 |
ໃຫ້ກຽດກ່າວມອບໂຄງລ່າງພື້ນຖານສິ່ງອໍານວຍຄວາມສະດວກດ້ານການທ່ອງທ່ຽວ ໂດຍ ທ່ານ ນາງ ດາລານີ ພົມມະວົງສາ ຮອງລັດຖະມົນຕີ ກະຊວງວັດທະນະທໍາ ແລະ ການທ່ອງທ່ຽວ ແລະ ກ່າວຮັບໂດຍ ທ່ານ ພູວົງ ບຸນຊູ ປະທານຄະນະກໍາມະການອົງການປົກຄອງແຂວງວຽງຈັນ ໂດຍມີຜູ້ຕາງໜ້າຈາກກະຊວງການເງິນ, ມີ ທ່ານ ນາງ ແຊນນີ ແຄັມເບລ (Shanny Campbell), ຫົວໜ້າຫ້ອງການທະນາຄານພັດທະນາອາຊີ ປະຈຳ ສປປ ລາວ, ບັນດາກົມຫົວໜ້າກົມ, ຮອງຫົວໜ້າກົມ ທີ່ກ່ຽວຂ້ອງຈາກກະຊວງ ວັດທະນະທໍາ ແລະ ການທ່ອງທ່ຽວ, ພາກລັດ ແລະ ພາກທຸລະກິດ ທີ່ກ່ຽວຂ້ອງຈາກອົງການປົກຄອງແຂວງວຽງຈັນ ແລະ ເມືອງແກ້ວອຸດົມເຂົ້າຮ່ວມ.
ໂຄງລ່າງພື້ນຖານ ແລະ ສິ່ງອຳນວຍຄວາມສະດວກ ດ້ານການທ່ອງທ່ຽວເຂດອ່າງນໍ້າງື່ມ 1 ທີ່ໄດ້ມອບໃຫ້ອົງການປົກຄອງແຂວງວຽງຈັນ ສືບຕໍ່ບໍາລຸງຮັກສາ ແລະ ບໍລິຫານຄຸ້ມຄອງ ປະກອບມີ: ເສັ້ນທາງຄອນກຣີດເຂົ້າເຖິງສະຖານທີ່ທ່ອງທ່ຽວ ຄວາມຍາວ 6.3 km, ບ່ອນຈອດລົດ 2 ແຫ່ງ, ພ້ອມທັງບ່ອນເກັບມ້ຽນຂີ້ເຫຍື້ອຊົ່ວຄາວ, ທ່າທຽບຮ້ານອາຫານເຮືອນແພ, ທ່າຈອດເຮືອນຳທ່ຽວຖາວອນ, ຮ້ານຄ້າ ຈຳນວນ 32 ຫຼັງ, ອາຄານອາເນກປະສົງ (Public Plaza), ສາລາຊົມວິວ (Circular Pavilion), ຫ້ອງນໍ້າສາທາລະນະ 2 ແຫ່ງ. ທາງຍ່າງ, ຮ່ອງລະບາຍນໍ້າ ແລະ ປັບປຸງທັດສະນີຍະພາບ ເຊັ່ນ: ປູກຕົ້ນໄມ້, ເດີ່ນຫຍ້າ, ລະບົບໄຟຟ້າ ແລະ ນໍ້າປະປາລະບົບບໍາບັດນໍ້າເປື້ອນ. ໂຄງການດັ່ງກ່າວໄດ້ເລີ່ມກໍ່ສ້າງ ແຕ່ປີ 2021-2024 ແລະ ໄດ້ເປີດນໍາໃຊ້ຢ່າງເປັນທາງການເລີ່ມແຕ່ເດືອນ ທັນວາ 2024 ເປັນຕົ້ນມາ.
ໃນໂອກາດດຽວກັນ, ຍັງໄດ້ຈັດພິທີເຊັນສັນຍາ ບໍລິການ, ການບໍລິຫານຄຸ້ມຄອງສະຖານທີ່ທ່ອງທ່ຽວ ເຂດອ່າງນໍ້າງື່ມ 1 ເມືອງແກ້ວອຸດົມແຂວງວຽງຈັນ, ລະຫວ່າງ ທ່ານ ສີສະຫວາດ ແສງພະຈັນ ຫົວໜ້າພະແນກ ວັດທະນະທໍາ ແລະ ການທ່ອງທ່ຽວ ແຂວງວຽງຈັນ ແລະ ທ່ານ ອິນທີ ເດືອນສະຫວັນ ຜູ້ອໍານວຍການ ບໍລິສັດ ຄຣິນແອັດເວັນເຈີ ຈຳກັດຜູ້ດຽວ. ການເຊັນສັນຍາຄັ້ງນີ້ເປັນການຮ່ວມມື ລະຫວ່າງ ພາກລັດ-ພາກທຸລະກິດ ໃນການບໍລິການ ແລະ ບໍລິຫານຄຸ້ມຄອງສະຖານທີ່ທ່ອງທ່ຽວແຫ່ງນີ້ ແມ່ນປະຕິບັດຕາມນະໂຍບາຍຂອງລັດຖະບານ, ເວົ້າລວມເວົ້າສະເພາະ ແມ່ນການສ້າງເສດຖະກິດເອກະລາດເປັນເຈົ້າຕົນເອງ, ເພື່ອຍົກລະດັບການບໍລິການການທ່ອງທ່ຽວ ໃຫ້ມີຄຸນນະພາບ, ໄດ້ມາດຕະ ຖານ, ສາມາດເຊື່ອມກັບວົງຈອນການທ່ອງທ່ຽວ ຂອງນະຄອນຫຼວງວຽງຈັນ ແລະ ເມືອງທ່ອງທ່ຽວວັງວຽງ ພ້ອມທັງເຊື່ອມໂຍງກັບພາກພື້ນ ແລະ ສາກົນ. ການຄັດເລືອກເອົາພາກທຸລະກິດເຂົ້າມາຮ່ວມກັບພາກລັດ ໃນການບໍລິການ ແລະ ການບໍລິຫານຄຸ້ມຄອງ ແມ່ນໄດ້ຄັດເລືອກໂດຍຜ່ານການປະມູນເປີດກວ້າງ ເພື່ອຄັດເລືອກເອົາພາກທຸລະກິດ ຜູ້ທີ່ມີປະສົບການທີ່ກ່ຽວຂ້ອງ ເພື່ອເຮັດໃຫ້ການລົງທຶນໂຄງລ່າງພື້ນຖານສິ່ງອໍານວຍຄວມສະດວກ ຢູ່ສະຖານທີ່ທ່ອງທ່ຽວເຂດໜ້າເຂື່ອນນໍ້າງື່ມ ສ້າງຜົນປະໂຫຍດສູງສຸດ ໃຫ້ແກ່ຊຸມຊົນທ້ອງຖິ່ນ, ກໍ່ຄືແຂວງວຽງຈັນ ແລະ ສປປ ລາວ.
ໂຄງການດັ່ງກ່າວ ແມ່ນໄດ້ຮັບການສະໜັບສະໜູນໂດຍ ທະນາຄານພັດທະນາອາຊີ (ADB) ໂດຍທຶນຊ່ວຍເຫຼືອ. ພາຍໃຕ້ໂຄງການພັດທະນາໂຄງລ່າງພື້ນຖານເພື່ອສົ່ງເສີມການທ່ອງທ່ຽວ ອະນຸພາກພື້ນແມ່ນໍ້າຂອງ ໄລຍະ 2, ເຈົ້າຂອງໂຄງການ ໂດຍກະຊວງວັດທະນະທໍາ ແລະ ການທ່ອງທ່ຽວ.(ຂ່າວ:ແຂວງວຽງຈັນ)
ຄໍາເຫັນ