ໂອກາດນີ້, ທ່ານ ສັນຕິສຸກ ສິມມາລາວົງ ໄດ້ລາຍງານຜົນສຳເລັດຂອງເຂົ້າຮ່ວມການແຂ່ງຂັນໃຫ້ຮູ້ວ່າ: ການແຂ່ງຂັນລາຍການນີ້ ມີທັງໝົດ 5 ປະເທດ ແລະ 6 ພາກສ່ວນ ຄື: ສປປ ລາວ, ຫວຽດນາມ, ໄທ, ກຳປູເຈຍ, ສປ ຈີນ ແລະ ທີມນັກກິລາແຂວງກວາງຊີ ເຈົ້າພາບ ມີການແຂ່ງຂັນທັງໝົດ 4 ລາຍການ ຄື: ທີມດ່ຽວຊາຍ, ທີມດ່ຽວຍິງ, ທີມສີ່ຄົນຊາຍ ແລະ ທີມສີ່ຄົນຍິງ, ປະເທດ ສປປ ລາວ ໄດ້ສົ່ງຄະນະ, ຄູຝຶກ, ກຳມະການ ແລະ ນັກກິລາ ເຂົ້າຮ່ວມທັງໝົດ 16 ຄົນ ຍິງ 6 ຄົນ. ຜ່ານການການແຂ່ງຂັນຕົວຈິງ ນັກກິລາທີມຊາດລາວ ສາມາດຍາດມາໄດ້ 2 ຫຼຽນຄຳຈາກທີມດ່ຽວຊາຍ ແລະ ທີມສີ່ຄົນຊາຍ, 1 ຫຼຽນເງິນ ຈາກທີມດ່ຽວຍິງ ແລະ 1 ຫຼຽນທອງ ຈາກທີມ 4 ຄົນຍິງ. ໄດ້ຮັບຂັນລາງວັນ ຈຳນວນ 4 ໜ່ວຍ ແລະ ເງິນລາງວັນລວມ ຈໍານວນ 21,600 ຢວນ (ສະກຸນເງິນຈີນ).
ແນວໃດກໍຕາມ, ຜົນສຳເລັດດັ່ງກ່າວ ກໍຍ້ອນໄດ້ຮັບການນຳພາ-ຊີ້ນຳຈາກຂັ້ນເທິງ ແລະ ໃຫ້ການຊ່ວຍເຫຼືອ ທາງດ້ານງົບປະມານເງິນແຮບຸກຄົນ ແລະ ອຳນວຍຄວາມສະດວກຈາກກະຊວງສຶກສາທິການ ແລະ ກິລາ, ຍ້ອນມີມິດຕະພາບອັນດີ ແລະ ການປະສານງານກັນຢ່າງກົມກຽວ ກັບປະເທດເຈົ້າພາບ (ສປ ຈີນ) ເຮັດໃຫ້ໄດ້ຮັບການຊ່ວຍເຫຼືອທາງດ້ານງົບປະມານເຂົ້າຮ່ວມການແຂ່ງຂັນ ໂດຍສະເພາະການເດີນທາງໄປ-ກັບລະຫວ່າງປະເທດ ຊຶ່ງເປັນຂໍ້ສະດວກອັນສຳຄັນໃນການເຂົ້າຮ່ວມການແຂ່ງຂັນ ແລະ ໄດ້ຮັບການນຳພາ ແລະ ໃຫ້ທິດຊີ້ນໍາຂອງຄະນະບໍລິຫານງານສະຫະພັນກິລາກະຕໍ້ ແລະ ຊິນລອນແຫ່ງຊາດ ສ້າງຈິດໃຈຊາດ ແລະ ຄວາມສູ້ຊົນ ເຮັດໃຫ້ນັກກິລາໄດ້ສະແດງອອກຄວາມສາມາດ ແລະປະສົບຜົນສຳເລັດ ໃນເວທີລະດັບພາກພື້ນ ແລະ ສາກົນ ເຮັດໃຫ້ເອກອ້າງຄວາມເປັນຊາດ ແລະ ສ້າງກຽດຊື່ສຽງມາສູ່ປະເທດຊາດ.
ໂອກາດດຽວກັນ, ທ່ານລັດຖະມົນຕີ ກະຊວງ ສສກ ກໍໄດ້ຕີລາຄາສູງຕໍ່ຜົນງານດັ່ງກ່າວ ຊຶ່ງເປັນກຽດສັກສີ ແລະ ຊື່ສຽງມາສູ່ປະເທດຊາດ. ສະນັ້ນ, ຂໍໃຫ້ຄະນະບໍລິຫານງານສະຫະພັນ ຈົ່ງສືບຕໍ່ຮັກສາມູນເຊື້ອ ພ້ອມກັນເສີມຂະຫຍາຍສ້າງຜົນງານໃຫ້ປະເທດຊາດຢ່າງຕໍ່ເນື່ອງ ແລະ ໃນຕໍ່ໜ້ານີ້ ຈົ່ງພະຍາຍາມສືບຕໍ່ສົ່ງເສີມກິລາມວນຊົນ ແລະ ກິລາ ທີ່ປັນປາຍແຫຼມຂອງລາວ ເຕີບໃຫຍ່ເຂັ້ມແຂງ ສາມາດໄປແຂ່ງຂັນໃນລະດັບອະນຸພາກພື້ນ, ພາກພື້ນ ແລະ ສາກົນ ຢ່າງມີຜົນສຳເລັດຕາມຈຸດປະສົງທີ່ວາງໄວ້.
(ພາບ-ຂ່າວ: ບຸນທະວີ ນະວົງສາ)
ຄໍາເຫັນ