ແນວຄວາມຄິດຊີ້ນຳ ຂອງ ປະທານ ຄຳໄຕ ສີພັນດອນ ຕໍ່ກັບວຽກງານພັດທະນາເສດຖະກິດ-ການເງິນ

ໂດຍ: ບຸນຕອມ
    ທ່ານ ອູສະຫວັນ ທ່ຽງເທບວົງສາ  ຫົວໜ້າຄົ້ນຄວ້ານະໂຍບາຍເສດຖະກິດ-ສັງຄົມ ສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດໄດ້ສະເໜີກ່ຽວກັບແນວຄວາມຄິດຊີ້ນຳ ຂອງ ປະທານ ຄຳໄຕ ສີພັນດອນ ຕໍ່ວຽກງານພັດທະນາເສດຖະກິດ-ການເງິນ ຕໍ່ກອງປະຊຸມສຳມະນາວິທະຍາສາດລະດັບຊາດ ໃນໂອກາດລະນຶກ ວັນເກີດຂອງ ປະທານ ຄຳໄຕ ສີພັນດອນ ຄົບຮອດ 100 ປີ ທີ່ແຂວງຫົວພັນ ເມື່ອບໍ່ດົນມານີ້.
ທ່ານ ອູສະຫວັນ ທ່ຽງເທບວົງສາ  ໄດ້ເວົ້າວ່າ: ແນວຄວາມຄິດຊີ້ນຳ ຂອງ ປະທານ ຄຳໄຕ ສີພັນດອນ ຕໍ່ວຽກງານພັດທະນາເສດຖະກິດ-ການເງິນ ໄລຍະດຳລົງຕຳແໜ່ງເປັນ ນາຍົກລັດຖະມົນຕີ ແຫ່ງ ສປປ ລາວ ປີ 1991-1996 ທ່ານໄດ້ຊີ້ນຳກ່ຽວກັບວຽກງານ ພັດທະນາເສດຖະກິດ-ສັງຄົມ ວ່າ: ລັດບໍ່ເຮັດທຸລະກິດ ແລະ ການຜະລິດໂດຍກົງ ແຕ່ຈະສຸມໃສ່ເຮັດພາລະບົດບາດ ດັດສົມມະຫາພາກແລະ ຕ້ອງຫັນປ່ຽນຈາກເສດຖະກິດທຳມະຊາດ ແລະ ເຄິ່ງທຳມະຊາດ ໄປສູ່ເສດຖະກິດສິນຄ້າ, ສ້າງໂຄງປະກອບເສດຖະກິດສິນຄ້າ ທີ່ມີຫຼາຍກໍາມະສິດ, ຫຼາຍຮູບການຈັດຕັ້ງເສດຖະກິດດ້ວຍຫຼາຍລະດັບ ແລະ ຫຼາຍຂະໜາດທີ່ແຕກຕ່າງກັນ, ສືບຕໍ່ປ່ຽນແປງໃໝ່ກົນໄກຄຸ້ມຄອງເສດຖະກິດ, ລຶບລ້າງສິ່ງເສດເຫຼືອຂອງກົນໄກລວມສູນ ອາດຍາສິດ ບໍລິຫານເກື້ອກູນ, ປ່ຽນແປງໃໝ່ ແລະ ເພີ່ມທະວີຄວາມສັກສິດ ແຫ່ງການຄຸ້ມຄອງລັດໃນຂົງເຂດເສດຖະກິດ.ທ່ານປະທານ ຄຳໄຕ ສີພັນດອນ ໄດ້ຕີຄວາມໝາຍຂອງການພັດທະນາວ່າ: ແມ່ນຂະບວນການວິວັດ ທີ່ເປັນໄປຕາມຂັ້ນຕອນ ແລະ ບາດກ້າວອັນແນ່ນອນ ໂດຍສອດຄ່ອງກັບຈຸດພິເສດ, ທ່າແຮງບົ່ມຊ້ອນຕ່າງໆ ແລະລະດັບຂອງປະຊາຊົນ ໃນແຕ່ລະປະເທດ ຊຶ່ງການພັດທະນາຕ້ອງມີຈຸດປະສົງ ແລະ ຄາດໝາຍທີ່ຈະແຈ້ງ,ເປັນຕົ້ນແມ່ນຕ້ອງເລັ່ງໃສ່ເຮັດໃຫ້ຄົນສ່ວນໃຫຍ່ມີຢູ່ມີກິນ ແລະ ຮັ່ງຂຶ້ນ, ຫາກບໍ່ແມ່ນແຕ່ພຽງຄົນ ຈຳນວນໜຶ່ງຫຼື ກຸ່ມຄົນໃດໜຶ່ງເທົ່ານັ້ນ. ພ້ອມນີ້ ຕ້ອງເຮັດໃຫ້ປະເທດຊາດມີຄວາມເຂັ້ມແຂງ ແລະ ໝັ້ນຄົງ, ການພັດທະນາແຕ່ລະໄລຍະຕ້ອງແນໃສ່ສ້າງພື້ນຖານຄວາມຍືນຍົງ ໃຫ້ແກ່ການພັດທະນາໃນບາດກ້າວຕໍ່ໆໄປ. ການພັດທະນາເສດຖະກິດ ຕ້ອງໄປຄຽງຄູ່ກັບການພັດທະນາວັດທະນາທຳ-ສັງຄົມ, ການສ້າງຄວາມຈະເລີນທາງດ້ານວັດຖຸ ຕ້ອງໄປຄຽງຄູ່ກັບຄວາມສີວິໄລທາງດ້ານຈິດໃຈ.ປະທານ ຄຳໄຕ ສີພັນຕອນ ໄດ້ເອົາໃຈໃສ່ພັດທະນາຂະແໜງການເງິນ, ໂດຍໄດ້ປະກາດໃຊ້ ດໍາລັດຫຼາຍສະບັບ ເຊັ່ນ: 1ດໍາລັດວ່າດ້ວຍ ຫຼັກການພື້ນຖານໃນການລວມສູນການເງິນ, ງົບປະມານ ແລະ ຄັງເງິນແຫ່ງລັດ,2ດໍາລັດວ່າດ້ວຍ ການຄຸ້ມຄອງການລົງທຶນກໍ່ສ້າງພື້ນຖານ, 3ດໍາລັດວ່າດ້ວຍ ການຄຸ້ມຄອງກອງທຶນຊ່ວຍເຫຼືອ, 4ດໍາລັດວ່າດ້ວຍ ການຄຸ້ມຄອງທຶນກູ້ຢືມ ຈາກຕ່າງປະເທດ ເປັນຕົ້ນ. ພ້ອມກັນນັ້ນ, ກໍໄດ້ປັບປຸງນະໂຍບາຍດ້ານພາສີ-ອາກອນ ໃຫ້ມີຄວາມສອດຄ່ອງ ແລະ ແທດເໝາະຂຶ້ນກວ່າເກົ່າ. ຜ່ານການປະຕິບັດບັນດາດຳລັດດັ່ງກ່າວເຮັດໃຫ້ລະບົບການຈໍລະຈອນທາງດ້ານການເງິນ-ການທະນາຄານ ເຂົ້າສູ່ຄວາມເປັນລະບຽບແບບແຜນ, ເຮັດໃຫ້ການບໍລິຫານ ແລະ ການນຳໃຊ້ທຶນ ຂອງລັດມີຈຸດສຸມ, ຄຸ້ມຄອງໄດ້ ແລະ ທັງເປັນການຫຼຸດຜ່ອນປະກົດການຍໍ້ທໍ້, ສໍ້ລາດບາງຫຼວງ ໃຫ້ຫຼຸດລົງ. ການເກັບລາຍຮັບງົບປະມານ, ພາສີ-ອາກອນ ໃນປີ 1991 ເພີ່ມຂຶ້ນ34% ທຽບໃສ່ປີ 1990. ສາມາດແກ້ໄຂ ການຄ້າງຈ່າຍເງິນເດືອນ ຂອງພະນັກງານ, ທະຫານ, ຕໍາຫຼວດ ແລະໜີ້ສິນສາທາລະນະ ໄດ້ໂດຍພື້ນຖານ. ໃນນັ້ນ, ຜົນງານພົ້ນເດັ່ນແມ່ນສາມາດປັບປຸງ ລະບົບການບໍລິຫານ, ກົນໄກການປະສານງານ ແລະ ການຄຸ້ມຄອງມະຫາພາກ ຂອງ 4 ຂະແໜງການໃຫຍ່ ໃນລະບົບເສດຖະກິດໃຫ້ດີຂຶ້ນເຊັ່ນ: ຂະແໜງການເງິນ, ການທະນາຄານ, ການຄ້າ ແລະ ການລົງທຶນ ເຮັດໃຫ້ການຄຸ້ມຄອງ ເສດຖະກິດ-ການເງິນມີຄວາມຮັດກຸມ, ນິຕິກໍາບັງຄັບໃຊ້ ມີຄວາມສັກສິດຂຶ້ນຕື່ມ ສົ່ງຜົນເຮັດໃຫ້ ການເງິນ-ເງິນຕາ ແລະ ລາຄາສິນຄ້າ ມີຄວາມໝັ້ນທ່ຽງໂດຍພື້ນຖານ.ແນວຄວາມຄິດຊີ້ນຳ ຂອງ ປະທານ ຄຳໄຕ ສີພັນດອນ ໃນຂົງເຂດວຽກງານພັດທະນາເສດຖະກິດ-ການເງິນ ໄລຍະດຳລົງຕຳແໜ່ງເປັນປະທານປະເທດ ແຫ່ງ ສປປ ລາວ ປີ 1996-2006ຊຶ່ງທ່ານໄດ້ເວົ້າວ່າ: ຜົນງານປະຫວັດສາດອັນສຳຄັນນັ້ນ, ຢັ້ງຢືນຢ່າງຈະແຈ້ງວ່າ ພັກເຮົາ ໄດ້ມີຄວາມສະດຸ້ງໄວ, ມີຄວາມກ້າຫານປະດິດສ້າງ, ມີຄວາມສະຫຼາດສ່ອງໃສ ແລະ ມີຄວາມຮັບຜິດຊອບຢ່າງເຕັມປ່ຽມ ໃນການນໍາພາປະເທດຊາດ ໂດຍເນັ້ນໜັກໜ້າທີ່ພື້ນຖານຄື: 1.ຫັນຈາກເສດຖະກິດທຳມະຊາດ ໄປສູ່ເສດຖະກິດສິນຄ້າ ດ້ວຍວິທີສຸມໃສ່ການຂະຫຍາຍກະສິກຳຮອບດ້ານ, ສູ້ຊົນເອົາອຸດສາຫະກຳ ແລະ ການບໍລິການກະທົບເຂົ້າໃສ່ກະສິກຳ, 2.ປະຕິບັດນະໂຍບາຍເສດຖະກິດຫຼາຍພາກສ່ວນຢ່າງສະເໝີຕົ້ນສະເໝີປາຍ, ໂດຍກໍານົດຈະແຈ້ງ ບົດບາດ ຂອງແຕ່ລະພາກສ່ວນເສດຖະກິດ ແລະ ຮັບປະກັນຄວາມສະເໝີພາບຂອງແຕ່ລະພາກສ່ວນເສດຖະກິດ ຕໍ່ໜ້າກົດໝາຍ,3ຊຸກຍູ້ການປ່ຽນແປງ ໃນການຄຸ້ມຄອງລັດ, ໂດຍການແບ່ງຂັ້ນຄຸ້ມຄອງໃຫ້ຈະແຈ້ງ ລະຫວ່າງສູນກາງແລະ ທ້ອງຖິ່ນ, ປ່ຽນແປງໃໝ່ບັນດານະໂຍບາຍເສດຖະກິດມະຫາພາກ ໄປພ້ອມກັບການສ້າງ ແລະ ປັບປຸງລະບົບກົດໝາຍ ໃຫ້ສົມບູນ,4ເປີດກວ້າງການຮ່ວມມື ເສດຖະກິດກັບຕ່າງປະເທດ, ໂດຍຊຸກຍູ້ການຜະລິດສົ່ງອອກ ແລະ ດຶງດູດການລົງທຶນ ໂດຍກົງຈາກຕ່າງປະເທດ. ພ້ອມດຽວກັນນີ້, ປະທານ ຄຳໄຕ ສີພັນດອນ ໄດ້ກຳນົດວິໄສທັດ ໃຫ້ ສປປ ລາວ ຕ້ອງຫຼຸດພົ້ນອອກຈາກ ສະຖານະພາບປະເທດດ້ອຍພັດທະນາ ໃນປີ 2020ແລະ ວິໄສທັດດັ່ງກ່າວກໍໄດ້ຖືກຮັບຮອງຈາກກອງປະຊຸມໃຫຍ່ ຄັ້ງທີ VI ຂອງສູນກາງພັກ ໃນປີ 1996 ຢ່າງເປັນທາງການ.ແນວຄວາມຄິດຊີ້ນຳ ຕໍ່ວຽກງານພັດທະນາເສດຖະກິດ-ການເງິນ ປີ 2001-2005ຕະຫຼອດໄລຍະການດຳລົງຕຳແໜ່ງສູງສຸດ ຂອງພັກ ແລະລັດ ຂອງ ທ່ານ ປະທານ ຄຳໄຕ ສີພັນດອນໄດ້ເຮັດໃຫ້ປະເທດເຮົາ ສືບຕໍ່ມີຄວາມສະຫງົບ ແລະ ເປັນລະບຽບຮຽບຮ້ອຍ; ເສດຖະກິດ ແຕ່ປີ 1991-2006ມີການຂະຫຍາຍຕົວຢ່າງຕໍ່ເນື່ອງ ເຖິງວ່າຈະໄດ້ຮັບຜົນສະທ້ອນ ຈາກວິກິດການເສດຖະກິດ-ການເງິນ ຢູ່ອາຊີ ໃນປີ1997-2000 ກໍຕາມ, ອັດຕາການເຕີບໂຕ ທາງເສດຖະກິດ ສະເລ່ຍ ບໍ່ຫຼຸດ 6%, ລາຍຮັບງົບປະມານສາມາດຄໍ້າປະກັນແຜນລາຍຈ່າຍ ແລະ ຍັງມີສ່ວນສະສົມ; ການພັດທະນາສ້າງສາ ເວົ້າໂດຍທົ່ວໄປ ດຳເນີນເປັນປົກກະຕິ,ຊີວິດການເປັນຢູ່ທາງດ້ານວັດຖຸ ແລະ ວັດທະນະທຳ ຂອງປະຊາຊົນໄດ້ຍົກລະດັບຂຶ້ນ; ການພົວພັນຮ່ວມມື ກັບປະເທດເພື່ອນມິດຍຸດທະສາດ, ປະເທດໄກ້ຄຽງ ແລະ ປະເທດອື່ນໆ ກໍໄດ້ປະຕິບັດຕາມແນວທາງການຕ່າງປະເທດທີ່ພັກເຮົາວາງອອກ, ເຮັດໃຫ້ປະເທດເຮົາ ໄດ້ຮັບຄວາມເຊື່ອຖື ແລະ ໄວ້ວາງໃຈ ເປັນຢ່າງດີ.