ນາຍົກລັດຖະມົນຕີ ແຫ່ງ ສປ ລາວ ພົບປະກັບ ປະທານາທິບໍດີ ແຫ່ງ ສປ ຕີມໍ-ເລັດສະເຕ

ໃນຕອນບ່າຍຂອງວັນທີ 29 ກຸມພາ ນີ້ ທີ່ ຫ້ອງວ່າການສໍານັກງານນາຍົກລັດຖະມົນຕີ ໄດ້ມີການພົບປະລະຫວ່າງ ພະນະທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ແລະ ພະນະທ່ານ ໂຈເຊ ຣາໂມສ ອໍຕ້າ ປະທານາທິບໍດີ ແຫ່ງ ສປ ຕີມໍ-ເລັດສະເຕ ຊຶ່ງ ພະນະທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການຢ້ຽມຢາມທາງລັດຖະກິດ ຢູ່ ສປປ ລາວ ຄັ້ງນີ້ ຂອງ ຝ່າຍຕີມໍ-ເລັດສະເຕ ອັນໄດ້ກາຍເປັນຂີດໝາຍທີ່ສໍາຄັນສໍາລັບການສົ່ງເສີມການພົວພັນ ແລະ ການຮ່ວມມືຂອງສອງປະເທດ ສປປ ລາວ ແລະ ຕີມໍ-ເລັດສະເຕ ໃຫ້ມີບາດກ້າວຂະຫຍາຍຕົວຍິ່ງຂຶ້ນໃນຕໍ່ໜ້າ.
ພະນະທ່ານ ສອນໄຊ ສີພັນດອນ ໄດ້ສະແດງຄວາມຊົມເຊີຍ ຕີມໍ-ເລັດສະເຕ ທີ່ໄດ້ຮັບການຮັບຮອງເຂົ້າເປັນສະມາຊິກຂອງອົງການການຄ້າໂລກ (ອົງການ WTO) ແລະ ສະແດງຄວາມຫວັງວ່າ ສອງລັດຖະບານ ລາວ ແລະ ຕີມໍ-ເລັດສະເຕ ຈະໄດ້ເຮັດວຽກຮ່ວມກັນຢ່າງໃກ້ຊິດ ໃນການສົ່ງເສີມການຮ່ວມມືດ້ານການຄ້າສອງຝ່າຍ ໃຫ້ມີບາດກ້າວຂະຫຍາຍຕົວຍິ່ງຂຶ້ນ.
ສອງຝ່າຍ ໄດ້ຕີລາຄາສູງຕໍ່ຜົນການພົບປະສອງຝ່າຍ ລະຫວ່າງ ພະນະທ່ານ ທອງລຸນ ສີສຸລິດ ປະທານປະເທດ ແລະ ພະນະ ທ່ານ  ໂຈເຊ ຣາໂມສ ອໍຕ້າ ປະທານາທິບໍດິ ທີ່ໄດ້ຈັດຂຶ້ນໃນຕອນເຊົ້າຂອງວັນດຽວກັນ ແລະ ຜົນສໍາເລັດຂອງການລົງນາມເອກະສານແລກປ່ຽນ 2 ເອກະສານ ຄື: ສັນຍາ ວ່າດ້ວຍ ການຮ່ວມມືດ້ານເສດຖະກິດ, ການຄ້າ ແລະ ເຕັກນິກ ແລະ ໜັງສືສະແດງເຈດຈໍານົງ (Letters Of Intent) ໃນການແລກປ່ຽນທີ່ດິນສໍາລັບສະຖານທູດຂອງສອງປະເທດ ໃນອະນາຄົດອັນໃກ້ນີ້. ສອງຝ່າຍ ໄດ້ເຫັນດີເປັນເອກະພາບໃນການປະສານສົມທົບກັນຢ່າງໃກ້ຊິດ ເພື່ອຊຸກຍູ້ສົ່ງເສີມການແລກປ່ຽນການຢ້ຽມຢາມຊຶ່ງກັນ ແລະ ກັນຂອງການນໍາຂັ້ນສູງຂອງສອງປະເທດ, ການສົ່ງເສີມການຮ່ວມມືດ້ານການຄ້າ ແລະ ການໄປມາຫາສູ່ຂອງປະຊາຊົນສອງຊາດ ລາວ ແລະ ຕີມໍ-ເລັດສະເຕ ໃຫ້ມີບາດກ້າວຂະຫຍາຍຕົວຍິ່ງຂຶ້ນ, ລວມທັງການແລກປ່ຽນຂອງພາກທຸລະກິດຂອງສອງຝ່າຍ ເພື່ອສຶກສາທ່າແຮງໃນການສົ່ງເສີມການລົງທຶນຂອງສອງປະເທດໃນຕໍ່ໜ້າອີກດ້ວຍ. ພ້ອມດຽວກັນນັ້ນ, ສອງຝ່າຍ ຍັງໄດ້ຢືນຢັນຄືນຄວາມສໍາຄັນຂອງການສ້າງຕັ້ງ ຄະນະກໍາມະການຮ່ວມ ວ່າດ້ວຍ ການຮ່ວມມືສອງຝ່າຍ ເພື່ອເປັນກົນໄກໃນການປຶກສາຫາລືໃນການສົ່ງເສີມການຮ່ວມມືສອງຝ່າຍ ກໍຄືການຊຸກຍູ້ການຈັດຕັ້ງປະຕິບັດບັນດາແຜນງານ ແລະ ຂອບການຮ່ວມມືຂອງສອງຝ່າຍ ໃຫ້ສໍາເລັດຜົນຕາມຄາດໝາຍ.
ພະນະທ່ານ ໂຈເຊ ຣາໂມສ ອໍຕ້າ ໄດ້ສະແດງຄວາມຂອບໃຈມາຍັງລັດຖະບານ ແລະ ປະຊາຊົນລາວ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ສໍາລັບການຢ້ຽຢາມທາງລັດຖະກິດ ຢູ່ ສປປ ລາວ ໃນຄັ້ງນີ້ ແລະ ສະແດງຄວາມພ້ອມທີ່ຈະສືບຕໍ່ເຮັດວຽກຢ່າງໃກ້ຊິດກັບ ລັດຖະບານ ສປປ ລາວ ເພື່ອສົ່ງເສີມການຮ່ວມມືຂອງສອງປະເທດ ສປ ຕີມໍ-ເລັດສະເຕ ແລະ ສປປ ລາວ ໃນຂະແໜງການຄ້າ ແລະ ການລົງທຶນຂອງສອງປະເທດໃຫ້ໄດ້ຮັບການພັດທະນາຂຶ້ນເປັນກ້າວໆ, ພ້ອມທັງໄດ້ຢືນຢັນຄືນທັດສະນະຂອງລັດຖະບານ ສປ ຕີມໍ-ເລັດສະເຕ ໃນການສືບຕໍ່ສະໜັບສະໜູນ ສປປ ລາວ ສໍາລັບການເປັນປະທານອາຊຽນ 2024 ໃຫ້ສໍາເລັດຜົນຕາມຄາດໝາຍ. ພ້ອມທັງໄດ້ຢືນຢັນຄືນທັດສະນະຂອງຕີມໍ-ເລັດສະເຕ ໃນການເຄົາລົບຄວາມເປັນເອກະສັນ (Consensus) ແລະ ຄວາມເປັນແກນກາງ (Centrality) ຂອງອາຊຽນ, ລວມທັງ 5 ຂໍ້ຕົກລົງຂອງຜູ້ນໍາອາຊຽນທີ່ໄດ້ຕົກລົງເຫັນດີຮ່ວມກັນໃນໄລຍະຜ່ານມາ. 
ສອງຝ່າຍ ຍັງໄດ້ແລກປ່ຽນຄໍາຄິດເຫັນກ່ຽວກັບບັນຫາພາກພື້ນ ແລະ ສາກົນທີ່ສອງຝ່າຍມີຄວາມສົນໃຈຮ່ວມກັນຈໍານວນໜຶ່ງ, ລວມທັງໄດ້ເຫັນດີເປັນເອກະພາບໃນການຮ່ວມມືກັນຢ່າງໃກ້ຊິດ ເພື່ອສືບຕໍ່ຊຸກຍູ້ສົ່ງເສີມການຮ່ວມມືເພື່ອການພັດທະນາຂອງຂອບການຮ່ວມມືອາຊຽນໃນຕໍ່ໜ້າ. 
(ຂ່າວ: ກົມ ອປອ, ກະຊວງການຕ່າງປະເທດ)