 |
ໃນການຢ້ຽມຢາມ ຄະນະໄດ້ເຂົ້າພົບ ແລະ ເຮັດວຽກຢ່າງເປັນທາງການກັບສະພາເພື່ອການພັດທະນາແຫ່ງປະເທດກຳປູເຈຍ (The Council for the Development of Cambodia: CDC) ຊຶ່ງໄດ້ຮັບການຕ້ອນຮັບຢ່າງອົບອຸ່ນຈາກ ທ່ານ ຢຸນ ເຮັງ (H.E. Yun Heng) ຮອງເລຂາທິການ ຄະນະກຳມະການສົ່ງເສີມການລົງທຶນ ແຫ່ງ ກຳປູເຈຍ. ການພົບປະຄັ້ງນີ້ ໄດ້ມີການແລກປ່ຽນບົດຮຽນ ກ່ຽວກັບນະໂຍບາຍ, ກົນໄກ ແລະ ມາດຕະການສົ່ງເສີມ ລວມເຖິງການອຳນວຍຄວາມສະດວກ ແກ່ນັກລົງທຶນ, ໂດຍເນັ້ນໜັກໃສ່ການພັດທະນາອຸດສາຫະກຳຜະລິດ ແລະ ປະກອບລົດຍົນ, ການຜະລິດຊິ້ນສ່ວນ, ການພັດທະນາຕ່ອງໂສ້ສະໜອງ ແລະ ການເຊື່ອມໂຍງກັບຖານການຜະລິດໃນພາກພື້ນ, ການສ້າງມູນຄ່າເພີ່ມ, ການສົ່ງເສີມການນໍາໃຊ້ວັດຖຸດິບ ແລະ ຊິ້ນສ່ວນພາຍໃນປະເທດ (local content) ຕະຫຼອດເຖິງການພັດທະນາຖານຜູ້ສະໜອງພາຍໃນ ເພື່ອຮອງຮັບການຂະຫຍາຍຕົວຂອງອຸດສາຫະກຳ ປະກອບລົດຍົນ. ນອກຈາກນັ້ນ, ຄະນະຜູ້ແທນຍັງໄດ້ແລກປ່ຽນກ່ຽວກັບນະໂຍບາຍ ແລະ ກົນໄກສົ່ງເສີມການລົງທຶນ, ຂັ້ນຕອນການຂໍຂຶ້ນທະບຽນໂຄງການລົງທຶນທີ່ມີຄຸນສົມບັດຄົບຖ້ວນ (Qualified Investment Project: QIP), ສິດປະໂຫຍດດ້ານພາສີ ແລະ ອາກອນ ລວມເຖິງມາດຕະການຈູງໃຈການລົງທຶນໃນຂະແໜງອຸດສາຫະກຳທີ່ມີທ່າແຮງ.
 |
ນອກຈາກນັ້ນ, ຄະນະຜູ້ແທນຍັງໄດ້ຢ້ຽມຢາມ ແລະ ເຮັດວຽກກັບບັນດາພາກສ່ວນກ່ຽວຂ້ອງ ທີ່ມີບົດບາດໃນການສົ່ງເສີມໃຫ້ແກ່ການພັດທະນາອຸດສາຫະກຳປະກອບລົດຍົນຢູ່ ກຳປູເຈຍ ເປັນຕົ້ນ ກອງທຶນພັດທະນາສີມືແຮງງານ (Skills Development Fund: SDF); ສະຖາບັນມາດຕະຖານ ຂອງ ກະຊວງອຸດສາຫະກຳ, ວິທະຍາສາດ, ເຕັກໂນໂລຊີ ແລະ ນະວັດຕະກຳ; ແລະ ສູນຝຶກອົບຮົມດ້ານນະວັດຕະກຳຍານຍົນ ແຫ່ງຊາດກຳປູເຈຍ.
 |
ນອກຈາກການພົບປະກັບໜ່ວຍງານພາກລັດ ແລະ ສະຖາບັນຕ່າງໆແລ້ວ, ຄະນະຜູ້ແທນຍັງໄດ້ລົງຢ້ຽມຢາມໂຮງງານ ປະກອບລົດຍົນຂອງບໍລິສັດ Automotive Manufacturing ຂອງກຳປູເຈຍ ທີ່ແຂວງພູຊັດ ເຊ ຊຶ່ງປະກອບລົດຍົນຍີ່ຫໍ້ Ford ເພື່ອໄດ້ຮຽນຮູ້ກ່ຽວກັບ ຂະບວນການຜະລິດ-ປະກອບລົດຕົວຈິງ ແລະ ໄດ້ຮັບຮູ້ບົດຮຽນດ້ານການຈັດຕັ້ງສາຍການຜະລິດ, ການຄວບຄຸມຄຸນນະພາບ ແລະ ການນໍາໃຊ້ຊິ້ນສ່ວນໃນຂະບວນການປະກອບ.
(ຂ່າວ: ຄລທ)
ຄໍາເຫັນ