 |
ໃນໂອກາດເຂົ້າຮ່ວມວາງສະແດງຜົນງານການກວດກູ້ລະເບີດລູກຫວ່ານ ທີ່ຕົກຄ້າງຢູ່ລາວ ໃນກອງປະຊຸມທົບທວນສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຮອບວຽນທີ 3 (CCM) ຢູ່ຫໍປະຊຸມແຫ່ງຊາດ.ທ່ານ ນາງ ບຸນທັນ ພົມມະສະຖິດ ທີ່ປຶກສາກິດຕິມະສັກ ມູນນິທິຂອງອົງການມໍຣະດົກສົງຄາມ (Legacies of War)ປະຈໍາສະຫະລັດອາເມຣິກາໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນໃນວັນທີ 15 ກັນຍາວ່າ: ອົງການ Legacies of War ໄດ້ຈັດຕັ້ງປະຕິບັດງານມາຕັ້ງແຕ່ປີ 2004 ໂດຍມີພາລະກິດຫຼັກໃນການໃຫ້ຄວາມຮູ້ ແລະ ສຶກສາອົບຮົມກ່ຽວກັບຜົນກະທົບຂອງສົງຄາມລັບ (Secret War) ໃນໄລຍະປີ 1964 ຫາ 1974. ເຖິງວ່າສົງຄາມຈະຜ່ານພົ້ນໄປຫຼາຍກວ່າ 50 ປີແລ້ວກໍຕາມ, ແຕ່ລະເບີດຕ່າງໆເຊັ່ນ: ລະເບີດບີເອັມ (Cluster bombs) ທີ່ຕົກຄ້າງໃນພື້ນດິນ ຍັງຄົງເປັນອັນຕະລາຍຮ້າຍແຮງຕໍ່ຊີວິດ ແລະ ການທໍາມາຫາກິນຂອງປະຊາຊົນລາວໂດຍສະເພາະຊາວກະສິກອນທີ່ຕ້ອງເຮັດໄຮ່ເຮັດນາ ແລະ ເດັກນ້ອຍໃນທ້ອງຖິ່ນ. ໃນການເຄື່ອນໄຫວຢູ່ ສະຫະລັດ ອາເມຣິກາ, ອົງການໄດ້ເຮັດວຽກຢ່າງໃກ້ຊິດກັບສະມາຊິກສະພາທ້ອງຖິ່ນ (Congress) ແລະ ປະຊາຊົນໃນຫຼາຍລັດ ເພື່ອໃຫ້ເຂົາເຈົ້າໄດ້ຮັບຮູ້ຄວາມຈິງກ່ຽວກັບປະຫວັດສາດ ແລະ ຄວາມຮັບຜິດຊອບໃນການສະໜອງງົບປະມານຊ່ວຍເຫຼືອ. ນອກຈາກນັ້ນ, ຍັງໄດ້ເນັ້ນໃສ່ການເລົ່າເລື່ອງລາວປະຫວັດສາດໃຫ້ຄົນຮຸ່ນໃໝ່ ໂດຍສະເພາະແມ່ນຊຸມຊົນເຊື້ອຊາດລາວ, ກໍາປູເຈຍ ແລະ ຫວຽດນາມ ທີ່ເກີດ ແລະ ໃຫຍ່ຢູ່ອາເມຣິກາ ໃຫ້ໄດ້ເຂົ້າໃຈເຖິງສາເຫດທີ່ຄອບຄົວຕ້ອງອົບພະຍົບ ແລະ ຜົນກະທົບຂອງສົງຄາມທີ່ຍັງຕົກຄ້າງມາຮອດປັດຈຸບັນ.
ທ່ານ ນາງ ບຸນທັນ ພົມມະສະຖິດ ຍັງໄດ້ສະແດງຄວາມຊົມເຊີຍ ແລະ ດີໃຈທີ່ປະເທດລາວໄດ້ເປັນເຈົ້າພາບໃນການຈັດກອງປະຊຸມຄັ້ງນີ້. ການເກັບກູ້ລະເບີດຢູ່ລາວຍັງຕ້ອງໃຊ້ເວລາອີກຫຼາຍປີ. ສະນັ້ນ, ອົງການຈຶ່ງມຸ່ງໝັ້ນທີ່ຈະເປັນກະບອກສຽງລະດົມທຶນ, ຢັ້ງຢືນການຊ່ວຍເຫຼືອຈາກລັດຖະບານອາເມຣິກາ ແລະ ສ້າງຄວາມປອດໄພໃຫ້ກັບແຜ່ນດິນລາວຢ່າງຕໍ່ເນື່ອງ.
ຄໍາເຫັນ