ນາຍົກລັດຖະມົນຕີ ຕິດຕາມຊຸກຍູ້ວຽກງານ ຢູ່ແຂວງໄຊຍະບູລີ

 ຢູ່ແຂວງໄຊຍະບູລີ ໂດຍມີທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມດ້ວຍການນຳແຂວງ, ເມືອງ ແລະ ພາກສ່ວນທີ່ກ່ຽວຂ້ອງ ໃຫ້ການຕ້ອນຮັບ.

ການຢ້ຽມຢາມແຂວງໄຊຍະບູລີຄັ້ງນີ້, ທ່ານນາຍົກລັດຖະມົນຕີ ໄດ້ເຄື່ອນໄຫວຢ້ຽມຢາມພື້ນທີ່ການຜະລິດຂອງປະຊາຊົນ ຢູ່ເມືອງໄຊຍະບູລີ ເປັນຕົ້ນ ຟາມລ້ຽງໄກ່ພັນໄຂ່ ໂລລິ່ນ ທີ່ບ້ານລ້ອງປໍ ແລະ ການປູກເຂົ້ານາປີ ທີ່ບ້ານດອນເງິນ. ຫຼັງຈາກນັ້ນ ກໍໄດ້ພົບປະໂອ້ລົມ ຕໍ່ການນຳຫຼັກແຫຼ່ງຂອງແຂວງ ທີ່ຫ້ອງວ່າການແຂວງໄຊຍະບູລີ. ກ່ອນອື່ນ ແມ່ນໄດ້ຟັງການລາຍງານ ກ່ຽວກັບສະພາບການພັດທະນາເສດຖະກິດ-ສັງຄົມ ທີ່ພົ້ນເດັ່ນຂອງແຂວງ ຕິດພັນກັບການຈັດຕັ້ງປະຕິບັດ ບັນດາມາດຕະການ ກໍຄື ນິຕິກຳ ກ່ຽວກັບການແກ້ໄຂບັນຫາເຄັ່ງຮ້ອນ ທາງດ້ານເສດຖະກິດ-ການເງິນ ໄລຍະ 6 ເດືອນຕົ້ນປີ 2024 ເຫັນວ່າ ໃນສະພາບການສາກົນ ແລະ ພາກພື້ນ ຍັງສືບຕໍ່ຜັນແປຢ່າງສັບສົນ ຊຶ່ງໄດ້ສົ່ງຜົນກະທົບໂດຍທາງກົງ ແລະ ທາງອ້ອມ ຕໍ່ກັບການພັດທະນາເສດຖະກິດ-ສັງຄົມ ຂອງປະເທດເຮົາ ໂດຍສະເພາະໄພເງິນເຟີ້, ລາຄານໍ້າມັນເຊື້ອໄຟ ແລະ ສິນຄ້າແພງ, ຄ່າຄອງຊີບສູງ,ບວກກັບໄພທຳມະຊາດ, ການລະບາດພະຍາດຄົນ-ສັດ ແລະ ປະກົດການຫຍໍ້ທໍ້ດ້ານຕ່າງໆ. ແຕ່ພາຍໃຕ້ການນຳພາ-ຊີ້ນໍາຢ່າງຕັ້ງໜ້າ ຂອງຄະນະພັກ ແລະ ອົງການປົກຄອງແຕ່ລະຂັ້ນ ບວກກັບຄວາມຮັບຜິດຊອບເປັນເຈົ້າການສູງ ຂອງປະຊາຊົນບັນດາເຜົ່າ ແລະ ຜູ້ປະກອບການພາຍໃນແຂວງ ເຮັດໃຫ້ທົ່ວແຂວງ ສືບຕໍ່ຮັກສາໄດ້ສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບປອດໄພ ແລະ ເປັນລະບຽບຮຽບຮ້ອຍໂດຍພື້ນຖານ; ເສດຖະກິດຂະຫຍາຍຕົວໃນລະດັບ 5,5%,ລວມຍອດຜະລິດຕະພັນພາຍໃນ 15.762 ຕື້ກີບ, ສະເລ່ຍຕໍ່ຫົວຄົນໃຫ້ໄດ້ 36,93ລ້ານກີບ, ການຈັດເກັບລາຍຮັບເຂົ້າງົບປະມານ ປະຕິບັດໄດ້ທັງໝົດ 1.668,48 ຕື້ກີບ, ເທົ່າກັບ 79,74% ຂອງແຜນການ, ການຈັດຕັ້ງປະຕິບັດແຜນລາຍຈ່າຍ ໄດ້416,51ຕື້ກີບ, ເທົ່າກັບ71,11%ຂອງແຜນການປີ;ສາມາດສົ່ງອອກສິນຄ້າທັງໝົດ ມີມູນຄ່າ 57,47 ລ້ານໂດລາ, ເທົ່າກັບ 60,32% ຂອງແຜນປີ ຊຶ່ງສ່ວນຫຼາຍແມ່ນພືດກະສິກໍາ; ການລະດົມແຫຼ່ງທຶນ ເພື່ອການພັດທະນາ; ມີການລົງທຶນທົ່ວສັງຄົມ ມີທັງໝົດ 2.296,34 ຕື້ກີບ ເທົ່າກັບ 53,95% ຂອງແຜນການ; ການຜະລິດພາຍໃນ ແລະ ການລ້ຽງສັດແບບເປັນກຸ່ມເປັນຟາມ ມີທ່າອ່ຽງເພີ່ມຂຶ້ນ; ສາມາດຈຳກັດການນຳເຂົ້າສິນຄ້າ ທີ່ພາຍໃນສາມາດຜະລິດໄດ້ ຫຼາຍສົມຄວນ; ອັນພົ້ນເດັ່ນ ສາມາດຊຸກຍູ້ໃຫ້ມີການສ້າງຕັ້ງໂຮງງານປຸງແຕ່ງ ຄື: ໂຮງງານແປ້ງມັນຕົ້ນ, ໂຮງງານປຸງແຕ່ງຂັ້ນຕົ້ນຢາງພາລາ, ໂຮງງານເສັ້ນໝີ່-ເສັ້ນເຝີ, ໂຮງງານອົບຜົນຜະລິດກະສິກຳ ແລະໂຮງງານຂ້າສັດ ເພີ່ມຂຶ້ນຈຳນວນໜຶ່ງ; ສໍາລັບດ້ານວັດທະນະທຳ-ສັງຄົມ ກໍໄດ້ຮັບການປັບປຸງ ແລະ ພັດທະນາດີຂຶ້ນຢ່າງຕໍ່ເນື່ອງ.

ໃນໂອກາດນີ້,ທ່ານນາຍົກລັດຖະມົນຕີ ໄດ້ມີຄຳເຫັນພົບປະໂອ້ລົມ ຕໍ່ຜູ້ເຂົ້າຮ່ວມ ໂດຍໄດ້ແຈ້ງໃຫ້ຊາບ ກ່ຽວກັບຈຸດປະສົງຂອງການເຄື່ອນໄຫວເຮັດວຽກຢູ່ແຂວງໄຊຍະບູລີ ໃນຄັ້ງນີ້, ພ້ອມທັງ ສະເໜີຂະແໜງການກ່ຽວຂ້ອງຂອງແຂວງ ປະກອບຄຳເຫັນຕື່ມ ກ່ຽວກັບການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ ທີ່ຕິດພັນກັບຂະແໜງການຂອງຕົນ; ໄດ້ຍົກໃຫ້ເຫັນສະພາບການພົ້ນເດັ່ນ ທີ່ເກີດຂຶ້ນ ຢູ່ພາຍໃນ ແລະ ຕ່າງປະເທດ ໂດຍສະເພາະບັນດາປັດໄຈທີ່ສົ່ງຜົນກະທົບຕໍ່ການປົກປັກຮັກສາ ແລະ ພັດທະນາປະເທດຊາດ ພົບກັບຄວາມຫຍຸ້ງຍາກ, ລວມທັງ ຄວາມພະຍາຍາມ ແລະ ເອົາໃຈໃສ່ ແກ້ໄຂບັນຫາຄົງຄ້າງ, ຫຍຸ້ງຍາກຕ່າງໆ ຂອງສູນກາງພັກ ແລະ ລັດຖະບານ. ອັນສຳຄັນ, ທ່ານນາຍົກລັດຖະມົນຕີ ໄດ້ຊີ້ນຳໃຫ້ສືບຕໍ່ເອົາໃຈໃສ່ຕື່ມບາງດ້ານ ເປັນຕົ້ນ: ສືບຕໍ່ປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ; ແກ້ໄຂບັນຫາຢາເສບຕິດ ແລະ ປະກົດການຫຍໍ້ທໍ້ຕ່າງໆໃນສັງຄົມ ຕາມມາດຕະການທີ່ກຳນົດໄວ້ ໃຫ້ເຂັ້ມງວດ, ເດັດຂາດ ແລະ ຫຼຸດໜ້ອຍຖອຍລົງເປັນກ້າວໆ; ເຄັ່ງຄັດແກ້ໄຂບັນຫາສິນຄ້າ ແລະ ພາຫະນະ ທີ່ນຳເຂົ້າບໍ່ຖືກຕ້ອງ; ນຳໃຊ້ຄວາມສາມາດ ແລະ ທ່າແຮງບົ່ມຊ້ອນ ເຂົ້າໃນການພັດທະນາເສດຖະກິດ-ສັງຄົມຂອງແຂວງ ໃຫ້ເກີດປະໂຫຍດສູງສຸດ ບົນພື້ນຖານສອດຄ່ອງກັບແນວທາງຂອງພັກ ແລະ ນະໂຍບາຍຂອງລັດ; ເອົາໃຈໃສ່ຈັດຕັ້ງຜັນຂະຫຍາຍທິດຊີ້ນໍາຂອງພັກ ກໍຄື ມະຕິຕົກລົງ ໃນການສ້າງເສດຖະກິດເອກະລາດ ເປັນເຈົ້າຕົນເອງ ຕາມມະຕິ 05/ລບ ໃຫ້ປະກົດຜົນເປັນຮູບປະທຳຕົວຈິງ; ເອົາໃຈໃສ່ປັບປຸງສະພາບແວດລ້ອມ ໃນການດຳເນີນທຸລະກິດ ແລະ ການລົງທຶນ ໃຫ້ດີຂຶ້ນກວ່າເກົ່າ, ທັງຄຸ້ມຄອງບັນດາໂຄງການຂະໜາດໃຫຍ່ ໃຫ້ມີປະສິດທິຜົນ ແລະ ແກ້ໄຂໂຄງການທີ່ມີບັນຫາຄົງຄ້າງໃຫ້ສຳເລັດໂດຍໄວ; ເອົາໃຈໃສ່ຜັນຂະຫຍາຍນິຕິກຳຂອງຄະນະສະເພາະກິດ 19/ກມສພ ກໍຄືລັດຖະບານ ໂດຍສະເພາະ ບັນດາວຽກຈຸດສຸມ ໃຫ້ມີການຫັນປ່ຽນ ໃນທ່ວງທ່າດີຂຶ້ນກວ່າເກົ່າ; ສືບຕໍ່ກະກຽມສະເຫຼີມສະຫຼອງ 3 ວັນປະຫວັດສາດ ໃນປີ 2025 (70 ປີ ວັນສ້າງຕັ້ງພັກ, 50 ປີ ວັນສະຖາປະນາ ສປປ ລາວ ແລະ 105 ປີ ວັນຄ້າຍວັນເກີດຂອງປະທານໄກສອນ ພົມວິຫານ) ຕິດພັນກັບການກະກຽມ ແລະ ດໍາເນີນກອງປະຊຸມໃຫຍ່ 3 ຂັ້ນຂອງພັກ ໃຫ້ໄດ້ຮັບຜົນສໍາເລັດຢ່າງຈົບງາມ; ສຸມໃສ່ປະຕິບັດບັນດາໜ້າວຽກຈຸດສຸມ ໃນ 6 ເດືອນທ້າຍປີ 2024 ທີ່ກໍານົດໄວ້ ໃນມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 8 ສະໄໝທີ XI ແລະ ຄວາມຮັບຜິດຊອບຂອງແຂວງ ທີ່ກໍານົດໄວ້ ໃນມະຕິກອງປະຊຸມລັດຖະບານ ເປີດກວ້າງ ຄັ້ງທີ Iປະຈຳປີ 2024; ເອົາໃຈໃສ່ແກ້ໄຂບັນຫາຄູອາສາສະໝັກ, ການຂາດເຂີນຄູສອນ ແລະ ການຂາດຮຽນຂອງນັກຮຽນ ໂດຍການປະຕິບັດນະໂຍບາຍ ຕາມມະຕິ ເລກທີ 09/ລບ ໃຫ້ມີປະສິດທິຜົນຕົວຈິງຫຼາຍຂຶ້ນ.

ຂ່າວ-ພາບ: ກົມປະຊາສຳພັນ ຫສນຍ