 |
ທ່ານ ນາງ ຈັນທະຈອນ ວົງໄຊ ໄດ້ໃຫ້ຮູ້ວ່າ: ສະພາການຄ້າ ແລະ ອຸດສາຫະກຳແຫ່ງຊາດລາວ ຮ່ວມກັບ ສະພາການຄ້າ ແລະ ອຸດສາຫະກຳ ແຂວງຫົວພັນ ແລະ ສະພາການຄ້າ ແລະ ອຸດສາຫະກຳ ແຂວງທົ່ວປະເທດຈະໄດ້ຈັດງານຜະລິດຕະພັນລາວ 2026 (MadeinLaos 2026) ຂຶ້ນໃນລະຫວ່າງວັນທີ 3-11/10/2026 (9 ວັນ) ທີ່ສູນວາງສະແດງສິນຄ້າລາວ-ໄອເຕັກ ນະຄອນຫຼວງວຽງຈັນ, ງານວາງສະແດງຜະລິດຕະພັນລາວໄດ້ຈັດຂຶ້ນຄັ້ງທໍາອິດ ໃນປີ 2011 ຈົນເຖິງປັດຈຸບັນ, ສຳລັບ ປີ 2026 ນີ້ແມ່ນສະພາການຄ້າ ແລະ ອຸດສາຫະກຳແຂວງຫົວພັນເປັນເຈົ້າພາບຮ່ວມໃນການຈັດງານຫຼັກ ຊຶ່ງສະພາການຄ້າ ແລະ ອຸດສາຫະກຳ ແຂວງຫົວພັນ ຈະໄດ້ມີການອອກແບບຕົບແຕ່ງ BoothPavilion ເປັນພິເສດ ແລະ ສວຍງາມເພື່ອສະແດງໃຫ້ເຫັນວິຖີຊີວິດການເປັນຢູ່, ຮີດຄອງປະເພນີ, ວັດທະນະທຳທີ່ສວຍງາມ ແລະ ບັນດາແຫຼ່ງທ່ອງທ່ຽວຕ່າງໆທາງດ້ານວັດທະນະທຳ ແລະ ທຳມະຊາດ ທີ່ຕິດພັນກັບວິຖີການດໍາລົງຊີວິດຂອງຊາວແຂວງຫົວພັນ. ນອກຈາກນັ້ນ, ຍັງໄດ້ເຫັນເຖິງການຂະຫຍາຍຕົວທາງດ້ານເສດກິດ ບໍ່ວ່າຈະເປັນສະຖານທີ່ທ່ອງທ່ຽວທາງທຳມະຊາດ, ວັດທະນະທຳທີ່ສວຍງາມ, ອາຫານການກິນ, ການນຸ່ງຖື ແລະ ຜະລິຕະພັນສິນຄ້າອື່ນໆທີ່ເປັນທ່າແຮງຂອງແຂວງຫົວພັນ.
ທ່ານໃຫ້ຮູ້ຕື່ມວ່າ: ງານວາງສະແດງຄັ້ງນີ້ ໄດ້ຮັບການສະໜັບສະໜູນຫຼັກຈາກຄູ່ຮ່ວມຍຸດທະສາດ 2 ບໍລິສັດຄື: ບໍລິສັດ ປີໂຕຣລ້ຽມ ເທຣດດີງລາວ ມະຫາຊົນ ແລະ ບໍລິສັດ ເບຍລາວ, ນອກຈາກນັ້ນກໍຍັງມີ ຫຼາຍບໍລິສັດ ທີ່ໃຫ້ການສະໜັບສະໜູນງານອີກດ້ວຍຈຸດປະສົງຫຼັກໃນການຈັດງານຄັ້ງນີ້, ກໍເພື່ອຊຸກຍູ້ສົ່ງເສີມໃຫ້ຄົນລາວຫັນມານໍາໃຊ້ຜະລິດຕະພັນລາວໃຫ້ຫຼາຍຂຶ້ນ, ພ້ອມດຽວກັນນັ້ນກໍເປັນການປຸກລະດົມຂົນຂວາຍເພີ່ມທະວີການຜະລິດໃນລະດັບຄອບຄົວ ໃຫ້ກາຍເປັນສິນຄ້າທີ່ສາມາດສ້າງລາຍຮັບໃຫ້ແກ່ຄອບ ຄົວໄດ້, ອີກທັງເພື່ອສົ່ງເສີມການຜະລິດຂະໜາດນ້ອຍໃຫ້ກ້າວສູ່ຂະໜາດກາງ ແລະ ໃຫ້ກາຍເປັນຂະ ໜາດໃຫຍ່ໃຫ້ກາຍເປັນອຸດສາຫະກຳການຜະລິດທາງດ້ານປະລິມານ ແລະ ຄຸນນະພາບທີ່ໄດ້ມາດຕະຖານ ທີ່ພ້ອມແຂ່ງຂັນກັບຕະຫຼາດ ເພື່ອຈໍາໜ່າຍຕະຫຼາດພາຍໃນ ແລະ ສົ່ງອອກສູ່ສາກົນໄດ້, ພ້ອມດຽວກັນນີ້, ການຈັດງານໃນຄັ້ງນີ້ຍັງຈະເປັນການເປີດໂອກາດໃຫ້ບັນດາຫົວໜ່ວຍທຸລະກິດທີ່ກໍາລັງຊອກຫາຄູ່ຄ້າໃໝ່ໆ ແລະ ຕ້ອງການເປີດຕົວສິນຄ້າ ແລະ ບໍລິການໃໝ່ໆຂອງບໍລິສັດໃຫ້ບັນດາແຂກທີ່ມາທ່ຽວຊົມງານທັງພາຍໃນ ແລະ ສາກົນໄດ້ຮັບຊາບ, ອີກທັງຍັງເປັນການແລກປ່ຽນຄວາມຮູ້, ເຕັກນິກດ້ານວິຊາການ, ວິທີການ ຜະລິດ ເພື່ອນໍາມາພັດທະນາການຜະລິດສິນຄ້າຂອງຕົນ. ພ້ອມທັງເປັນການໂຄສະນາຄວາມອຸດົມສົມບູນທາງດ້ານຮີດຄອງປະເພນີ-ວັດທະນະທຳ, ການຄ້າ-ການລົງທຶນ, ສະຖານທີ່ທ່ອງທ່ຽວ ແລະ ອື່ນໆ ທີ່ເປັນເອກະລັກຂອງແຂວງທີ່ເປັນເຈົ້າພາບຮ່ວມຈັດງານກໍຄືແຂວງຫົວພັນຕະຫຼອດເຖິງທຸກໆແຂວງທົ່ວປະເທດທີ່ເຂົ້າຮ່ວມງານໃນຄັ້ງນີ້ອີກດ້ວຍ. ງານວາງສະແດງໃນຄັ້ງນີ້ມີຫຼາກຫຼາຍຜະລິດຕະພັນທີ່ຜະລິດ ແລະ ປະກອບຢູ່ ສປປ ລາວ, ເຂົ້າຮ່ວມຫຼາຍກວ່າ 204 ຫ້ອງຂະແໜງ ຜະລິດຕະພັນສິນຄ້າ ຈາກທັງໝົດ 17 ແຂວງ, ມີ 160 ຫົວໜ່ວຍບໍລິສັດ. ໃນນັ້ນ, ຂະແໜງຜະລິດຕະພັນສິນຄ້າທີ່ຈົດກາໝາຍ MadeinLaos (ຊຶ່ງຫ້ອງການສະພາການຄ້າ ແລະ ອຸດສະຫະກໍາແຫ່ງຊາດລາວ ເປັນຜູ້ອະນຸມັດໃຫ້ໃຊ້ ກາໝາຍ MadeinLaos), ຂະແຫນງຜະລິດຕະພັນໜຶ່ງເມື່ອງໜຶ່ງຜະລິດພັນ (ODOP), ຂະແໜງຜະລິດຕະພັນຫັດຖະກຳແຜ່ນແພ, ຜ້າຝ້າຍ, ຜ້າໄໝ, ຫັດຖະກໍາເຄື່ອງເງິນ, ຂະແໜງຜະລິດຕະພັນເຟີນີເຈີ, ເຄື່ອງຕົບແຕ່ງພາຍໃນພາຍບ້ານ, ຂະແໜງຜະລິດ ແລະ ປຸງແຕ່ງກະສິກໍາ, ຂະແໜງຜະລິດຕະພັນອາຫານແລະ ເຄື່ອງດື່ມ, ຂະແໜງຜະລິດຕະພັນອຸດສາຫະກໍາໜັກ-ເບົາ ແລະ ຂະແໜງຜະລິດຕະພັນທ່ອງທ່ຽວ, ບໍລິການ, ຂົນສົ່ງ.
ນອກຈາກນີ້, ພາຍໃນງານຍັງຈະມີຫຼາກຫຼາຍກິດຈະກໍາເຊັ່ນ: ການວາງສະແດງສິນຄ້າ, ງານປະຊຸມສຳມະນາຕ່າງໆໃຫ້ຄວາມຮູ້, ງານພົບປະທຸລະກິດ, ກິດຈະກຳແຈກຂອງລາງວັນ ແລະ ກິດຈະກໍາບັນເທີງອີກຫຼາກຫຼາຍກິດຈະກໍາ ຕະຫຼອດໄລຍະການຈັດງານ.
 |
ໃນງານຖະແຫຼງຂ່າວຄັ້ງນີ້, ຍັງໄດ້ມີພິທີເຊັນບົດບັນທຶກຄວາມເຂົ້າໃຈ ໃນການເປັນຄູ່ຮ່ວມຍຸດທະສາດໃນການຈັດງານຜະລິດຕະພັນລາວ (MadeinLaos) ລະຫ່ວາງ ສະພາການຄ້າ ແລະ ອຸດສາຫະກຳ ແຫ່ງຊາດລາວ ລົງນາມໂດຍ ທ່ານ ນາງ ຈັນທະຈອນ ວົງໄຊ ຮອງປະທານ ສຄອຊ ແລະ ບໍລິສັດ ປີໂຕຣລຽມເທຣດດິ້ງມະຫາຊົນ ລົງນາມໂດຍ ທ່ານ ນາງ ຈັນທະດອມ ເມກສະຫວັນ ຮອງຜູ້ອໍານວຍການໃຫຍ່ ຊຶ່ງທາງບໍລິສັດ ປີໂຕຣລຽມເທຣດດິ້ງມະຫາຊົນ ໄດ້ສືບຕໍ່ໃຫ້ການສະໜັບສະໜູນການຈັດງານຜະລິດຕະພັນລາວ (MadeinLaos) ເປັນໄລຍະເວລາ 3 ປີ (ແຕ່ປີ 2027-2029) ລວມມູນຄ່າໃນການສະໜັບສະໜູນງານຜະລິດຕະພັນລາວ (MadeinLaos) 900 ລ້ານກີບ.
(ຂ່າວ-ພາບ: ສໍານານ)
ຄໍາເຫັນ