ສະຫາຍ ຫຸມພັນ ຈັນທະລາ ໄດ້ຜ່ານຮ່າງບົດລາຍງານການເມືອງຂອງໜ່ວຍພັກ, ຊຶ່ງໃນໄລຍະ 5 ປີ 2021-2025 ຜ່ານມາ, ຄະນະໜ່ວຍພັກ ໄດ້ຖືເອົາການສຶກສາອົບຮົມການເມືອງ - ແນວຄິດໃຫ້ແກ່ສະມາຊິກພັກ, ພະນັກງານ - ລັດຖະກອນ; ນຳພາການພັດທະນາວຽກງານຊາວໜຸ່ມ, ວຽກງານປ້ອງກັນພາຍໃນສຳນັກງານໃຫ້ມີຄວາມສະຫງົບ ແລະ ສົ່ງເສີມສ້າງຕົວແບບຊາວໜຸ່ມ, ຂະຫຍາຍກອງທຶນພັດທະນາຊາວໜຸ່ມໄດ້ 7 ເມືອງ ກວມ 100%, ລົງກໍ່ສ້າງຮາກຖານການເມືອງຢ່າງຕັ້ງໜ້າ, ປັບປຸງ ແລະ ເພີ່ມທະວີການຄຸ້ມຄອງບໍລິຫານ; ຊຸກຍູ້ອົງການຈັດຕັ້ງມະຫາຊົນເຄື່ອນໄຫວຢ່າງເປັນປົກກະຕິ; ພົວພັນກັບຕ່າງປະເທດຕາມແນວທາງຂອງພັກ; ໃນໄລຍະຜ່ານມາ ສາມາດຍາດໄດ້ໃບຢ້ງຢືນໜ່ວຍພັກປອດໃສ, ເຂັ້ມແຂງ ແລະ ໜັກແໜ້ນ ໄດ້ 4 ປີລຽນຕິດ; ຕິດຕາມກວດກາພັກຢ່າງຕໍ່ເນື່ອງ ແລະ ນຳພາປະຕິບັດພາລະບົດບາດ, ໜ້າທີຂອງ 5 ຂະແໜງການ ມີພະນັກງານທັງໝົດ 24 ສະຫາຍ, ຍິງ 15 ສະຫາຍ ພ້ອມທັງໃຫ້ຄຳປຶກສາທາງອອນລາຍໃນວຽກງານຊາວໜຸ່ມເຍົາວະຊົນ ແລະ ລົງໂຄສະນາໃຫ້ຄຳປຶກສາຕາມເຂດຈຸດສຸມຊາວໜຸ່ມ - ໄວໝຸ່ມ. ໃນກອງປະຊຸມ, ຍັງໄດ້ຜ່ານແຜນພັດທະນາຂອງໜ່ວຍພັກ. ຈາກນັ້ນ, ກໍໄດ້ດຳເນີນການປ່ອນບັດຄັດເລືອກເອົາຄະນະພັກຊຸດໃໝ່ ໂດຍເປັນເອກະສັນກັນຄັດເລືອກເອົາສະຫາຍ ຫຸມພັນ ຈັນທະລາ ເປັນເລຂາໜ່ວຍພັກ, ສະຫາຍ ນາງ ມະໄລຄຳ ໄຊຍະເທດ ເປັນຮອງ ແລະ ສະຫາຍ ສົມເພັງ ຍິນແສງ ເປັນກຳມະການໜ່ວຍພັກ ທັງເປັນປະທານກວດກາໜ່ວຍພັກ ແລະ ສະຫາຍ ນາງ ວິໄລພອນ ອຸນາພອນ ເປັນຮອງປະທານກວດກາ.
(ຂ່າວ: ສົມຄິດ ແກ້ວນວນລາ)
ຄໍາເຫັນ