ມອບ-ຮັບບັດພະນັກງານ-ລັດຖະກອນໃຫ້ຄັງເງິນແຫ່ງລັດປະຈໍາແຂວງຄໍາມ່ວນ

ພິທີມອບບັດພະນັກງານ-ລັດຖະກອນຄັ້ງນີ້: ຄະນະຮັບຜິດຊອບໄດ້ເຜີຍແຜ່ຄໍາແນະນໍາ ກ່ຽວກັບການອອກບັດພະນັກງານ-ລັດຖະກອນ ແລະ ແນະນໍາຂັ້ນຕອນໃນການມາຮັບບັດ, ຊຶ່ງການອອກບັດພະນັກງານ-ລັດຖະກອນ ແມ່ນເປັນວຽກງານໜຶ່ງທີ່ມີຄວາມໝາຍຄວາມສໍາຄັນ ແລະ ມີຜົນປະໂຫຍດຫຼາຍ ເພື່ອຫັນການຄຸ້ມຄອງພະນັກງານ-ລັດຖະກອນ ເຂົ້າສູ່ລະບຽບຫຼັກການ ແລະ ກົດໝາຍ, ຫັນເປັນທັນສະໄໝ, ຈະແຈ້ງ ແລະ ມີປະສິດທິພາບສູງຂຶ້ນ ຕາມທິດທາງແຜນການປະຕິຮູບກົນໄກການບໍລິຫານລັດ ຊຶ່ງເຮັດໃຫ້ມີຄວາມສະດວກໃນການຄຸ້ມຄອງພະນັກງານ-ລັດຖະກອນ ເຂົ້າສູ່ລະບົບລວມສູນ, ຂໍ້ມູນມີຄວາມຖືກຕ້ອງຊັດເຈນ, ການເບີກຈ່າຍເງິນເດືອນ, ເງິນອຸດໜູນ ແລະ ເງິນນະໂຍບາຍຕ່າງໆ ຖືກຕ້ອງສອດຄ່ອງຕາມຄວາມເປັນຈິງ, ຮັບປະກັນຄວາມໂປ່ງໃສ ແລະ ຍຸຕິທຳ ເປັນການຢັ້ງຢືນ ແລະ ກວດກາບັນຊີຈຳນວນພົນພະນັກງານ-ລັດຖະກອນ ຜູ້ມີໜ້າ ຫຼື ບໍ່ມີໜ້າຕົວຈິງ ທັງເປັນການປັບປຸງຂໍ້ມູນຊີວະປະຫວັດລັດຖະກອນໃຫ້ຖືກຕ້ອງ ສອດຄ່ອງ ຕາມລະບຽບການ. ຈາກນັ້ນ ໃນພິທີໄດ້ມີການແຈກຢາຍບັດໃຫ້ພະນັກງານ-ລັດຖະກອນຄັງເງິນແຫ່ງລັດປະຈໍາແຂວງ ຈໍານວນ 35 ທ່ານ, ຍິງ 22 ທ່ານ.ຂ່າວ: ກອງຄໍາ