ເມືອງພຽງ ຈັດພິທີປະກາດການສ້າງຕັ້ງສູນບໍລິການຜ່ານປະຕູດຽວ

ໃນພິທີ, ໄດ້ຮັບຟັງການຜ່ານຂໍ້ຕົກລົງຂອງປະທານຄະນະກຳມະການປົກຄອງເມືອງ ວ່າດ້ວຍການແຕ່ງຕັ້ງຄະນະຮັບຜິດຊອບ ການປະຕິບັດກົນໄກການບໍລິການຜ່ານປະຕູດຽວ ຂັ້ນເມືອງ,ຂໍ້ຕົກລົງຂອງປະທານຄະນະກຳມະການປົກຄອງເມືອງ ວ່າດ້ວຍການແຕ່ງຕັ້ງຄະນະວິຊາການປະຕິບັດກົນໄກການບໍລິການຜ່ານປະຕູດຽວ ຂັ້ນເມືອງ,ຂໍ້ຕົກລົງຂອງທ່ານເຈົ້າແຂວງໄຊຍະບູລີເລກທີ975/ຈຂຊຍ ວ່າດ້ວຍການສ້າງຕັ້ງສູນບໍລິການຜ່ານປະຕູດຽວຢູ່ເມືອງພຽງແລະໃນພິທີຍັງໄດ້ຜ່ານຄໍາສັ່ງເລກທີ 09/ນຍ ລົງວັນທີ28 ມັງກອນ 2013 ວ່າດ້ວຍການເພີ່ມທະວີການຈັດຕັ້ງປະຕິບັດວຽກງານບໍລິການຜ່ານປະຕູດຽວໂດຍຍົກໃຫ້ເຫັນເຖິງຜ່ານການຈັດຕັ້ງປະຕິບັດທົດລອງ ກົນໄກການບໍລິການຜ່ານປະຕູດຽວ ຕາມຂໍ້ຕົກລົງ ຂອງນາຍົກລັດຖະມົນຕີ ວ່າດ້ວຍການຈັດຕັ້ງປະຕິບັດກົນໄກ “ການບໍລິການຜ່ານປະຕູດຽວ” ຢູ່ອົງການບໍລິຫານລັດ ສະບັບເລກທີ 86/ນຍ, ລົງວັນທີ 1 ສິງຫາ 2007.ໃນໄລຍະຜ່ານມາ, ເຫັນວ່າໄດ້ມີຜົນສໍາເລັດໃນເບື້ອງຕົ້ນ, ລະບຽບຂັ້ນຕອນບໍລິຫານ ຈໍານວນໜຶ່ງໄດ້ຮັບການສ້າງຂຶ້ນ ຫຼື ປັບປຸງແກ້ໄຂໃຫ້ມີປະສິດທິພາບ ແລະ ວ່ອງໄວດີຂຶ້ນ.ພະນັກງານ-ລັດຖະກອນ ມີ ຄວາມຮັບຜິດຊອບສູງກວ່າເກົ່າ; ປະກົດການຫຍໍ້ທໍ້ໃນກົງຈັກໄດ້ຖືກຈໍາກັດ ແລະ ແກ້ໄຂເປັນກ້າວໆ, ບາງທ້ອງຖິ່ນມີລາຍຮັບເພີ່ມຂຶ້ນ; ປະຊາຊົນ, ນັກທຸລະກິດ ໄດ້ຮັບການບໍລິການສະດວກ, ວ່ອງໄວກວ່າເກົ່າ, ມີຄວາມນິຍົມຊົມຊອບ ແລະ ມີຄວາມດີໃຈທີ່ພັກ-ລັດເຮົາໄດ້ເອົາໃຈໃສ່ຕໍ່ການບໍລິການຮັບໃຊ້ປະຊາຊົນ ແລະ ສັງຄົມດ້ວຍການຈັດຕັ້ງ ປະຕິບັດ ແລະ ປັບປຸງວຽກງານບໍລິການຜ່ານປະຕູດຽວ.

ໃນພິທີຄັ້ງນີບັນດາຜູ້ເຂົ້າຮ່ວມຍັງໄດ້ລົງກວດກາແລະຢ້ຽມຊົມເບິ່ງສະຖານທີ່ສ້າງຕັ້ງສູນບໍລິການຜ່ານປະຕູດຽວຂອງເມືອງຕື່ມອີກ.

(ຂ່າວ: ແສງສຸດາ ກິ່ງສະຫວັດ)