ຂ່າວລະບຸວ່າ: ໃນວັນທີ 5 ສິງຫາ ຜ່ານມາ ທ່ານ ຮຸນມາເນັດ ນາຍົກລັດຖະມົນຕີກຳປູເຈຍ ໄດ້ຈັດພິທີວາງສີລາລືກໂຄງການລະບົບຂົນສົ່ງທາງນໍ້າ ແລະ ໂລຈີສຕິກໂຕນເລ ບາສັກ ຂຸດຄອງຟູນັນ ເຕໂຊ ທີ່ຈະກາຍເປັນເສັ້ນທາງຄົມມະນາຄົມຂົນສົ່ງທາງນໍ້າ ເຊື່ອມຕໍ່ແມ່ນໍ້າບາສັກ ແມ່ນໍ້າສາຂາຂອງແມ່ນໍ້າຂອງ ທີ່ຢູ່ໃກ້ນະຄອນຫຼວງພະນົມເປນ ເຂົ້າກັບອ່າວໄທ.
ພິທີວາງສີລາລືກ ຈັດຂຶ້ນກົງກັບວັນເກີດຂອງທ່ານ ຮຸນແຊນ ອະດີດນາຍົກລັດຖະມົນຕີກຳປູເຈຍ ຊຶ່ງເປັນຜູ້ລິເລີ່ມໂຄງການນີ້, ໂດຍຄອງແຫ່ງນີ້ຈະມີຄວາມກວ້າງ 100 ແມັດ, ເລິກ 5,4 ແມັດ ແລະ ມີຄວາມຍາວ 180 ກິໂລແມັດ ເຊື່ອມຕໍ່ການຂົນສົ່ງສິນຄ້າຈາກແມ່ນໍ້າບາສັກໃກ້ກັບນະຄອນຫຼວງພະນົມເປນ ມາຍັງແຂວງແກບ ແຄມຝັ່ງທາງໃຕ້ຂອງປະເທດ ຊຶ່ງຈະເຮັດໃຫ້ສາມາດເຊື່ອມຕໍ່ເຂົ້າເຖິງອ່າວໄທໄດ້ ແລະ ເປັນທາງເລືອກນອກເໜືອຈາກທ່າເຮືອນໍ້າເລິກແຫ່ງດຽວຂອງປະເທດເຊັ່ນ: ສີໜຸວິລ. ນອກຈາກນີ້ຍັງຈະຊ່ວຍຫຼຸດການອາໄສໃຊ້ທ່າເຮືອບໍລິເວນປາກແມ່ນໍ້າຂອງຂອງຫວຽດນາມ.
ໂຄງການກໍ່ສ້າງຄອງນີ້ ມີມູນຄ່າ 1,7 ຕື້ໂດລາ ຄາດວ່າຈະສຳເລັດໃນຕົ້ນປີ 2028 ແລະ ເມື່ອຂຸດສຳເລັດ ຈະຊ່ວຍຫຼຸດຕົ້ນທຶນການຄົມມະນາຄົມຂົນສົ່ງສິນຄ້າເຂົ້າສູ່ກຳປູເຈຍ, ເຖິງຢ່າງໃດກໍຕາມ ຍັງມີຄວາມກັງວົນເຖິງຜົນກະທົບດ້ານສິ່ງແວດລ້ອມຈາກການປ່ຽນເສັ້ນທາງໄຫຼຂອງແມ່ນໍ້າຂອງ ເນື່ອງຈາກກຳປູເຈຍ ມາໃຊ້ເສັ້ນທາງແມ່ນໍ້າບາສັກ ເຮັດໃຫ້ລັດຖະບານກຳປູເຈຍສາມາດຫຼີກລ່ຽງຂໍ້ຕົກລົງແມ່ນໍ້າຂອງ ທີ່ກຳນົດໃຫ້ຕ້ອງມີການປຶກສາຫາລືລ່ວງໜ້າກັບຄະນະກຳມາທິການແມ່ນໍ້ຂອງ.
ພ້ອມກັນນີ້, ທ່ານ ຮຸນມາເນັດ ລະບຸວ່າ: ທີ່ຜ່ານມາກຳປູເຈຍເຄີຍດຳເນີນໂຄງການໂຄງສ້າງພື້ນຖານທີ່ໃຫຍ່ກວ່ານີ້ ແລະ ມີມູນຄ່າຫຼາຍກວ່ານີ້ມາແລ້ວ ແຕ່ຄອງຟູນັນ ເຕໂຊ ແຫ່ງນີ້ ຈະຖືເປັນປະຫວັດສາດທີ່ແຕກຕ່າງອອກໄປ ແລະ ຍັງເປັນໂຄງການທີ່ເຮັດເພື່ອປະຊາຊົນ ແລະ ຮັບການສະໜັບສະໜູນຈາກປະຊາຊົນທົ່ວປະເທດ.
ຄໍາເຫັນ