຟແວຂອງ "CrowsStrike" ໃນບໍລິການທີ່ສຳຄັນຈຳນວນຫຼາຍ.
ໂຕເລກທີ່ໄດ້ຈາກ Microsoft ບົ່ງບອກວ່າ: ນີ້ອາດເປັນເຫດການທາງໄຊເບີທີ່ມີຂອບເຂດຄວາມເສຍຫາຍໃຫຍ່ທີ່ສຸດເທົ່າທີ່ເຄີຍມີມາ ເໜືອເຫດການລັກຂໍ້ມູນທີ່ເປັນຄວາມລັບຂອງບຸກຄົນ, ອົງການ ແລະ ເຫດການລະບົບໄອທີຫຼົ້ມກ່ອນໜ້ານີ້ທັງໝົດ.
ເຫດການທີ່ໃກ້ຄຽງທີ່ສຸດຄື: ການໂຈມຕີທາງໄຊເບີດ້ວຍມັລແວ ເອີ້ນຄ່າໄຖ່ຂອງກຸ່ມແຮັກເກີ (WannaCry) ໃນປີ 2017 ຊຶ່ງຄາດວ່າສົ່ງຜົນກະທົບຕໍ່ຄອມພິວເຕີປະມານ 3 ແສນໜ່ວຍໃນ 150 ປະເທດ ຕາມມາດ້ວຍການໂຈມຕີທາງໄຊເບີ ແລະ ກໍ່ກວນລັກສະນະຄ້າຍຄືກັນນີ້ທີ່ເອີ້ນວ່າ (NotPetya) ໃນອີກ 1 ເດືອນຕໍ່ມາ.
ຄໍາເຫັນ