ນາຍົກລັດຖະມົນຕີ ຊີ້ນຳວຽກງານ ຢູ່ຕາແສງຕຸ້ມລານ

ຕາແສງຕຸ້ມລານ ເປັນ 1 ໃນ 4 ຕາແສງ ທີ່ຂຶ້ນກັບເມືອງຕຸ້ມລານ ມີເນື້ອທີ່ທັງໝົດ 180 ກິໂລຕາແມັດ, ປະກອບມີ 12 ບ້ານ, 2,953 ຄອບຄົວ, ພົນລະເມືອງທັງໝົດ 12,312 ຄົນ, ໃນນັ້ນ ມີເຜົ່າກະຕາງ ກວມ 98% ແລະ ເຜົ່າລາວ ກວມ 2%; ປະຊາຊົນ 90% ແມ່ນຍຶດຖືການຜະລິດກະສິກໍາ ເປັນອາຊີບຕົ້ນຕໍ; ສະພາບພູມສັນຖານສ່ວນໃຫຍ່ເປັນທົ່ງພຽງ ກວມ 85%, ມີທ່າແຮງດ້ານການທ່ອງທ່ຽວທາງທຳມະຊາດ ແລະ ວັດທະນະທຳ ເປັນຕົ້ນແມ່ນ ນ້ຳຕົກຕາດຫ້ວຍປູນ, ວັດປ່າຫາງນົກຍຸງ ແລະ ເຮືອນຍາວບູຮານເຜົ່າກະຕາງ. ປັດຈຸບັນ ພາຍໃນຕາແສງ ແມ່ນສຳເລັດ ການປະກອບບຸກຄະລາກອນ ເຂົ້າໃນຄະນະກຳມະການປົກຄອງ ຊຶ່ງມີທັງໝົດ 10 ທ່ານ ໄດ້ເຂົ້າປະຈໍາການ ແລະ ເຄື່ອນໄຫວວຽກງານຢ່າງເປັນປົກກະຕິ. ພ້ອມກັນນັ້ນ, ດ້ານໂຄງລ່າງພື້ນຖານຕາແສງ ແມ່ນສຳເລັດການປັບປຸງອາຄານສຳນັກງານ, ຕິດຕັ້ງປ້າຍຫ້ອງການ ແລະ ສະໜອງອຸປະກອນຮັບໃຊ້ ການບໍລິການຜ່ານປະຕູດຽວ ເພື່ອຮັບປະກັນໃຫ້ການບໍລິການປະຊາຊົນ ແລະ ການຄຸ້ມຄອງບໍລິຫານວຽກງານ ມີຄວາມສະດວກ, ວ່ອງໄວ ແລະ ມີປະສິດທິຜົນສູງ.

ໃນໂອກາດດັ່ງກ່າວ, ທ່ານ ນາຍົກລັດຖະມົນຕີ ໄດ້ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດໃນການປະກາດສ້າງຕັ້ງຕາແສງຕຸ້ມລານ ຢ່າງເປັນທາງການ, ພ້ອມທັງ ເນັ້ນໜັກໃຫ້ເອົາໃຈໃສ່ ຕໍ່ວຽກງານຈຸດສຸມຈຳນວນໜຶ່ງ ເປັນຕົ້ນ ເພີ່ມທະວີສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆໃນສັງຄົມ; ເອົາໃຈໃສ່ໂຄສະນາສຶກສາອົບຮົມປະຊາຊົນ ໃຫ້ມີສະຕິລະວັງຕົວ ຕໍ່ກົນອຸບາຍຕ່າງໆຂອງກຸ່ມຄົນບໍ່ດີ; ເຂັ້ມງວດສະກັດກັ້ນການລັກລອບຕັດໄມ້, ທຳລາຍປ່າ ແລະ ການລັກລອບຂຸດຄົ້ນແຮ່ທາດຜິດກົດໝາຍ; ຕິດຕາມສະພາບດິນຟ້າອາກາດ, ເຝົ້າລະວັງ ໄພທຳມະຊາດ ທີ່ອາດເກີດຂຶ້ນ ຢ່າງໃກ້ຊິດ ໂດຍໃຫ້ມີການກະກຽມຄວາມພ້ອມ ຊ່ວຍເຫຼືອປະຊາຊົນ ໃນກໍລະນີເກີດເຫດ ຢ່າງທັນການ; ສືບຕໍ່ເອົາໃຈໃສ່ແກ້ໄຂບັນຫາການປະລະການຮຽນຂອງເດັກນ້ອຍ, ຈັດສັນຄູສອນໃຫ້ພຽງພໍ,

ລະດົມເດັກໃນເກນອາຍຸ ໄດ້ເຂົ້າຮຽນຢ່າງທົ່ວເຖິງ, ທັງຍົກລະດັບການບໍລິການດ້ານສາທາລະນະສຸກ ໃຫ້ນັບມື້ດີຂຶ້ນ; ຕິດຕັ້ງລະບົບໂທລະໂຄ່ງປະຈຳຕາແສງ ໃຫ້ສາມາດນຳໃຊ້ໂຄສະນາ-ປະຊາສຳພັນ ຢ່າງມີປະສິດທິພາບ; ສຸມໃສ່ຊຸກຍູ້ສົ່ງເສີມການປູກຝັງ-ລ້ຽງສັດ ຕາມທ່າແຮງຂອງທ້ອງຖິ່ນ ເພື່ອແກ້ໄຂຄວາມທຸກຍາກ ຂອງປະຊາຊົນ ໃຫ້ຫຼຸດລົງເປັນກ້າວໆ,

ພ້ອມທັງ ຈັດສັນທີ່ຢູ່ອາໄສຂອງປະຊາຊົນ ໃຫ້ເປັນລະບຽບຮຽບຮ້ອຍ, ລວມກັນຢູ່ເປັນກຸ່ມ ເພື່ອສະດວກຕໍ່ການພັດທະນາໂຄງລ່າງພື້ນຖານຕ່າງໆ; ຮັດແໜ້ນ ຄວາມສາມັກຄີພາຍໃນ ແລະ ຝຶກອົບຮົມຍົກລະດັບຄວາມຮູ້ຄວາມສາມາດ ໃຫ້ແກ່ບຸກຄະລາກອນຕາແສງ. ໃນຕອນທ້າຍ, ທ່ານ ນາຍົກລັດຖະມົນຕີ ໄດ້ມອບທຶນ ຈຳນວນໜຶ່ງ ໃຫ້ແກ່ເມືອງ ແລະ ຕາແສງ ດັ່ງກ່າວ.

ຫຼັງຈາກນັ້ນ, ໄດ້ສືບຕໍ່ເດີນທາງຢ້ຽມຢາມກຸ່ມຫັດຖະກຳຕ່ຳແຜ່ນແພ ຂອງເຜົ່າກະຕາງ ແລະ ໄປຕິດຕາມກວດກາເບິ່ງເສັ້ນທາງ-ຂົວ ສຸພານຸວົງ ຊຶ່ງເປັນເສັ້ນທາງຍຸດທະສາດຂອງເມືອງຕຸ້ມລານ ຫາ ເທດສະບານແຂວງສາລະວັນ.

(ຂ່າວ-ພາບ: ກົມປະຊາສຳພັນ ຫສນຍ)