ທ່ານ ຄໍາແສນ ພະສະແຫວງ ໄດ້ຊີ້ແຈງວ່າ: ໃນໄລຍະຜ່ານມາ, ພະແນກອຸດສາຫະກໍາ ແລະ ການຄ້າແຂວງ ໄດ້ເອົາໃຈໃສ່ຊຸກຍູ້ສົ່ງເສີມ ແລະ ສ້າງເງື່ອນໄຂໃຫ້ບັນດາຫົວໜ່ວຍ ຈນກ ແລະ ປະຊາຊົນທົ່ວໄປ ກໍຄື ວິສາຫະກິດທັງພາຍໃນ ແລະ ຕ່າງປະເທດໄດ້ເຂົ້າເຖິງນະໂຍບາຍຂອງລັດຖະບານ ໂດຍໄດ້ປະສານສົມທົບກັບ ກະຊວງອຸດສາຫະກໍາ ແລະ ການຄ້າ, ທະນາຄານແຫ່ງ ສປປ ລາວ, ທະນາຄານທຸລະກິດພາຍໃນແຂວງ ຈັດກອງປະຊຸມເຜີຍແຜ່ນິຕິກໍາ, ລະບຽບການ ແລະ ໃຫ້ຄໍາແນະນໍາແກ່ຫົວໜ່ວຍ ຈນກ, ບຸກຄົນ ທີ່ມີຄວາມສົນໃຈໃນການເຂົ້າເຖິງແຫຼ່ງທຶນຢ່າງເປັນປົກກະຕິຕໍ່ເນື່ອງ; ແຕ່ການເຂົ້າເຖິງແຫຼ່ງທຶນຕົວຈິງແລ້ວ ແຕ່ລະນະໂຍບາຍທີ່ລັດຖະບານວາງອອກມາໄດ້ມີຂໍ້ກໍານົດ, ລະບຽບການ, ຂັ້ນຕອນ ແລະ ເງື່ອນໄຂສະເພາະຢ່າງລະອຽດ, ຊັດເຈນ, ມີມາດຖານສູງສົມຄວນ ຊຶ່ງເປັນສາເຫດໜຶ່ງທີ່ເຮັດໃຫ້ຫົວໜ່ວຍ ຈນກ ແລະ ປະຊາຊົນທົ່ວໄປ ບໍ່ສາມາດເຂົ້າເຖິງໄດ້ ໂດຍສະເພາະ ບ້ວງທຶນສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ແລະ ບ້ວງນະໂຍບາຍ 765, 766 ແລະ ອີກດ້ານໜຶ່ງບັນດາຫົວໜ່ວຍ ຈນກ ຂອງແຂວງ ກໍຍັງອ່ອນນ້ອຍຖ້າທຽບໃສ່ບັນດາແຂວງໃຫຍ່ອື່ນໆໃນທົ່ວປະເທດ; ສ່ວນທະນາຄານແຫ່ງ ສປປ ລາວຜູ້ຄຸ້ມຄອງໂດຍກົງກ່ຽວກັບແຫຼ່ງທຶນຕ່າງໆ ກໍໄດ້ມອບຕໍ່ໃຫ້ທະນາຄານທຸລະກິດ ເປັນຜູ້ຈັດຕັ້ງປະຕິບັດ ປ່ອຍຕໍ່ໃຫ້ຫົວໜ່ວຍ ຈນກ, ປະຊາຊົນທົ່ວໄປ ກໍລ້ວນແຕ່ມີເງື່ອນໄຂ ແລະ ລະບຽບການສະເພາະວາງອອກ ຂອງແຕ່ລະທະນາຄານ ເພື່ອຮັບປະກັນຄວາມສ່ຽງປ່ອຍແລ້ວ ກໍຕ້ອງສາມາດເກັບໄດ້ທັງຕົ້ນທຶນ ແລະ ດອກເບ້ຍ, ແຕ່ມີບາງທະນາຄານຍັງບໍ່ທັນເອົາໃຈໃສ່ພັດທະນາປ່ອຍກູ້ ຕາມທີ່ນະໂຍບາຍກໍານົດໄວ້, ເຮັດໃຫ້ການປ່ອຍກູ້ແຕ່ລະປີມີ ຈນກ ເຂົ້າເຖິງນ້ອຍທຽບໃສ່ບັນດາແຂວງ.
ທ່ານ ຄໍາແສນ ພະສະແຫວງ ໃຫ້ຮູ້ຕື່ມວ່າ: ມາຮອດປັດຈຸບັນ, ການປ່ອຍກູ້ບ້ວງທຶນສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ທສວ) ແລະ ບ້ວງນະໂຍບາຍ 765, 766 ຢູ່ແຂວງເຊກອງ ບັນລຸໄດ້ 97,750 ຕື້ກີບ ໂດຍສ່ວນໃຫຍ່ແມ່ນ ປ່ອຍໃນຂົງເຂດການຄ້າ, ກະສິກໍາ, ອຸດສາຫະກໍາປຸງແຕ່ງ ແລະ ບໍລິການ ຊຶ່ງເຮັດໃຫ້ສາມາດແກ້ໄຂບັນຫາ ແລະ ພັດທະນາໄດ້ຫຼາຍດ້ານໃນທ້ອງຖິ່ນແຂວງເຊກອງ ໂດຍສະເພາະການຊຸກຍູ້ສົ່ງເສີມການຜະລິດສິນຄ້າ, ພັດທະນາທຸລະກິດໃໝ່, ສ້າງສິນຄ້າໂອດ໋ອບຂອງແຂວງໃຫ້ຫຼາຍຂຶ້ນ ຊຶ່ງເປັນການປະກອບສ່ວນສໍາຄັນໃນການສ້າງອາຊີບ, ສ້າງວຽກເຮັດງານທໍາ, ສ້າງລາຍຮັບທີ່ໝັ້ນຄົງ ກໍຄື ການພັດທະນາເສດຖະກິດ-ສັງຄົມ ແລະ ແກ້ໄຂຄວາມທຸກຍາກ ຂອງປະຊາຊົນພາຍໃນແຂວງໃຫ້ນັບມື້ດີຂຶ້ນ.
(ຂ່າວ: ສັນຍາ)
ຄໍາເຫັນ