ຫົວໜ້າ-ຮອງຫົວໜ້າພະແນກສຶກສາທິການ ແລະ ກິລາ ນວ ເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງຫົວໜ້າຫ້ອງການສຶກສາທິການ ແລະ ກິລາເມືອງ, ຄະນະອຳນວຍການໂຮງຮຽນມັດທະຍົມຕອນປາຍທັງພາກລັດ ແລະ ເອກະຊົນ, ຜູ້ປົກຄອງ ແລະ ນັກຮຽນເຂົ້າຮ່ວມ.
ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນວ ໄດ້ລາຍງານຜົນການສອບເສັງໃຫ້ຮູ້ວ່າ: ທົ່ວ ນວ ມີໂຮງຮຽນມັດທະຍົມສຶກສາທັງໝົດ 197 ແຫ່ງ, ໃນນັ້ນໂຮງຮຽນເອກະຊົນ 90 ແຫ່ງ, ໂຮງຮຽນລັດ 106 ແຫ່ງ, ໂຮງຮຽນທີ່ມີຊັ້ນ ມ.4 ມີ 175 ແຫ່ງ ເພີ່ມຂຶ້ນ 4 ແຫ່ງ, ໂຮງຮຽນທີ່ມີຊັ້ນ ມ.7 ມີ 114 ແຫ່ງເພີ່ມຂຶ້ນ 6 ແຫ່ງ, ມີນັກຮຽນ ມ.7 ທັງໝົດ 9.365 ຄົນ ຍິງ 4.838 ຄົນ.
ສໍາລັບນັກຮຽນທີ່ມີລາຍຊື່ເຂົ້າສອບເສັງສົກຮຽນ 2023-2024 ມີທັງໝົດ 9.365 ຄົນ ຍິງ 4.847 ຄົນ,ມາສອບເສັງຕົວຈິງ 9.352 ຄົນ ຍິງ 4.833 ຄົນ, ຜົນການສອບເສັງໄດ້ຄະແນນ5 ຂຶ້ນໄປທຸກວິຊາ 5.350 ຄົນ ເທົ່າກັບ 57,21%, ນັກຮຽນທີ່ມີຄະແນນ 7 ຂຶ້ນໄປທຸກວິຊາ3.474 ຄົນ ເທົ່າກັບ 37,15%, ນັກຮຽນເສັງໄດ້ຄະແນນ 9 ຂຶ້ນໄປທຸກວິຊາ 57 ຄົນ ເທົ່າກັບ 0,61%, ນັກຮຽນມີຄະແນນສະເລ່ຍ 9 ຂຶ້ນໄປ 3 ຄົນ ເທົ່າກັບ 0,03% ແລະ ນັກຮຽນທີ່ໄດ້ຮັບໃບປະກາສະນີຍະບັດແດງທັງໝົດ 60 ຄົນ ຍິງ 49 ຄົນ.
ໃນພິທີໄດ້ມອບໃບຢັ້ງຢືນໃຫ້ຄູຊັ້ນ ມ.4 ແລະ ມ.7 ທີ່ໄດ້ຮັບຕໍາແໜ່ງຄູປະສົບການ, ມອບລາງວັນໃຫ້ຄູບໍາລຸງນັກຮຽນເກັ່ງທີ່ສາມາດຍາດໄດ້ນັກຮຽນເກັ່ງລະດັບຊາດ, ມອບລາງວັນໃຫ້ນັກຮຽນເກັ່ງລະດັບຊາດຊັ້ນ ມ.4 ແລະ ມ.7, ມອບໃບຍ້ອງຍໍຂັ້ນຕ່າງໆໃຫ້ນັກຮຽນທີ່ໄດ້ຄະແນນສະເລ່ຍຮອບດ້ານ 7 ຂຶ້ນໄປທຸກວິຊາ ແລະ ພາກສ່ວນຕ່າງໆທີ່ໃຫ້ການສະໜັບສະໜູນ.
ໂອກາດນີ້, ທ່ານຮອງເຈົ້າຄອງ ນ.ວ ໄດ້ໂອ້ລົມວ່າ:ເພື່ອຮັບປະກັນເຮັດໃຫ້ຜົນການຈັດຕັ້ງປະຕິບັດແຜນພັດທະນາຂະແໜງການສຶກສາ ເວົ້າລວມ ເວົ້າສະເພາະແຜນພັດທະນາຂອງພະແນກສຶກສາທິການ ແລະ ກິລາໃນຕໍ່ໜ້າໄດ້ຮັບຜົນສຳເລັດທີ່ດີມີຄຸນນະພາບ, ມີຄວາມສະຫງົບປອດໄພໄດ້ຕາມຄາດໝາຍທີ່ວາງໄວ້ ໂດຍສະເພາະເພີ່ມທະວີການສຶກສາແນວຄິດໃຫ້ພະນັກງານຄູ-ອາຈານ ແລະ ນັກຮຽນໃຫ້ເຂົ້າໃຈ ແລະ ມີສະຕິຕໍ່ສະພາບການປັດຈຸບັນ ຕໍ່ກັບດ້ານທີ່ຍັງຄົງຄ້າງຄວາມຫຍຸ້ງຍາກໃຫ້ຖືເອົາບັນຫານີ້ເປັນຈຸດສຸມ ເພື່ອແກ້ໄຂໃຫ້ຖືກເປົ້າໝາຍ ໂດຍສະເພາະບັນຫາການປະລະການຮຽນ ແລະ ການຂາດແຄນຄູ.
ຂ່າວ-ພາບ: ສີພອນ
ຄໍາເຫັນ