ທ່ານ ຄຣິສໂຕເຟີ ລັກຊອນ ນາຍົກລັດຖະມົນຕີນູແວນເຊລັງ ກ່າວວ່າ: ອຸທິຍານແຫ່ງຊາດທີ່ມີຊື່ສຽງ ແລະ ເສັ້ນທາງຍ່າງປ່າທີ່ມີຄວາມນິຍົມ ຖືເປັນຊັບສົມບັດພິເສດສຳລັບຊາວນູແວນເຊລັງ, ໃນຂະນະທີ່ນັກທ່ອງທ່ຽວຕ່າງປະເທດຄວນມີສ່ວນຮ່ວມຈ່າຍຄ່າທຳນຽມໃນສະຖານທີ່ທີ່ມີຄົນແອອັດ. ໂດຍລາຍຮັບປີລະ 62 ລ້ານໂດລານິວຊີແລນ ຈາກການເກັບຄ່າທໍານຽມນີ້ຈະຖືກນໍາໄປລົງທຶນພັດທະນາສະຖານທີ່ທ່ອງທ່ຽວເຫຼົ່ານີ້.
ທ່ານຍັງໄດ້ກ່າວອີກວ່າ: ໄດ້ຍິນເພື່ອນມິດນາໆຊາດກ່າວຫຼາຍຄັ້ງວ່າ ພວກເຂົາເຈົ້າຮູ້ສຶກແປກໃຈທີ່ສາມາດໄປທ່ຽວຊົມສະຖານທີ່ທີ່ສວຍງາມທີ່ສຸດແຫ່ງໜຶ່ງຂອງໂລກໄດ້ໂດຍບໍ່ເສຍຄ່າ ຈຶ່ງເປັນເລື່ອງສົມຄວນທີ່ນັກທ່ອງທ່ຽວຕ່າງປະເທດຈະຕ້ອງເສຍຄ່າທຳນຽມລະຫວ່າງ 20-40 ໂດລານິວຊີແລນ ຕໍ່ຄົນ ສຳລັບສະຖານທີ່ທ່ອງທ່ຽວເຫຼົ່ານີ້.
ລັດຖະບານນູແວນເຊລັງເຫັນວ່າ: ການທ່ອງທ່ຽວເປັນຕົວຊຸກຍູ້ເສດຖະກິດທີ່ສໍາຄັນ ໃນຂະນະທີ່ປະເທດກຳລັງຟື້ນຕົວຈາກການຖົດຖອຍຂອງປີຜ່ານມາ. ໂດຍຈະເລີ່ມຕັ້ງແຕ່ເດືອນພະຈິກນີ້ດ້ວຍການຍົກເວັ້ນວີຊາຜ່ານແດນສຳລັບນັກທ່ອງທ່ຽວຈີນ ເພື່ອກະຕຸ້ນການທ່ອງທ່ຽວ.
ຄ່າທໍານຽມດັ່ງກ່າວຈະຖືກພິຈາລະນາທົດລອງໃຊ້ໃນສະຖານທີ່ທ່ອງທ່ຽວເຊັ່ນ: Cathedral Cove, Tongariro Crossing, Milford Track, ແລະ Mount Cook ຊຶ່ງເປັນບ່ອນທີ່ນັກທ່ອງທ່ຽວຕ່າງປະເທດນິຍົມ ຊຶ່ງກວມອັດຕາສ່ວນເຖິງ 80% ຂອງຜູ້ມາທ່ອງທ່ຽວ.
ທ່ານນາຍົກລັດຖະມົນຕີ ເນັ້ນໜັກວ່າ: ຊາວນູແວນເຊລັງ ຈະບໍ່ເສຍຄ່າທຳນຽມໃນການເຂົ້າຊົມເຂດອະນຸລັກເຫຼົ່ານີ້, ເນື່ອງຈາກເປັນມໍລະດົກແຫ່ງຊາດທີ່ຊາວນູແວນເຊລັງຄວນໄດ້ເຂົ້າຊົມໂດຍບໍ່ເສຍຄ່າ.
ຄໍາເຫັນ