ໝູ່ບ້ານບູຮານ ເດືອງເລິມ ສະຖານທີ່ສະຫງົບສຸກ ແລະ ມີຄວາມໝາຍດ້ານວັດທະນະທໍາຫວຽດນາມ

ໝູ່ບ້ານບູຮານເດືອງລິມ ຢູ່ຫ່າງຈາກໃຈກາງນະຄອນຫຼວງຮ່າໂນ້ຍ ໄປທາງຕິດຕາເວັນຕົກ ປະມານ 50 ກິໂລແມັດ, ຢູ່ໃນເມືອງເຊິນເຕິຍ ຊຶ່ງໝູ່ບ້ານແຫ່ງນີ້ມີອາລິຍະທໍາແຫ່ງລຸ່ມແມ່ນໍ້າແດງ ແລະ ເປັນໝູ່ບ້ານບູຮານ ແຫ່ງທໍາອິດໃນຫວຽດນາມ ທີ່ໄດ້ຮັບຮອງເປັນແຫຼ່ງບູຮານສະຖານທາງປະຫວັດສາດ ແລະ ວັດທະນະທໍາແຫ່ງຊາດ ເມື່ອປີ 2005 ເປັນໝູ່ບ້ານໜຶ່ງທີ່ເກົ່າແກ່ທີ່ສຸດໃນຫວຽດນາມ, ທັງເປັນບ້ານເກີດຂອງກະສັດຄື: ກະສັດ ຝຸ່ງ ຮຶງເກີດໃນປີ 760, ສິ້ນພະຊົນປີ 802 ແລະ ກະສັດ ໂງ ກວຽນ ເກີດໃນປີ 898, ສິ້ນພະຊົນໃນປີ 944; ຄວາມພິເສດຂອງໝູ່ບ້ານນີ້ ແມ່ນມີຫຼາຍຢ່າງເປັນຕົ້ນແມ່ນ ເຮືອນທີ່ສ້າງດ້ວຍຫີນໜາມໜໍ່ ຊຶ່ງແມ່ນເຮືອນບູຮານທີ່ເປັນມູນເຊື້ອມີ 956 ຫຼັງ ຊຶ່ງສະທ້ອນໃຫ້ເຫັນຄວາມງົດງາມພິເສດ ແລະ ທົນທານຕໍ່ການເວລາ.

ເດືອງເລິມ ຍັງເປັນສະຖານທີ່ທ່ອງທ່ຽວທີ່ດຶງດູດໃຈ ດ້ວຍຄຸນຄ່າທາງດ້ານປະຫວັດສາດ, ວັດທະນະທໍາ ແລະ ສະຖາປັດຕະຍະກຳທີ່ເປັນເອກະລັກ ຄື: ໝູ່ບ້ານບູຮານ ເດືອງເລິມ ຕ້ອນຮັບແຂກດ້ວຍຊຸ້ມປະຕູທາງເຂົ້າໝູ່ບ້ານ ທີ່ຖືກສ້າງຂຶ້ນໃນປີ 1833 ດ້ວຍຫີນໜາມໜໍ່ ໃນຮູບແບບປັດຕະຍະກໍາ ໃນຣາຊະວົງ ເລ (Le Dynasty), ຢູ່ດ້ານໜ້າ ຂ້າງຂວາຂອງຊຸ້ມປະຕູມີຕົ້ນໂພ ອາຍຸ 300 ກວ່າປີ ທີ່ໃຫ້ຮົ່ມເງົາແກ່ຜູ້ຄົນທີ່ມາພັກຜ່ອນ ແລະ ອີກຂ້າງກໍມີໜອງປາ ຊຶ່ງເປັນທິວທັດທີ່ສ້າງບັນຍາກາດສະຫງົບ, ເກົ່າແກ່ ແລະ ລຽບງ່າຍຢ່າງແທ້ຈິງ; ເຮືອນຊຸມບູຮານຂອງໝູ່ບ້ານບູຮານແຫ່ງນີ້ ຖືກສ້າງຂຶ້ນໃນປີ 1684 ຊຶ່ງນັກທ່ອງທ່ຽວຈະໄດ້ຊື່ນຊົມກັບໂຄງສ້າງໄມ້ບູຮານ ທີ່ຂະໜານກັນ ແລະ ແຜ່ນໄມ້ເຄືອບເງົາແນວນອນທີ່ມີອາຍຸຫຼາຍຮ້ອຍປີ; ສາລາບ້ານ ທີ່ສ້າງຂຶ້ນໃນປີ 1533, ທີ່ນີ້ບໍ່ພຽງແຕ່ເປັນສູນກາງຊຸມຊົນ ແຕ່ຍັງເປັນສະຖານທີ່ຮັກສາຄຸນຄ່າ ແລະ ປະເພນີຂອງຊາວຫວຽດນາມ ເປັນຕົ້ນແມ່ນຄ້ອງໄມ້ ທີ່ມີລັກສະນະຄືໂຕປາ ທີ່ເມື່ອກ່ອນໃຊ້ໄວ້ເຄາະເອີ້ນປະຊາຊົນມາປະຊຸມ; ດ້ານຂ້າງຂອງສາລາບ້ານ ຍັງມີບໍ່ນໍ້າບູຮານ ທີ່ເປັນຈິດວິນຍານຂອງໝູ່ບ້ານ ຊຶ່ງບໍ່ນໍ້າແຫ່ງນີ້ ຍັງມີນໍ້າໃສສະອາດ ແລະ ຍັງຄົງສົມບູນ. ນອກນີ້, ກໍມີສະຖານທີ່ອື່ນໆ ທີ່ໜ້າປະທັບໃຈອີກຫຼາຍບ່ອນ ທີ່ຢູ່ໃນໝູ່ບ້ານບູຮານ ເດືອງເລິມ.

ເມື່ອມາໝູ່ບ້ານບູຮານແຫ່ງນີ້, ນັກທ່ອງທ່ຽວຍັງຈະໄດ້ສຳຜັດວິຖີຊີວິດຂອງປະຊາຊົນ ຊຶ່ງໃນໝູ່ບ້ານໄດ້ມີການຜະລິດຂອງທີ່ລະນຶກດ້ວຍຝີມືຂອງຊາວບ້ານເອງ ແລະ ມີຜະລິດຕະພັນຕ່າງໆຂອງໝູ່ບ້ານ; ນອກນີ້, ຍັງມີອາຫານພື້ນເມືອງຄື ຕຸນປາ (ຫວຽດເອີ້ນວ່າ ກາໂຄ່) ແລະ ການເຮັດເຂົ້າໜົມພື້ນເມືອງຄື ຂະໜົມບັງເຕ້, ຂະໜົມແຈ້ລາມ, ກະແລ້ມທີ່ເປັນເອກະລັກພິເສດ ເພາະມີລວດລາຍ ທີ່ສະທ້ອນໃຫ້ເຖິງສະເໜ່ຂອງໝູ່ບ້ານບູຮານແຫ່ງນີ້.

ເວົ້າໄດ້ວ່າ: ໝູ່ບ້ານບູຮານ ເດືອງເລິມ ບໍ່ພຽງແຕ່ເປັນສະຖານທີ່ ທີ່ເກັບຄວາມຊົງຈໍາ, ວັດທະນະທໍາ ແລະ ຮັກສາສະຖາປັດຕະຍາກໍາຂອງຫວຽດນາມໃນອະດີດ ແຕ່ຍັງເປັນສະຖານທີ່ ທີ່ເຊື່ອມໂຍງນັກທ່ອງທ່ຽວພາຍໃນ ກໍຄືຄົນຮຸ່ນໜຸ່ມ, ເຍົາວະຊົນຫວຽດນາມ ກັບຄຸນຄ່າທາງດ້ານວັດທະນະທໍາ ແລະ ມູນເຊື້ອປະຫວັດສາດຂອງຫວຽດນາມ ຊຶ່ງນີ້ກໍລວມທັງນັກທ່ອງທ່ຽວສາກົນ ທີ່ສາມາດມາທ່ຽວຊົມສະຖານທີ່ແຫ່ງນີ້, ມາພັກຜ່ອນໃນສະຖານທີ່ ທີ່ສະຫງົບ ແລະ ມີຄວາມໝາຍດ້ານວັດທະນະທໍາຫວຽດນາມ.