ມອບ-ຮັບໜ້າທີ່ການນຳບາງພະແນກການຂອງແຂວງຊຽງຂວາງ

ທ່ານ ນາງ ວັນໄຊ ສິງດາລາ ຮອງເລຂາໜ່ວຍພັກ ຮອງປະທານກວດກາພັກ-ລັດແຂວງ ແລະ ທ່ານ ຄຳໄຊ ບຸນເພັດ ຮອງເລຂາຄະນະຈັດຕັ້ງແຂວງ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານມະຕິຕົກລົງ ວ່າດ້ວຍການຍົກຍ້າຍອອກພັກການຮັບອຸດໜູນບຳນານ, ແຕ່ງຕັ້ງເລຂາໜ່ວຍພັກຮາກຖານ ແລະ ບົ່ງຕົວແຕ່ງຕັ້ງຫົວໜ້າ ຮອງຫົວໜ້າພະແນກການ, ຫົວໜ້າ ຮອງຫົວໜ້າຂະແໜງຂອງ ຄະນະຈັດຕັ້ງແຂວງ, ຫ້ອງວ່າການແຂວງ ແລະ ພະແນກຍຸຕິທຳແຂວງ, ຊຶ່ງມີ 3 ພາກສ່ວນມອບ-ຮັບໜ້າທີ່ຄື: ຫົວໜ້າຫ້ອງວ່າການແຂວງ, ຫົວໜ້າໂຮງຮຽນການເມືອງ ແລະ ການປົກຄອງແຂວງ ແລະ ປະທານສະຫະພັນກຳມະບານແຂວງຄື: ແຕ່ງຕັ້ງທ່ານນາງ ຈັນທະສອນ ພູນສຸກ ຄະນະປະຈຳພັກແຂວງ ຫົວໜ້າຫ້ອງວ່າການແຂວງ ເປັນຫົວໜ້າຄະນະຈັດຕັ້ງແຂວງ ຜູ້ໃໝ່, ທ່ານ ຄຳວຽນ ສີຫານາດ ກຳມະການພັກແຂວງ ຮອງຫົວໜ້າຄະນະຈັດຕັ້ງແຂວງ ເປັນເລຂາຄະນະພັກຫ້ອງວ່າການແຂວງ ເປັນຫົວໜ້າຫ້ອງວ່າການແຂວງ, ທ່ານ ເພັດສະໝອນ ດວງປະເສີດ ກຳມະການພັກແຂວງ ຮອງປະທານແນວລາວສ້າງຊາດແຂວງ ເປັນຫົວໜ້າໂຮງຮຽການເມືອງ ແລະ ການປົກຄອງແຂວງຜູ້ໃໝ່, ທ່ານ ຄຳຫຼ້າ ແກ້ວດາວັນ ກຳມະການພັກແຂວງ ເລຂາພັກເມືອງໆຜາໄຊ ເປັນປະທານສະຫະພັນກຳມະບານແຂວງ ຜູ້ໃໝ່.

ໂອກາດນີ້, ທ່ານ ບຸນເຮືອງ ສຸລິໄຊ ໄດ້ເນັ້ນໃຫ້ 6 ພາກສ່ວນ ຈົ່ງເປັນເອກະພາບ ການບົ່ງຕົວແຕ່ງຕັ້ງໃນຄັ້ງນີ້, ແມ່ນອີງຕາມຄວາມຮຽກຮ້ອງ ຂອງໜ້າທີ່ວຽກງານ, ເອົາໃຈໃສ່ຊີ້ນຳ-ນຳພາຂົງເຂດວຽກງານຂອງຕົນ ໃຫ້ມີຜົນສຳເລັດ, ເອົາໃຈໃສ່ພັດທະນາຕົນເອງ ຮ່ຳຮຽນນຳໝູ່ຄູ່ ເພື່ອມິດ, ເພີ່ມທະວີ ກຳແໜ້ນກົດໝາຍ ພາລະບົດບາດ, ໜ້າທີ່, ຜັນຂະຫຍາຍແຜນງານ, ປັບປຸງ ກຳນົດຕຳແໜ່ງ ພະນັກງານຄືນໃໝ່ ໃຫ້ເໝາະສົມ, ກຳນົດຕຳແໜ່ງງານ, ຊັບຊ້ອນ ພະນັກງານໃຫ້ແທດເໝາະກັບໜ້າວຽກ, ມີຄວາມຫັນປ່ຽນຢ່າງຕັ້ງໜ້າ, ຕ້ານແນວຄິດຄົນເຈົ້າຄົນຂ້ອຍ, ເຕົ້າໂຮມຄວາມສາມັກຄີ, ເອົາໃຈໃສ່ວຽກງານກົງຈັກການຈັດຕັ້ງມະຫາຊົນ, ວຽກງານພັກ, ປະສານງານ ພົວພັນນຳສາຍຕັ້ງ ສາຍຂວາງໃຫ້ແໜ້ນແຟ້ນ, ນຳພາໜ້າທີ່ວຽກງານໃຫ້ມີຜົນສຳເລັດ, ສຳລັບພະນັກງານເຂົ້າຮັບອຸດໜູນບຳນານ ໃຫ້ສືບຕໍ່ດຳເນີນຊີວິດພັກ ນຳຂັ້ນບ້ານ ສ້າງສາພັດທະນາເສດຖະກິດ-ສັງຄົມ ເປັນທີ່ປຶກສາໃຫ້ກັບຜູ້ທີ່ມາຮັບໜ້າທີ່ໃໝ່ ຮັກສາສຸຂະພາບໃຫ້ແຂງແຮງ.

(ຂ່າວ: ບຸນມີ ແສງທຸມມີ)