ຂ່າວສານຊີອາໄອລາຍງານ ໃນວັນທີ 1 ພະຈິກຜ່ານມາ ວ່າ: ໃນລະຫວ່າງວັນທີ 5 ຫາ 10 ພະຈິກນີ້, ງານວາງສະແດງສິນຄ້ານຳເຂົ້າສາກົນຈີນ ຄັ້ງທີ 6 ຈະຈັດຂຶ້ນຢູ່ສູນວາງສະແດງແຫ່ງຊາດທີ່ຊຽງໄຮ້ ໂດຍມີຫົວຂໍ້ຫຼັກຄື: “ຊົມໃຊ້ອະນາຄົດຮ່ວມກັນໃນຍຸກສະໄໝໃໝ່”. ນີ້ແມ່ນຄັ້ງທຳອິດທີ່ງານວາງສະແດງສິນຄ້ານຳເຂົ້າສາກົນຈີນ ຈັດງານທາງ ອັອຟລາຍ ພາຍຫຼັງເກີດການແຜ່ລະບາດຂອງພະຍາດໂຄວິດ-19 ຊຶ່ງສະແດງໃຫ້ເຫັນເຖິງຄວາມໝັ້ນໃຈ ແລະ ຄວາມຕັດສິນໃຈຂອງຈີນໃນດ້ານການເປີດປະຕູສູ່ພາຍນອກ.
ປີນີ້ແມ່ນການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ຄົບຮອບ 10 ປີ. ໃນຮອບ 10 ປີຜ່ານມາ, ການສ້າງ “ໜຶ່ງແລວໜຶ່ງເສັ້ນທາງ” ໄດ້ຮັບໝາກຜົນອັນອຸດົມສົມບູນ ແລະ ໄດ້ເພີ່ມພະລັງຂັບເຄື່ອນໃໝ່ໃຫ້ກັບການເຕີບໂຕຂອງເສດຖະກິດໂລກ ກໍຄືການຮ່ວມມືສາກົນ. ໃນໄລຍະຜ່ານມາ, ງານວາງສະແດງສິນຄ້ານຳເຂົ້າສາກົນຈີນໄດ້ກາຍເປັນເວທີສະແດງທ່າແຮງຂອງຕົນ ແລະ ເປີດກວ້າງໂອກາດການຕະຫຼາດສຳລັບປະເທດ ແລະ ເຂດແຄ້ວນທີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ”. ສ່ວນງານວາງສະແດງສິນຄ້ານຳເຂົ້າສາກົນຈີນຄັ້ງທີ 6 ທີ່ຈະຈັດຂຶ້ນໃນປີນີ້ ກໍຈະອຳນວຍການສະໜັບສະໜູນ ແລະ ການບໍລິການໃຫ້ແກ່ການຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ໃຫ້ຫຼາຍກວ່າເກົ່າເຊັ່ນກັນ.
ໃນຈຳນວນ 72 ປະເທດ ທີ່ເຂົ້າຮ່ວມງານວາງສະແດງສິນຄ້ານຳເຂົ້າສາກົນຈີນໃນຄັ້ງນີ້ ລວມມີປະເທດຮ່ວມກັນສ້າງ “ໜຶ່ງແລວໜຶ່ງເສັ້ນທາງ” 64 ປະເທດ. ມາຮອດປັດຈຸບັນ, ໃນປະເທດຮ່ວມກັນສ້າງ “ໜຶ່ງແລວໜຶ່ງເສັ້ນທາງ” ມີວິສາຫະກິດຫຼາຍກວ່າ 1.500 ແຫ່ງ ໄດ້ເຊັນສັນຍາວາງສະແດງສິນຄ້ານຳເຂົ້າສາກົນຈີນຄັ້ງທີ 6, ເນື້ອທີ່ວາງສະແດງເກືອບ 80.000 ຕາແມັດ ຊຶ່ງເພີ່ມຂຶ້ນປະມານ 30% ເມື່ອທຽບໃສ່ຄັ້ງຜ່ານມາ.
ງານວາງສະແດງສິນຄ້ານຳເຂົ້າສາກົນຈີນ ບໍ່ພຽງແຕ່ແມ່ນເວທີວາງສະແດງສິນຄ້າ ແລະ ການບໍລິການເທົ່ານັ້ນ, ຍັງເປັນເວທີທີ່ແລກປ່ຽນດ້ານນະໂຍບາຍ, ປຶກສາຫາລືດ້ານກະຕິກາ ແລະ ການເຊື່ອມຕໍ່ດ້ານມາດຕະຖານອີກດ້ວຍ. ນອກນີ້, ງານວາງສະແດງດັ່ງກ່າວຍັງຈະສະໜອງມາດຕະການທີ່ອຳນວຍຄວາມສະດວກດ້ານການຄ້າ, ຈະສະໜອງໂອກາດການຮ່ວມມືດ້ານການລົງທຶນ ແລະ ຍັງຈະສະໜອງພະລັງຂັບເຄື່ອນທີ່ຫຼາຍກວ່າເກົ່າໃຫ້ກັບປະເທດ ແລະ ເຂດແຄ້ວນທີີ່ຮ່ວມກັນສ້າງ “ໜຶ່ງແລວໜຶ່ງເສັ້ນທາງ”.
ຄໍາເຫັນ