ເມືອງທຸລະຄົມ ຝຶກອົບຮົມກົດໝາຍພື້ນຖານໃຫ້ພະນັກງານຫຼັກແຫຼ່ງຂັ້ນເມືອງ, ຂັ້ນບ້ານ

ໃນພິທີດັ່ງກ່າວ, ທ່ານ ນາງ ຈັນທະມາໄລ ບູນໄຊທິບ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງ ໄດ້ຂຶ້ນຜ່ານຂໍ້ຕົກລົງ ຂອງທ່ານປະທານຄະນະກຳມະການປົກຄອງເມືອງ ວ່າດ້ວຍການແຕ່ງຕັ້ງຄະນະຮັບຜິດຊອບ ເປີດຝຶກອົບຮົມກົດໝາຍລະບົບບຳລຸງ 45 ວັນ ຊຸດທີ VII ປະຈໍາປີ 2026, ຂໍ້ຕົກລົງວ່າດ້ວຍ ການແຕ່ງຕັ້ງຄູ-ອາຈານ ສອນກົດໝາຍລະບົບບຳລຸງ 45 ວັນ ຊຸດທີ VII ປະຈໍາປີ 2026, ຜ່ານຂໍ້ຕົກລົງວ່າດ້ວຍ ອະນຸມັດບຸກຄະລະກອນການຈັດຕັ້ງບ້ານ, ພະນັກງານລັດຖະກອນ, ພະນັກງານຕາແສງ ເຂົ້າຮ່ວມຝຶກອົບຮົມກົດໝາຍລະບົບບຳລຸງ 45 ວັນ ຊຸດທີ VII ປະຈໍາປີ 2026. ຈາກນັ້ນ, ທ່ານ ໂນລາ ຈັນທະວົງ ໄດ້ຂຶ້ນຜ່ານບົດລາຍງານການກະກຽມເປີດຊຸດຝຶກອົບຮົມກົດໝາຍ ລະບົບບຳລຸງ 45 ວັນ ຊຸດທີ VII ປະຈໍາປີ 2026, ມີຜູ້ເຂົ້າຮຽນທັງໝົດ 40 ຄົນ, ຍິງ 9 ຄົນ ທີ່ມາຈາກພະນັກງານຂັ້ນເມືອງ ແລະ ຂັ້ນບ້ານຈຳນວນໜຶ່ງ, ມີພຣະສົງ 2 ອົງ. ສໍາລັບວິຊາຮຽນປະກອບມີ 34 ວິຊາ, 22,5 ໜ່ວຍກິດ, ນໍາໃຊ້ເວລາຮຽນທັງໝົດ 360 ຊົ່ວໂມງ, ເທົ່າກັບ 45 ວັນ ເລີ່ມຮຽນນັບແຕ່ວັນທີ 31 ສິງຫາ 2026 ເປັນຕົ້ນໄປ.

ໂອກາດນີ້, ທ່ານ ພອນວິໄຊ ສີສະໝຸດ ໄດ້ມີຄໍາເຫັນທາງດ້ານວິຊາການ ໂດຍຍົກໃຫ້ເຫັນຄວາມສໍາຄັນຂອງການຮຽນຮູ້ກົດໝາຍ, ເພື່ອຮັບປະກັນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ. ພ້ອມທັງໄດ້ເນັ້ນໜັກໃຫ້ ນັກສໍາມະນາກອນທຸກຄົນ ຈົ່ງນໍາເອົາຄວາມຮູ້, ບົດຮຽນ ແລະ ທັກສະທີ່ໄດ້ຮຽນມາ ໄປຈັດຕັ້ງປະຕິບັດ ແລະ ຜັນຂະຫຍາຍເຂົ້າໃນການຈັດຕັ້ງປະຕິບັດວຽກງານຕົວຈິງຂອງຕົນ ຢູ່ແຕ່ລະອົງການ, ຫ້ອງການ ແລະ ທ້ອງຖິ່ນ ໃຫ້ມີຄວາມຖືກຕ້ອງ, ໂປ່ງໃສ, ຍຸຕິທໍາ ແລະ ເປັນເສົາຄໍ້າໃຫ້ແກ່ການປະຕິບັດໜ້າທີ່ວຽກງານຢ່າງມີປະສິດທິພາບ.

ໃນຕອນທ້າຍ, ທ່ານ ຄຳເລ້ ໄຊຍະວົງສີ ກໍໄດ້ໂອ້ລົມຕໍ່ທີ່ປະຊຸມ ຊຶ່ງຮຽກຮ້ອງໃຫ້ນັກສໍາມະນາກອນທຸກຄົນ ຈົ່ງໄດ້ເອົາໃຈໃສ່ສຶກສາຮໍ່າຮຽນບັນດາບົດຮຽນ ຕະຫຼອດໄລຍະອົບຮົມນີ້ ເພື່ອໃຫ້ມີຄວາມເຂົ້າໃຈ ຢ່າງເລິກເຊິ່ງ ແລະ ສາມາດນຳໄປຈັດຕັ້ງປະຕິບັດຢູ່ຂັ້ນພື້ນຖານບ້ານ ໃຫ້ມີປະສິທິພາບຍິ່ງຂຶ້ນ.

ໂດຍ: ນັກຂ່າວເມືອງທຸລະຄົມ