ມອບ-ຮັບພະນັກງານລົງກໍ່ສ້າງຮາກຖານການເມືອງຢູ່ພະແນກ ຖວທສາລະວັນ

ຫວ່າງບໍ່ດົນມານີ້ທີ່ຫ້ອງປະຊຸມພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວ (ຖວທ)ແຂວງສາລະວັນໄດ້ຈັດພິທີມອບ-ຮັບພະນັກງານລົງກໍ່ສ້າງຮາກຖານການເມືອງຈາກກະຊວງ ຖວທ ໃຫ້ກຽດຕ້ອນຮັບຂອງທ່ານ ມະໄລວອນ ສີປະເສີດ ຫົວໜ້າພະແນກ ຖວທ ແຂວງ, ມີທ່ານ ອິນຖາ ສີສົມພອນ ຮອງຫົວໜ້າກົມຈັດຕັ້ງ ແລະ ພະນັກງານ, ມີຄະນະພະແນກ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ໃນພິທີຕາງໜ້າກົມຈັດຕັ້ງ ແລະພະນັກງານກະຊວງ ຖວທ ໄດ້ຜ່ານຂໍ້ຕົກລົງຂອງກະຊວງ ຖວທ ວ່າດ້ວຍການອະນຸມັດໃຫ້ພະນັກງານລົງກໍ່ສ້າງຮາກຖານການເມືອງຢູ່ທ້ອງຖິ່ນປີ 2023. ໂດຍອະນຸມັດໃຫ້ທ່ານ ສອນໄຊ ຈັນທະວົງ ຫົວໜ້າພະແນກສຳຫຼວດ ແລະ ຈັດສັນແຫຼ່ງທ່ອງທ່ຽວ ກົມພັດທະນາການທ່ອງທ່ຽວ ແລະ ທ່ານ ບຸດສະດີ ຄັນທະວົງ ຫົວໜ້າພະແນກຄຸ້ມຄອງສະຖານທີ່ທ່ອງທ່ຽວ ກົມຄຸ້ມຄອງທຸລະກິດການທ່ອງທ່ຽວ ກຳນົດເວລາ 6 ເດືອນເລີ່ມແຕ່ວັນທີ 25 ຕຸລາ 2023 ຫາວັນທີ 31 ມີນາ 2024.ການລົງກໍ່ສ້າງຮາກຖານໃນຄັ້ງນີ້ ເພື່ອສ້າງຄວາມເຂັ້ມແຂງໃຫ້ກັບທ້ອງຖິ່ນ ພ້ອມທັງຊ່ວຍວຽກງານເສນາທິການ, ວຽກງານຖະແຫຼງຂ່າວ, ວຽກງານວັດທະນະທຳ ແລະ ວຽກງານພັດທະນາການທ່ອງທ່ຽວເພື່ອປະຕິບັດຕາມແນວທາງນະໂຍບາຍຂອງພັກ ຊຶ່ງກົມການເມືອງສູນກາງພັກໄດ້ມີມະຕິ 51 ວ່າດ້ວຍການຫັນລົງກໍ່ສ້າງຮາກຖານຮອບດ້ານ, ເອົາໃຈໃສ່ຊຸກຍູ້ຂະບວນການຮອບດ້ານທົ່ວອົງຄະນະພັກກະຊວງ ຖວທ ພ້ອມທັງໄດ້ເລືອກເຟັ້ນເອົາພະນັກງານ, ສະມາຊິກພັກຜູ້ທີ່ຢູ່ໃນແຜນກໍານົດພະນັກງານນຳພາ-ຄຸ້ມຄອງຂັ້ນຂອງຕົນຜູ້ທີ່ມີຄວາມຮູ້, ຄວາມສາມາດລົງຊ່ວຍທ້ອງຖິ່ນຕາມຂະແໜງການທີ່ມີຄວາມຕ້ອງການ. 
    ການເຮັດວຽກງານກໍ່ສ້າງຮາກຖານ ແມ່ນໜ້າວຽກຂອງພັກ-ລັດ ແລະ ບັນດາການຈັດຕັ້ງການເມືອງ-ສັງຄົມທີ່ມີສ່ວນຮັບຜິດຊອບ ຕໍ່ການພັດທະນາຮາກຖານໃນທຸກດ້ານຂອງຊີວິດສັງຄົມ, ແມ່ນຂະບວນການນຳພາຂອງພັກ, ການຄຸ້ມຄອງບໍລິຫານຂອງລັດໃຫ້ພັດທະນາໄປຕາມ 4 ເນື້ອໃນ 4 ຄາດໝາຍຄື: ສືບຕໍ່ຖືວຽກງານການເມືອງ-ແນວຄິດເປັນກົກ, ວຽກງານເສດຖະກິດເປັນໃຈກາງ ສ້າງຄວາມເຂັ້ມແຂງໃຫ້ລະບົບການເມືອງເປັນປັດໄຈຕັດສິນ ແລະ ຖືເອົາຄວາມສະຫງົບ ຄວາມເປັນລະບຽບຮຽບຮ້ອຍເປັນປັດໄຈຄໍ້າປະກັນ ເພື່ອເຮັດສຳເລັດສອງໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຜົນສຳເລັດ.
ຂ່າວ-ພາບ: ລັດຕະນາ ແສງສຸວັນ