ໃນກອງປະຊຸມ ທ່ານ ສົມບັດ ຈະເລີນມີໄຊ ໄດ້ຂນກ່າວເປີດກອງປະຊຸມຢ່າງເປັນທາງການພ້ອມທັງຜ່ານບົດລາຍງານການເມືອງທັງ 2 ພາກ ບາງຕອນທ່ານໃຫ້ຮູ້ວ່າ: ຕະຫຼອດໄລຍະ 5 ປີ ທີ່ຜ່ານມາ ອົງການແນວລາວສ້າງຊາດເມືອງ ໄດ້ເອົາໃຈໃສ່ຢ່າງຕັ້ງໜ້າ ໃນການເສີມຂະຫຍາຍມູນເຊື້ອອັນສະຫງ່າລາສີ ຂອງແນວລາວອິດສະຫຼະ ແລະ ແນວລາວຮັກຊາດໃນເມື່ອກ່ອນ, ສືບຕໍ່ເຮັດໜ້າທີ່ເປັນຄັນທຸງແຫ່ງການເຕົ້າໂຮມຄວາມສາມັກຄີທົ່ວປວງຊົນຢ່າງເປັນປຶກແຜ່ນແໜ້ນໜາ, ສົມທົບກັບອົງການຈັດຕັ້ງພາຄີ, ພາກສ່ວນຕ່າງໆ ໃນສັງຄົມເສີມຂະຫຍາຍສິດເປັນເຈົ້າຂອງປະຊາຊົນບັນດາເຜົ່າ ອະນຸລັກຮັກສາຮີດຄອງປະເພນີ ອັນດີງາມຂອງຊາດ, ຂອງເຜົ່າ ພ້ອມທັງປຸກລະດົມກໍາລັງແຮງໃນທົ່ວສັງຄົມ ເຂົ້າຮ່ວມຂະບວນການແຂ່ງຂັນຮັກຊາດ ແລະ ພັດທະນາ ຂະບວນການອື່ນໆ ສາມາດຍາດໄດ້ຜົນງານຫຼາຍດ້ານ; ໄດ້ເປັນຫຼັກແຫຼ່ງແກ່ນສານທີ່ມີຄວາມຕື່ນຕົວຈິງໃຈເຂົ້າຮ່ວມກັບຄະນະພັກອົງການປົກຄອງໃນການປັບປຸງກົງຈັກການຈັດຕັ້ງ ໃຫ້ສອດຄ່ອງກັບນິຕິກຳ ຮັບປະກັນດ້ານໂຄງປະກອບ ເພດ, ເຜົ່າ, ຮຸ່ນໝຸ່ມ, ກາງ ແລະ ອາວຸໂສ ຢູ່ພາຍໃນ. ປັດຈຸບັນ ການປັບປຸງການຈັດຕັ້ງແນວລາວສ້າງຊາດຂັ້ນບ້ານສຳເລັດ 100%. ມີຄະນະກໍາມະການແນວລາວສ້າງຊາດຂັ້ນບ້ານທັງໝົດ 1,673 ທ່ານ ຍິງ 436 ທ່ານ, ກໍາມະການແນວລາວສ້າງຊາດແຂວງ ປະຈໍາຢູ່ເມືອງ 5 ທ່ານ ຍິງ 1 ທ່ານ, ກໍາມະການແນວລາວສ້າງຊາດເມືອງ 102 ທ່ານ ຍິງ 11 ທ່ານ, ພະສົງ 1 ອົງ, ພະນັກງານແນວລາວສ້າງຊາດເມືອງ ມີ 10 ທ່ານ ຍິງ 4 ທ່ານ, ອາສາສະໜັກ 1 ທ່ານ ຍິງ 1 ທ່ານ; ປັດຈຸບັນ ຂະບວນການສ້າງຄອບຄົວ ແລະ ບ້ານສາມັກຄີປອງດອງ ສາມາດໄດ້ຢັ້ງຢືນເປັນບ້ານຂະບວນບ້ານສາມັກຄີປອງດອງ 75 ບ້ານ ເທົ່າກັບ 96.2%, ບໍ່ໄດ້ 3 ບ້ານ ເທົ່າກັບ 3.84%, ມີຄອບຄົວສາມັກຄີປອງດອງ 14,609 ຄອບຄົວ ເທົ່າກັບ 93,25%, ປະຕິບັດບໍ່ໄດ້ 1,056 ຄອບຄົວ,ເທົ່າກັບ 6.75% ແລະ ໄດ້ເປີດເມືອງສາມັກຄີປອງດອງໃນວັນທີ 31 ມີນາ 2021, ໄດ້ມອບໃບຍ້ອງຍໍຂອງທ່ານເຈົ້າເມືອງໃຫ້ຄອບຄົວສາມັກຄີປອງດອງ ທັງໝົດ 14,609 ຄອບຄົວ, ໄດ້ມອບໃບຍ້ອງຍໍຂອງທ່ານ ເຈົ້າແຂວງໄຊຍະບູລີ ໃຫ້ບ້ານ 69 ໃບ ທີ່ຮັກສາໄດ້ຂະບວນການສ້າງຄອບຄົວ ແລະ ບ້ານສາມັກຄີປອງດອງ; ຂຽນປະຫວັດເຜົ່າຄວາມເປັນມາຂອງເຜົ່າມົ້ງ ແລະ ວຽກງານອື່ນໆກໍມີຜົນສໍາເລັດ. ຈາກນັ້ນ, ທ່ານ ເສນ ພັນລັກ ເລຂາຄະນະບໍລິຫານງານພັກເມືອງ ວ່າການເຈົ້າເມືອງ ໄດ້ມີຄຳເຫັນກ່ອນການດຳເນີນກອງປະຊຸມຄັ້ງປະຖົມມະລຶກ, ພ້ອມທັງສະເໜີລາຍຊື່ ແລະ ຜ່ານລາຍຊື່ເປົ້າໝາຍ ກຳມະການແນວລາວສ້າງຊາດເມືອງຊຸດໃໝ່ ຈຳນວນ 112 ທ່ານ ຍິງ 12 ທ່ານ. ໃນນີ້, ມີພະສົງ 2 ອົງ, ກອງປະຊຸມຄັ້ງປະຖົມມະລືກໄດ້ເປັນເອກະສັນເລືອກເອົາທ່ານ ສົມບັດ ຈະເລີນມີໄຊເປັນປະທານ ແນວລາວສ້າງຊາດເມືອງ, ທ່ານ ນາງ ຂັນທອງ ແສນສາລີ ແລະ ທ່ານ ຂັນທອງ ວິໄລສັກ ເປັນຮອງປະທານ, ຮັບຮອງເອົາທ່ານ ນາງ ຂັນທອງ ແສນສາລີ ເປັນປະທານກວດກາ, ທ່ານ ນາງ ບຸນລ່ອງ ພັນທະວົງ ເປັນຮອງປະທານກວດກາ, ທ່ານ ກົງຕຽນ ວົງພະຈັນ ເປັນຜູ້ຊ່ວຍຜູ້ກວດກາ.
(ຂ່າວ-ພາບ: ສົມພົງ ສີສະຫວັດ)
ຄໍາເຫັນ