ກອງປະຊຸມຄັ້ງນີ້ ໄດ້ຮັບກຽດເປັນປະທານຮ່ວມໂດຍ ສະຫາຍ ແຂກແກ້ວ ວົງປະເສີດ ກຳມະການພັກເມືອງ ຫົວໜ້າຄະນະໂຄສະນາອົບຮົມເມືອງ ແລະ ສະຫາຍ ນາງ ພອນດາວັນ ອາສາພູທອນ ຮອງປະທານສະຫະພັນກຳມະບານເມືອງພ້ອມດ້ວຍບັນດາຫົວໜ້າໜ່ວຍງານ,ພະນັກງານ-ວິຊາການ ແລະ ສະມາຊິກກຳມະບານພາຍໃນໜ່ວຍເຂົ້າຮ່ວມ.
ສະຫາຍ ສີກາ ລ້ວນມະນີວົງ ປະທານໜ່ວຍກຳມະບານ ຫົວໜ້າໜ່ວຍງານອົບຮົມ ໄດ້ສະເໜີບົດສະຫຼຸບ ແລະ ຕີລາຄາຄືນການຈັດຕັ້ງ-ປະຕິບັດຂໍ້ແຂ່ງຂັນ “5 ເປັນເຈົ້າ” ປະຈຳປີ 2026, ເຊິ່ງເປັນການທົບທວນຜົນງານຕົວຈິງຂອງໜ່ວຍໃນໄລຍະ 1 ປີຜ່ານມາ.
ເນື້ອໃນການປະເມີນ ໄດ້ສຸມໃສ່ການຈັດຕັ້ງ-ປະຕິບັດຂໍ້ແຂ່ງຂັນ “5 ເປັນເຈົ້າ” ຕາມແນວທາງ ແລະ ແຜນການທີ່ວາງໄວ້, ພ້ອມທັງທົບທວນຈຸດເດັ່ນ, ຈຸດອ່ອນ, ບັນຫາ-ຂໍ້ຫຍຸ້ງຍາກ ແລະ ບົດຮຽນຈາກການດຳເນີນງານ ເພື່ອນຳໄປປັບປຸງວຽກງານໃນໄລຍະຕໍ່ໄປ.
ການປະເມີນຍັງເນັ້ນໃສ່ການຍົກສູງວຽກງານກຳມະບານໃຫ້ມີແຜນງານຊັດເຈນ, ການມອບໝາຍໜ້າທີ່ຮັບຜິດຊອບໃຫ້ແຕ່ລະສະມາຊິກ, ການຕິດຕາມ-ກວດກາວຽກງານ ແລະ ການສະຫຼຸບປະເມີນຜົນໃຫ້ເປັນໄປຢ່າງສະເໝີຕົ້ນສະເໝີປາຍ.ພ້ອມນີ້,ບັນດາສະມາຊິກກຳມະ
ບານໄດ້ຮ່ວມກັນສົນທະນາ ແລະ ແລກປ່ຽນຄຳເຫັນຢ່າງກົງໄປກົງມາ, ທັງສະເໜີຈຸດດີທີ່ຄວນຮັກສາ, ຈຸດອ່ອນທີ່ຄວນແກ້ໄຂ ແລະ ບັນຫາ-ຂໍ້ຫຍຸ້ງຍາກທີ່ຍັງຄົງຄ້າງ.ໄດ້ເນັ້ນໃຫ້ມີການປັບປຸງວິທີການຈັດຕັ້ງວຽກ, ການປະສານງານ, ການແບ່ງວຽກ ແລະ ການຕິດຕາມວຽກງານໃຫ້ມີຄວາມຄ່ອງຕົວ, ເປັນລະບຽບ, ຮັດກຸມ ແລະ ສາມາດບັນລຸຜົນຕາມແຜນການ.
ພ້ອມກັນນີ້, ຍັງໄດ້ເນັ້ນໃສ່ການຍົກສູງວຽກງານສຶກສາ-ອົບຮົມ, ການຄົ້ນຄວ້າກຳແໜ້ນມະຕິ, ຄຳສັ່ງ ແລະ ແນວທາງຕ່າງໆຂອງສູນກາງ, ແຂວງ ແລະ ເມືອງ, ພ້ອມທັງປະສານສາຍຕັ້ງ ແລະ ສາຍຂວາງໃຫ້ກົມກຽວ ເພື່ອໃຫ້ວຽກງານສາມາດດຳເນີນໄປຕາມກຳນົດເວລາ ແລະ ບັນລຸເປົ້າໝາຍ.
ໂອກາດດັ່ງກ່າວ, ສະຫາຍ ນາງ ພອນດາວັນ ອາສາພູທອນ ໄດ້ມີຄຳເຫັນຕໍ່ວຽກງານກຳມະບານ ໂດຍເນັ້ນໃຫ້ໜ່ວຍກຳມະບານສືບຕໍ່ເອົາໃຈໃສ່ການຈັດຕັ້ງ-ປະຕິບັດຂໍ້ແຂ່ງຂັນ “5 ເປັນເຈົ້າ” ໃຫ້ເປັນຮູບປະທຳ, ມີຜົນງານສາມາດກວດສອບ ແລະ ປະເມີນຜົນໄດ້.
ພ້ອມທັງໃຫ້ຍົກສູງຈິດສຳນຶກ, ຄວາມສາມັກຄີ, ມີວິໄນ ແລະ ຄວາມຮັບຜິດຊອບຂອງສະມາຊິກ, ສ້າງບັນຍາກາດໃຫ້ການເຄື່ອນໄຫວກຳມະບານມີຄວາມຄຶກຄື້ນ, ມີຄວາມສາມັກຄີ ແລະ ສາມາດສ້າງຜົນງານໃໝ່ໆໃຫ້ແກ່ໜ່ວຍງານ.
ຈາກນັ້ນຕອນທ້າຍ, ສະຫາຍ ແຂກແກ້ວ ວົງປະເສີດ ໄດ້ໃຫ້ກຽດໂອ້ລົມ ໂດຍເນັ້ນໃຫ້ບັນດາສະມາຊິກກຳມະບານທຸກສະຫາຍ ເອົາໃຈໃສ່ສູງຕໍ່ການຈັດຕັ້ງ-ປະຕິບັດ “5 ເປັນເຈົ້າ” ໃຫ້ມີແຜນງານຊັດເຈນ, ມີການມອບໝາຍໜ້າທີ່, ມີການຕິດຕາມ ແລະ ມີການປະເມີນຜົນຢ່າງເປັນລະບົບ.ຂ່າວ-ພາບ: ສີສົມບູນ ວົງວຽງຄຳ
ຄໍາເຫັນ