ໂດຍ: ຍຸພິນທອງ
ງານບຸນນະມັດສະການພະທາດຫຼວງວຽງຈັນ ແລະ ງານວາງສະແດງສິນຄ້າ ປະຈຳປີ 2023 ຈັດຂຶ້ນເພື່ອສືບຕໍ່ສົ່ງເສີມ ອະນຸລັກຮັກສາວັດທະນະທໍາ-ຮີດຄອງປະເພນີອັນດີງາມຂອງຊາດ ຮັກສາມູນເຊື້ອຄວາມສາມັກຄີ ເປັນການສືບສານປະເພນີ ແລະ ຄວາມເຊື່ອຖືຂອງຊາວລາວ ມາແຕ່ບັນພະບູລຸດ ຊຶ່ງປີນີ້ ງານບຸນແມ່ນໄດ້ຈັດຂຶ້ນໃນລະຫວ່າງວັນທີ 23 ຫາ 27 ພະຈິກ 2023.
ເນື່ອງໃນໂອກາດດັ່ງກ່າວ ທ່ານ ນາງ ວິໄລວອນ ຈັນທະລາຕີ ຫົວໜ້າພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນ ໃນວັນທີ 23 ພະຈິກ ນີ້ ວ່າ: ງານບຸນນະມັດສະການພະທາດຫຼວງປີນີ້ ເນັ້ນໃສ່ ຄວາມສະຫງົບ, ຄວາມສະອາດ, ຄວາມປອດໄພ ແລະ ຄວາມເປັນລະບຽບຮຽບຮ້ອຍ ໜຶ່ງໃນນັ້ນວຽກງານດັ່ງກ່າວ ແມ່ນວຽກງານຄວບຄຸມສຽງເນື່ອງນັນຢູ່ໃນງານບຸນຖືວ່າໄດ້ປະຕິບັດຕາມລະບຽບຂອງການຄວບຄຸມສຽງດັ່ງເນື່ອງນັນຕາມຂໍ້ຕົກລົງຂອງເຈົ້າຄອງ ສະບັບເລກທີ 0620 ມາປະຕິບັດນຳໃຊ້ເຂົ້າຢູ່ໃນງານບຸນນະມັດສະການພະທາດຫຼວງ.
ໂດຍສະເພາະໃນງານບຸນໄດ້ມີລະບຽບການນຳໃຊ້ເຄື່ອງສຽງ ແມ່ນມີການກຳນົດ ແລະ ໄດ້ຖະແຫຼງຂ່າວໃຫ້ຜູ້ປະກອບການ ແລະ ຜູ້ທີ່ເຂົ້າມາຮ່ວມງານໄດ້ຮັບຮູ້ຕໍ່ການນຳໃຊ້ເຄື່ອງສຽງ ຊຶ່ງໄດ້ອະນຸຍາດໃຫ້ນຳໃຊ້ ໄມເນັບແອວ, ລຳໂພງໜ່ວຍດຽວ ແລະ ປັກເລີ ສ່ວນເຄື່ອງຂະຫຍາຍສຽງທີ່ມີສຽງດັງເກີນ 1 ພັນຊີຊີ ຖືວ່າຕ້ອງມາລົງທະບຽນນຳຄະນະກຳມະການເພື່ອຄຸ້ມຄອງ, ກວດກາ ໃນການຈັດຕັ້ງປະຕິບັດການຄວບຄຸ້ມສຽງເນື່ອງນັນແມ່ນໄດ້ຖອດຖອນບົດຮຽນຈາກຫາງສຽງສັງຄົມທີ່ມາທ່ຽວງານໃນປີຜ່ານໆມາ ໄດ້ສົ່ງຂ່າວວ່າມີສຽງດັງເກີນກຳນົດ ເພື່ອຮັກສາຄວາມສະຫງົບຈຶ່ງໄດ້ຈັດຕັ້ງປະຕິບັດໃນການຄວບຄຸມ ໂດຍໄດ້ອະນຸຍາດໃຫ້ສະເພາະຜູ້ປະກອບການ ກໍຄືຮ້ານທີ່ຕ້ອງໄດ້ໂຄສະນາສິນຄ້າປະກອບມີ 10 ກວ່າຮ້ານ ທີ່ໄດ້ຮັບອະນຸຍາດໃຫ້ນຳໃຊ້ເຄື່ອງສຽງຂະໜາດໃຫຍ່ແຕ່ໃຫ້ເປີດໄດ້ຕາມທີ່ທາງກຳມະການກຳນົດ.
ຄໍາເຫັນ