ໜັງສືພິມກອງທັບ ເຕີບໃຫຍ່ເຂັ້ມແຂງ ແລະ ທັນສະໄໝ

ປັດຈຸບັນ, ໜັງສືພິມກອງທັບ ເປັນກອງເອກະລາດ ແລະ ເປັນກອງວິຊາສະເພາະເຮັດໜ້າທີ່ສື່ມວນຊົນ, ຜະລິດສື່ສິ່ງພິມ ແລະ ສື່ເອເລັກໂຕຣນິກ ທີ່ຢູ່ພາຍໃຕ້ການຊີ້ນໍາໂດຍກົງຮອບດ້ານ ຂອງກົມໃຫຍ່ການເມືອງກອງທັບ ແລະ ຊີ້ນໍາດ້ານເນື້ອໃນທິດທາງການໂຄສະນາຈາກກົມໂຄສະນາອົບຮົມ, ມີພາລະບົດບາດໜ້າທີ່ເປັນກະບອກສຽງຂອງຄະນະພັກກະຊວງປ້ອງກັນປະເທດ ໃນການເຄື່ອນໄຫວວຽກງານແນວຄິດ-ວັດທະນະທໍາຢູ່ໃນກອງທັບ ດ້ວຍການໂຄສະນາເຜີຍແຜ່ແນວທາງນະໂຍບາຍຂອງພັກ,ລະບຽບກົດໝາຍຂອງລັດ, ສຶກສາອົບຮົມໃຫ້ປະຊາຊົນບັນດາເຜົ່າມີແນວຄິດ ແລະ ການກະທໍາທີ່ຖືກຕ້ອງຕາມແນວທາງຂອງພັກ, ສ່ອງແສງຄວາມມຸ່ງມາດປາຖະໜາຂອງມະຫາຊົນ, ການພັດທະນາເສດຖະກິດ-ສັງຄົມ, ສ່ອງແສງວຽກດີຄົນເດັ່ນວຽກຈິງຄົນແທ້, ປະກອບສ່ວນຕ້ານປະກົດການຫຍໍ້ທໍ້ຕ່າງໆໃນສັງຄົມ,ຕອບໂຕ້ການໂຄສະນາບິດເບືອນໃສ່ຮ້າຍປ້າຍສີຂອງພວກອິດທິກໍາລັງປໍລະປັກ. ນອກນີ້, ຍັງເປັນເວທີໃຫ້ແກ່ມະຫາຊົນໃນການສະແດງອອກເຖິງວິໄສທັດອັນກວ້າງໄກຂອງພັກ ຕໍ່ອະນາຄົດອັນໃສແຈ້ງຂອງປະເທດຊາດ, ເປັນແຫຼ່ງຂໍ້ມູນຂ່າວສານ, ສາລະໜ້າຮູ້ ແລະ ຄວາມບັນເທີງ. ຍ້ອນແນວນັ້ນ, ໃນໄລຍະຜ່ານມາ ກໍຄືປັດຈຸບັນ ໜັງສືພິມກອງທັບປະຊາຊົນລາວ ໄດ້ເອົາໃຈໃສ່ພັດທະນາຕົນເອງຢູ່ສະເໝີ ດ້ວຍການປັບປຸງຮູບແບບການໂຄສະນາໃຫ້ມີຫຼາຍຊ່ອງທາງ, ໄດ້ປັບປຸງບັນດາຄໍລໍາໃຫ້ແທດເໝາະກັບສະພາບການ, ດ້ານເນື້ອໃນສັ້ນ-ກະທັດຮັດ ມີຂໍ້ມູນຄົບຖ້ວນ ແລະ ເລິກເຊິ່ງ ສ່ອງແສງໄດ້ຂະບວນການປົກປັກຮັກສາ ແລະ ສ້າງສາພັດທະນາປະເທດຊາດ, ການເຕີບໃຫຍ່ຂະຫຍາຍຕົວຂອງກອງທັບຕາມທິດສ້າງກອງທັບໃຫ້ມີລະບຽບແບບແຜນ ແລະ ທັນສະໄໝ ໂດຍເລັ່ງໃສ່ຂະບວນການສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ, ການສ້າງກົມກອງວັດທະນະທໍາ-ນັກຮົບວັດທະນະທໍາ, ຂະບວນການຮໍ່າຮຽນການເມືອງ, ຝຶກແອບການທະຫານ, ຂະບວນການປັບປຸງກໍ່ສ້າງກົມກອງໃນການທໍາການຜະລິດແກ້ໄຂຊີວິດການເປັນຢູ່ຂອງພະນັກງານ-ນັກຮົບ ແລະ ຂະບວນການອື່ນໆ ທີ່ປິ່ນອ້ອມ 4 ໜ້າທີ່ໃຫຍ່ 26 ແຜນງານທີ່ກະຊວງປ້ອງກັນປະເທດວາງອອກ ຊຶ່ງໃນປີຜ່ານມາສາມາດສະໜອງຂ່າວພາຍໃນໄດ້ 8,768 ຂ່າວ, ຂ່າວຕ່າງປະເທດ 2,215 ຂ່າວ, ບົດ 1,863 ບົດ, ຮູບພາບ 15,270 ຮູບ ແລະ ເຄື່ອນໄຫວວຽກງານອື່ນໆ.

ທ່ານ ພັນໂທ ຄອນສະຫວັນ ໄຊຍະລາດ ໄດ້ກ່າວຕື່ມວ່າ: ເພື່ອເຮັດສໍາເລັດໜ້າທີ່ການເມືອງຂອງຕົນໃນຕໍ່ໜ້ານີ້, ໜັງສືພິມກອງທັບ ຈະສືບຕໍ່ເອົາໃຈໃສ່ບໍາລຸງ ແລະ ກໍ່ສ້າງບຸກຄະລາກອນສື່ມວນຊົນຂອງຕົນໃຫ້ມີຄວາມຮູ້, ຄວາມສາມາດ, ມີລະດັບວິຊາສະເພາະທີ່ດີເດັ່ນ, ມີຄວາມຮູ້ທາງດ້ານທິດສະດີການເມືອງ ແລະ ຄຸນສົມບັດສິນທໍາປະຕິວັດ, ມີຈັນຍາບັນ ແລະ ມີຄວາມເສຍສະຫຼະ. ປັບປຸງທາງດ້ານເນື້ອໃນໃຫ້ມີຄວາມອຸດົມສົມບູນ ໂດຍນໍາສະເໜີບັນຫາທີ່ສັງຄົມໃຫ້ຄວາມສົນໃຈເພີ່ມຂຶ້ນ, ຮັບປະກັນຄວາມຖືກຕ້ອງຊັດເຈນ, ບໍ່ຜິດພາດທາງດ້ານການເມືອງ, ສະເໜີຂ່າວໃຫ້ວ່ອງໄວທັນເວລາ, ປັບປຸງວີທີການນໍາສະເໜີຂ່າວ, ຮູບແບບໂຄງສ້າງຂ່າວທີ່ກະທັດຮັດກົງກັບປະເດັນ, ຫຼາກຫຼາຍ, ປະດິດສ້າງ ແລະ ຊວນອ່ານ; ສ້າງນັກຂ່າວຢູ່ບັນດາກົມກອງທ້ອງຖິ່ນໃຫ້ມີລະດັບການຂຽນໃຫ້ດີຂຶ້ນເລື້ອຍໆ ແລະ ສົ່ງຂ່າວປ້ອນໜັງສືພິມກອງທັບໃຫ້ຫຼາຍຂຶ້ນ; ປັບປຸງ ແລະ ກໍ່ສ້າງພື້ນຖານໂຄງລ່າງ ວັດຖຸເຕັກນິກດ້ານສື່ມວນຊົນໃຫ້ມີຄວາມເຂັ້ມແຂງ, ທັນສະໄໝ ໂດຍສະເພາະແມ່ນສື່ເອເລັກໂຕຣນິກ.

ເນື່ອງໃນໂອກາດວັນສື່ມວນຊົນ ແລະ ການພິມຈຳໜ່າຍ ຄົບຮອບ 76 ປີ, ຕາງໜ້າຄະນະບັນນາທິການ ແລະ ພະນັກງານ-ນັກຂ່າວ ໜັງສືພິມກອງທັບປະຊາຊົນລາວ ຂໍອວຍພອນອັນປະເສີດແດ່ຜູ້ນຳພັກ-ລັດ, ການນຳກະຊວງປ້ອງກັນປະເທດ ແລະ ປະຊາຊົນລາວບັນດາເຜົ່າທຸກຖ້ວນໜ້າ ຈົ່ງມີສຸຂະພາບແຂງແຮງ, ສືບຕໍ່ນໍາພາ-ຊີ້ນໍາ ແລະ ພັດທະນາສື່ມວນຊົນລາວໃຫ້ກ້າວຂຶ້ນ, ສື່ມວນຊົນກອງທັບປະຊາຊົນລາວ ຈະສືບຕໍ່ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມມັ່ງຄັ່ງເຂັ້ມແຂງ, ສັງຄົມມີຄວາມສະຫງົບສຸກ, ເສດຖະກິດຂະຫຍາຍຕົວດີຂຶ້ນຢ່າງຕໍ່ເນື່ອງ, ວັດທະນະທຳ-ສັງຄົມ ໄດ້ຮັບການອະນຸລັກຮັກສາ ແລະ ຊີວິດຄວາມເປັນຢູ່ຂອງປະຊາຊົນນັບມື້ດີຂຶ້ນເປັນກ້າວໆ.