 |
ໂຄງການໄຟຟ້າພະລັງງານແສງຕາເວັນ 100 MW ແຫ່ງນີ້ ແມ່ນ 1 ໃນ 12 ໂຄງການບຸລິມະ ສິດສໍາຄັນຂອງລັດຖະບານ ໃນແຜນການຮັບຊື້ພະລັງງານໄຟຟ້າແສງຕາເວັນ ເຊື່ອມເຂົ້າລະບົບສາຍສົ່ງ 115 kV ຂອງລັດວິສາຫະກິດໄຟຟ້າລາວ, ມີເນື້ອທີ່ປະມານ 158 ເຮັກຕາ, ຫ່າງຈາກເທສະບານນະຄອນໄກສອນ ພົມວິຫານ ປະມານ 13 ກິໂລແມັດ ໂດຍແມ່ນກຸ່ມບໍລິສັດ ຄູນໄຊພັດທະນາກໍ່ສ້າງ ຈຳກັດ ເປັນຜູ້ສະໜອງທຶນ, ບໍລິສັດ ລາວພັດທະນາ ກຣີນເອັນເນີຈີ ຈຳກັດ ເປັນຜູ້ພັດທະນາໂຄງການ ແລະ ບໍລິສັດ ອຳມະຕະ ເອັນຈີເນຍຣິງ ຈຳກັດ ເປັນຜູ້ຮັບເໝົາກໍ່ສ້າງ. ພ້ອມກັນນັ້ນ, ໂຄງການຍັງມີການກໍ່ສ້າງສາຍສົ່ງໄຟຟ້າແຮງສູງ 115 kV ຄວາມຍາວ 7 ກິໂລແມັດ ເພື່ອເຊື່ອມຕໍ່ເຂົ້າສະຖານີໄຟຟ້າປາກບໍ່. ສຳລັບພະລັງງານໄຟຟ້າ ແມ່ນມີແຜນສະໜອງໃຫ້ແກ່ການຊົມໃຊ້ພາຍໃນທ້ອງຖິ່ນ ແລະ ສົ່ງຂາຍເຂົ້າລະບົບຂອງລັດວິສາຫະກິດໄຟຟ້າລາວ.
 |
ໃນໂອກາດດັ່ງກ່າວ, ທ່ານນາຍົກລັດຖະມົນຕີ ໄດ້ໂອ້ລົມ ແລະ ໃຫ້ທິດຊີ້ນຳບາງດ້ານ ຕໍ່ພາກ ສ່ວນ-ຂະແໜງການກ່ຽວຂ້ອງຂອງລັດ ແລະ ຜູ້ພັດທະນາໂຄງການ ເປັນຕົ້ນ ໃຫ້ເອົາໃຈໃສ່ເປັນພິເສດ ຫລີກລ່ຽງຜົນກະທົບ ຕໍ່ເນື້ອທີ່ດິນກະສິກຳຂອງປະຊາຊົນ ເພາະເປັນບ່ອນຜະລິດສະບຽງອາຫານທີ່ສຳຄັນຂອງທ້ອງຖິ່ນ; ສືບຕໍ່ສົ່ງເສີມບັນດາບໍລິສັດ ແລະ ພາກສ່ວນຕ່າງໆ ນຳໃຊ້ແຜງໂຊລ້າເຊວ ທີ່ຜະລິດຢູ່ພາຍໃນ ສປປ ລາວ ໃຫ້ຫລາຍຂຶ້ນ ເພື່ອເປັນການສົ່ງເສີມການຊົມໃຊ້ຜະລິດຕະພັນພາຍໃນ ໃຫ້ມີຄວາມແຂງແຮງ; ຕິດພັນກັບການພັດທະນາໂຄງການ ໃຫ້ພິຈາລະນານຳໃຊ້ພື້ນທີ່ໂຄງການ ແບບປະສົມປະສານ ໃຫ້ເກີດປະໂຫຍດສູງສຸດ ເຊັ່ນ: ມີການປູກຫຍ້າ ເພື່ອລ້ຽງສັດ ແລະ ອື່ນໆ; ໃຫ້ອົງ ການປົກຄອງແຂວງ, ນະຄອນ ແລະ ໂຄງການ ສົມທົບກັນມີສ່ວນຮ່ວມ ໃນການພັດທະນາຊຸມຊົນທ້ອງຖິ່ນ ເປັນຕົ້ນ ການຈັດສັນອາຊີບ, ທີ່ດິນ, ສ້າງວຽກເຮັດງານທຳ, ພັດທະນາສີມືແຮງງານ ແລະ ພັດທະນາໂຄງລ່າງພື້ນຖານຕ່າງໆ, ເຮັດໃຫ້ທ້ອງຖິ່ນ ແລະ ຊີວິດການເປັນຢູ່ ຂອງປະຊາຊົນ ໄດ້ຮັບການພັດທະນາດີຂຶ້ນ ເປັນກ້າວໆ.
ຂ່າວ-ພາບ: ກົມປະຊາສຳພັນ, ຫສນຍ
ຄໍາເຫັນ