ໂດຍ: ສຳນານ ພົມພັກດີ
ງານມະຫະກໍາສີມືຫັດຖະກໍາລາວຖືເປັນງານປະເພນີບຸນປາງໃຫຍ່ຂອງຊາວຊ່າງຫັດຖະກຳລາວ, ໃນຂະນະດຽວກັນການຈັດງານງານມະຫະກໍາສີມືຫັດຖະກໍາລາວຄັ້ງທີ 22 ປະຈໍາປີ 2023 ໄດ້ຈັດຂຶ້ນພາຍໃຕ້ຄໍາຂວັນ :ສີໄມ້ລາຍມືຄືອຸທິຍານແຫ່ງການທ່ອງທ່ຽວ “ຕໍານານສິນລະປະລາຍນາກລາວ” ຊຶ່ງພາຍໃນງານມີຫຼາກຫຼາຍກິດຈະກຳທີ່ໜ້າສົນໃຈທີ່ສຳຄັນຈະມີການສໍາມະນາ ຫຼາຍຫົວຂໍ້ ເປັນຕົ້ນແມ່ນຕໍານານສິນລະປະລາຍນາກລາວ, ມາດຕະຖານສິນຄ້າຫັດຖະກຳເພື່ອສົ່ງອອກປະເທດ ແລະ ອື່ນໆທີ່ເປັນຜະລິດຕະພັນພາຍໃນປະເທດ.
ທ່ານ ນາງ ສຸວິຕາ ປະເສີດ ປະທານສະມາຄົມຫັດຖະກໍາລາວໃຫ້ຮູ້ວ່າ: ງານມະຫະກຳສີມືຫັດຖະກຳລາວ ຄັ້ງທີ 22 ປະຈໍາປີ 2023 ປີນີ້ໂດຍແມ່ນກົມສົ່ງເສີມການຄ້າ, ກົມອຸດສາຫະກໍາ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ, ສະພາການຄ້າ ແລະ ອຸດສາຫະກຳແຫ່ງຊາດລາວ ແລະ ສູນວາງສະແດງສິນຄ້າລາວ-ໄອເຕັກ ຮ່ວມກັນຈັດຂຶ້ນ ຊຶ່ງການຈັດງານມະຫາກຳສີມືຫັດຖະກຳລາວຂຶ້ນໃນແຕ່ລະປີແມ່ນຖືເປັນງານປະເພນີບຸນປາງໃຫຍ່ຂອງຊາວຊ່າງຫັດຖະກຳລາວ. ສຳລັບງານມະຫະກໍາສີມືຫັດຖະກໍາລາວ ຄັ້ງທີ 22 ປະຈໍາປີ 2023 ຈັດຂຶ້ນປີນີ້ພາຍໃຕ້ຄໍາຂວັນສີໄມ້ລາຍມືຄືອຸທິຍານແຫ່ງການທ່ອງທ່ຽວ “ຕໍານານສິນລະປະລາຍນາກລາວ” ຊຶ່ງຈຸດປະສົງຫຼັກຂອງການຈັດງານປີນີ້ ແມ່ນເພື່ອສະເຫຼີມສະຫຼອງ “ວັນຫັດຖະກໍາລາວ ວັນທີ 1 ພະຈິກ” ຄົບຮອບ 16 ປີ (ວັນທີ 1 ພະຈິກ 2007 - ວັນທີ 1 ພະຈິກ 2023), ເພື່ອສ້າງກາລະໂອກາດໃຫ້ຊຸມຊົນ ແລະ ລູກຄ້າ ຜູ້ມາທ່ຽວຊົົມ ທ່ຽວຊື້ ໄດ້ພົບໄດ້ເຫັນຄວາມຫຼາກຫຼາຍຂອງເຄື່ອງຫັດຖະກໍາລາວ, ສ້າງຄວາມປະທັບໃຈ ແລະ ຫຼົງໄຫຼ ໃນຄວາມມະຫັດສະຈັນຂອງສີໄມ້ລາຍມືຂອງນາຍຊ່າງຫັດຖະກໍາລາວເຮົາ, ເພື່ອໃຫ້ບັນດາຊາວຊ່າງຫັດຖະກໍາທຸກທ້ອງຖິ່ນໃນທົ່ວປະເທດ ແລະ ຜູ້ປະກອບການ ດ້ານຫັດຖະກຳ ໄດ້ມີໂອກາດເຂົ້າເຖິງການຕະຫຼາດ (ຫຼື ມີບ່ອນຂາຍ) ຜະລິດຕະພັນຫັດຖະກໍາຂອງຕົນ ພ້ອມທັງໄດ້ມີໂອກາດພົບປະແລກປ່ຽນບົດຮຽນ, ປະສົບການທາງດ້ານການຜະລິດ,ການວາງ ສະແດງ ແລະ ການຂາຍ, ເພື່ອປະກອບສ່ວນສ້າງເປັນສະຖານທີ່ທ່ອງທ່ຽວດ້ານຫັດຖະກໍາດັ່ງຄໍາຂັວນ ທີ່ວ່າ: “ສີໄມ້ລາຍມື ຄືອຸທິຍານແຫ່ງການທ່ອງທ່ຽວ”, ເພື່ອກະກຽມຕ້ອນຮັບ ແລະ ກຽມຄວາມພ້ອມໃຫ້ແກ່ການເປັນເຈົ້າພາບຂອງ ສປປ ລາວ ໃນກອງປະຊຸມສໍາມະນາຜ້າແພພື້ນເມືອງອາຊຽນ ຄັ້ງທີ 9 ຊື່ງຈະຈັດຂຶ້ນ ທີ່ນະຄອນຫຼວງວຽງຈັນ ສປປ ລາວ ໃນປີ 2024 ນີ້ (9th ASEAN TRADITIONAL TEXTILES SYMPOSIUM 2024).
ທ່ານ ນາງ ສຸວິຕາ ປະເສີດ ໃຫ້ຮູ້ຕື່ມວ່າ: ງານມະຫະກໍາສີມືຫັດຖະກໍາລາວປີນີ້ຈະໄດ້ຈັດຂຶ້ນທີ່ສູນວາງສະແດງສິນຄ້າ ລາວ-ໄອເຕັກ ເປັນເວລາ 9 ວັນ, ເລີ່ມແຕ່ວັນທີ 4-12/11/2023 ໂດຍການເຂົ້າຮ່ວມວາງສະແດງ-ຂາຍສິນຄ້າຫັດຖະກຳຂອງຫຼາຍພາກສ່ວນຫັດຖະກໍາ ເປັນຕົ້ນແມ່ນ :ພາກສ່ວນແຜ່ນແພ (ຜ້າໄໝ, ຜ້າຝ້າຍ), ພາກສ່ວນເຄື່ອງປະດັບ (ເງິນ, ຄໍາ, ແກ້ວປະເສີດ), ພາກສ່ວນເຄື່ອງຈັກສານ (ຫວາຍ-ໄມ້ ປ່ອງ), ພາກສ່ວນຜະລິດຕະພັນວັດທະນະທໍາ (ເຄື່ອງປັ້ນດິນເຜົາ, ໄມ້ແກະສະຫຼັກ, ເຄື່ອງດົນຕີພື້ນເມືອງ, ພາກສ່ວນເຟີນີເຈີ,ພາກສ່ວນອາຫານສໍາເລັດຮູບພື້ນເມືອງ, ສະໝຸນໄພ ແລະ ອື່ນໆລວມທັງໝົດ 200 ກວ່າຮ້ານ.
ສະນັ້ນມວນຊົນ ທີ່ເຂົ້າມາທ່ຽວຊົມທ່ຽວຊື້ໃນງານ “ມະຫະກໍາສີມືຫັດຖະກໍາລາວ” ຄັ້ງນີ້ ນອກຈາກຈະໄດ້ຊົມການຈັດວາງສະແດງ ແລະ ຂາຍສິນຄ້າຫັດຖະກໍາຕ່າງໆ ຍັງຈະໄດ້ຊົມກິດຈະກໍາຕ່າງໆຕື່ມອີກ ເປັນຕົ້ນແມ່ນການ ສໍາມະນາ ທີ່ເປັນໜ້າສົນໃຈ ຫຼາຍຫົວຂໍ້ ເປັນຕົ້ນແມ່ນຕໍານານສິນລະປະລາຍນາກລາວ, ມາດຕະຖານສິນຄ້າຫັດຖະ ກຳເພື່ອສົ່ງອອກປະເທດ “ຍີ່ປຸ່ນ”, ຫັດຖະກຳກັບການທ່ອງທ່ຽວ, ກິດຈະກໍາ ປະກວດການແຂ່ງຂັນຜະລິດຕະພັນດີເດັ່ນ: “ເຄື່ອງທີ່ລະນຶກ”, ກິດຈະກໍາສາທິດ ຂັ້ນຕອນການຜະລິດຕົວຈິງ, ກິດຈະກຳປະຈໍາວັນ (ສະແດງສີລະປະເດີນແບບ ແລະ ອື່ນໆ), ສໍາລັບງານເດີນແບບອາພອນລາວ ເພື່ອການກຸສົນ ພາຍໃຕ້ໂຄງການ “ຫ່ວງໃຍໄປເຖິງ” ຊຶ່ງການເຄື່ອນໄຫວກິດຈະກຳຕ່າງໆໃນງານມະຫາກຳ ສີມືຫັດຖະກຳລາວຄັ້ງນີ້ແມ່ນໄດ້ຮັບການອຸ້ມຊູຊ່ວຍເຫຼືອ, ການສະໜັບສະໜູນ ຈາກຫຼາຍພາກສ່ວນ ນັບທັງພາກລັດ, ອົງການຈັດຕັ້ງສາກົນ ປະຈໍາລາວ, ຫົວໜ່ວຍທຸລະກິດ ແລະ ຈາກບຸກຄົນທົ່ວໄປ.
ຄໍາເຫັນ