ໜີ້ສິນສາທາລະນະຂອງແອັດສະປາຍ ບັນລຸ 1,6 ພັນຕື້ເອີໂຣ

ຂ່າວຕ່າງປະເທດລາຍງານ,ອີງຕາມຂໍ້ມູນທີ່ເປີດເຜີຍໂດຍທະນາຄານແຫ່ງຊາດແອັດສະປາຍ ໃນວັນທີ 22 ເມສາຜ່ານມາວ່າ: ໜີ້ສາທາລະນະຂອງແອັດສະປາຍໄດ້ບັນລຸ 1,6 ພັນຕື້ເອີໂຣ ໃນເດືອນກຸມພາ. ທະນາຄານໄດ້ຢືນຢັນວ່າໜີ້ສິນເພີ່ມຂຶ້ນ 1,2% ໃນເດືອນມັງກອນ ຊຶ່ງເພີ່ມຂຶ້ນ 5,4% ໃນໄລຍະ 12 ເດືອນຜ່ານມາ.
ການເພີ່ມຂຶ້ນດັ່ງກ່າວມີສາເຫດຕົ້ນຕໍມາຈາກຄ່າໃຊ້ຈ່າຍທີ່ສູງຂຶ້ນ ຊຶ່ງເປັນຜົນມາຈາກການແຜ່ລະບາດຂອງພະຍາດໂຄວິດ-19, ລາຄາທີ່ເພີ່ມຂຶ້ນແລະ ອື່ນໆ ສົ່ງຜົນເຮັດໃຫ້ການໃຊ້ຈ່າຍຂອງລັດຖະບານກາງເພີ່ມຂຶ້ນ.ການໃຊ້ຈ່າຍຂອງລັດຖະບານກາງ ແລະ ຊຸມຊົນປົກຄອງຕົນເອງແອັສປາຍ ທັງໝົດເພີ່ມຂຶ້ນ, ແນວໃດກໍຕາມ, ໜີ້ປະກັນສັງຄົມບໍ່ໄດ້ມີການປ່ຽນແປງຢ່າງຫຼວງຫຼາຍ. ບົດລາຍງານຍັງລະບຸດ້ວຍວ່າໜີ້ສິນຂອງອໍານາດການປົກຄອງທ້ອງຖິ່ນຫຼຸດລົງເລັກນ້ອຍ.
ບົດລາຍງານຂອງທະນາຄານແຫ່ງຊາດແອັດສະປາຍ ບໍ່ໄດ້ລະບຸອັດຕາສ່ວນໜີ້ສິນສາທາລະນະຕໍ່ GDP ຂອງປະເທດຢ່າງຊັດເຈນ ແຕ່ໄດ້ເປີດເຜີຍເຫັນວ່າໜີ້ສິນຢູ່ທີ່ 107,7% ຂອງ GDP ໃນທ້າຍປີ 2023 ຊຶ່ງຕໍ່າກວ່າທີ່ຄາດຄະເນໄວ້  108,1% ໃນເດືອນກັນຍາເລັກນ້ອຍ ແລະ 109,7% ໃນເດືອນມິຖຸນາ. ການຫຼຸດລົງນີ້ມີສາເຫດມາຈາກການເຕີບໂຕທາງເສດຖະກິດຂອງແອັດສະປາຍ 2,5 ໃນປີຜ່ານມາ, ລັດຖະບານແອັດສະປາຍຄາດຄະເນວ່າອັດຕາສ່ວນໜີ້ສິນສາທາລະນະຕໍ່ GDP ຈະຫຼຸດລົງເຖິງ 106,3% ໃນປີນີ້, 105,4% ໃນປີ 2025 ແລະ 104,4% ໃນປີ 2026.