 |
ການຈັດຊຸດຝຶກອົບຮົມໃນຄັ້ງນີ້, ເພື່ອເສີມສ້າງຂີດຄວາມສາມາດໃຫ້ພະນັກງານກົມກວດກາລັດ, ຂະແໜງ ກວດກາລັດ ພະແນກການເງິນ 7 ແຂວງ ແລະ ພະນັກງານເຮັດໜ້າທີ່ກວດກາລັດ ບັນດາກົມອ້ອມຂ້າງກະຊວງການເງິນ ທີ່ເຮັດວຽກງານຕິດຕາມ, ກວດກາ ແລະ ການສິດສອນວຽກງານກວດກາໃຫ້ມີຄຸນນະພາບ ຕອບສະ ໜອງໄດ້ຕາມຄວາມຮຽກຮ້ອງຕ້ອງການ ຂອງໜ້າທີ່ວຽກງານວິຊາສະເພາະກວດກາໃນໄລຍະໃໝ່, ເປັນກຳລັງແຮງປະກອບສ່ວນຊ່ວຍຄະນະພັກ-ຄະນະນຳຂະແໜງການເງິນ ໃນການຕິດຕາມ, ກວດກາ, ສະກັດກັ້ນ, ຕ້ານການສໍ້ລາດບັງຫຼວງ ແລະ ແກ້ໄຂຜົນການກວດກາ-ກວດສອບໃນຂົງເຂດການເງິນ ນັບແຕ່ສູນກາງຮອດທ້ອງຖິ່ນ ເພື່ອເຮັດໃຫ້ປະກົດການຫຍໍ້ທໍ້ຫຼຸດລົງເທື່ອລະກ້າວ ແລະ ເພື່ອຮອງຮັບແຜນປະຕິຮູບ ແລະ ແຜນພັດທະນາຂະແໜງການເງິນ 5 ປີໃຫ້ສອດຄ່ອງກັບການຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກ, ມະຕິກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງການເງິນ ໂດຍສະເພາະສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 2026 ຢ່າງເປັນຂະບວນຟົດຟື້ນ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຕາມຄໍາສັ່ງຂອງນາຍົກລັດຖະມົນຕີ ສະບັບເລກທີ 18/ນຍ, ລົງວັນທີ 16 ກັນຍາ 2021 ວ່າດ້ວຍການເພີ່ມທະວີການຄຸ້ມຄອງ ແລະ ຕ້ານການຮົ່ວໄຫຼຂອງລາຍຮັບງົບປະມານແຫ່ງລັດ.
ວຽກງານກວດກາ ເປັນວຽກງານໜຶ່ງທີ່ສຳຄັນສອດຫ້ອຍ ແລະ ຄຽງຄູ່ກັບທຸກຂົງເຂດວຽກງານ ເປັນວຽກງານໜຶ່ງທີ່ຫຍຸ້ງຍາກລະອຽດອ່ອນ, ແຕ່ມີບົດບາດສຳຄັນຫຼາຍ ເພາະວຽກງານກວດກາ ເປັນເຄື່ອງມືວັດແທກຜົນ ສຳເລັດການນຳພາຂອງພັກ ແລະ ການຈັດຕັ້ງປະຕິບັດລະບຽບກົດໝາຍຂອງລັດ ທັງແມ່ນມາດຕະການຕົ້ນຕໍໃນການກະຕຸກ, ຊຸກຍູ້ໃນການຜັນຂະຫຍາຍ ແລະ ຈັດຕັ້ງປະຕິບັດແນວທາງນະໂຍບາຍຂອງພັກ, ກົດໝາຍຂອງລັດ ໃຫ້ມີປະສິດທິຜົນ, ມີຄວາມສັກສິດ, ໜັກແໜ້ນ, ເຂັ້ມແຂງ.
 |
ການຝຶກອົບຮົມໃນຄັ້ງນີ້, ຈະດຳເນີນໄປເປັນເວລາ 5 ວັນ, (ນັບແຕ່ວັນທີ 2-6 ມີນາ 2026) ຊຶ່ງຈະໄດ້ລົງເລິກ 3 ຫົວຂໍ້ສຳຄັນຄື: ວຽກງານກວດກາລັດ (ກວດກາການເງິນ ແລະ ກວດກາການລົງທຶນ); ວຽກງານການຕິດຕາມ (ກວດກາ ການປະຕິບັດຜົນການກວດກາ) ແລະ ວຽກງານການຕິດຕາມ (ກວດກາ ການປະຕິບັດຜົນການກວດສອບ).
ໂອກາດນີ້, ທ່ານປະທານກອງປະຊຸມ ຍັງໄດ້ຮຽກຮ້ອງມາຍັງບັນດາສຳມະນາກອນ ຈົ່ງພ້ອມກັນເອົາໃຈໃສ່ໃນການຄົ້ນຄວ້າ, ຮໍ່າຮຽນ ປະກອບຄໍາຄິດ ຄໍາເຫັນ ແລກປ່ຽນບົດຮຽນຢ່າງຕັ້ງໜ້າ ເພື່ອໄປປັບປຸງນຳໃຊ້ເຂົ້າໃນວຽກງານຕົວຈິງ ເຮັດໃຫ້ວຽກງານກວດກາມີຄຸນນະພາບ ນັບມື້ນັບເຂັ້ມແຂງຂຶ້ນເປັນກ້າວໆ.
ຂ່າວ: ກະຊວງການເງິນ
ຄໍາເຫັນ