ຍົກລະດັບວຽກງານສາສະໜາໃຫ້ ອພສ ໃນນະຄອນຫຼວງວຽງຈັນ

ກົມສາສະໜາສູນກາງແນວລາວສ້າງຊາດ (ສນຊ) ຮ່ວມກັບກຳມາທິການປົກຄອງສົງອພສສູນກາງໄດ້ຈັດກອງປະຊຸມຝຶກອົບຮົມວຽກງານສາສະໜາໃຫ້ແກ່ຄະນະອົງການພຸດທະສາສະໜາສຳພັນແຫ່ງສປປລາວ(ອພສ) ແລະ ອພສ 9 ຕົວເມືອງ ຂອງນະຄອນຫຼວງວຽງຈັນ (ນວ) ຂຶ້ນໃນລະຫວ່າງວັນທີ 24-25 ຕຸລານີ້ທີ່ ສນຊ ໂດຍການເປັນປະທານຂອງທ່ານ ນາງ ຄຳຈັນ ພົມແສງສະຫວັນ ຮອງປະທານ ສນຊ ຜູ້ບໍ່ປະຈຳການ ຫົວໜ້າຄະນະທີ່ປຶກສາວຽກງານສາສະໜາ ສນຊ, ໂດຍເປັນກຽດເຂົ້າຮ່ວມຂອງພະອາຈານໃຫຍ່ ບຸນສ່ວນ ພັນທະວົງ ຮອງປະທານສູນກາງ ອພສ, ມີປະທານອພສນວ, ມີຄະນະປະຈຳ ຮອງປະທານ ອພນ ນວ, ພະເຖລະນຸເຖລະ, ພະນັກງານວິຊາການຂອງກົມສາສະໜາສນຊ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ. 
ທ່ານ ນາງຄຳຈັນພົມແສງສະຫວັນ ກ່າວວ່າ: ການຝຶກອົບຮົມໃນຄັ້ງນີ້ແມ່ນມີຄວາມສໍາຄັນຫຼາຍ ຊຶ່ງສາສະໜາພຸດໄດ້ມີບົດບາດເປັນປັດໄຈສໍາຄັນໃນພາລະກິດທ້ອນໂຮມປະເທດຊາດສະໄໝກ່ອນ ກໍຄືພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ. ພ້ອມນັ້ນ, ສາສະໜາພຸດກໍໄດ້ມີຄຸນປະໂຫຍດອັນໃຫຍ່ຫຼວງໃນການປົກປັກຮັກສາ ແລະ ພັດທະນາພື້ນຖານວັດທະນະທຳແຫ່ງຊາດ ຊຶ່ງເອກະສານທີ່ນຳມາສະເໜີໃນການຝຶກອົບຮົມໃນຄັ້ງນີ້ມີ5 ເອກະສານຕົ້ນຕໍຄື:ມູນເຊື້ອຂອງຊາດ;ບົດບາດຂອງສາສະໜາພຸດຕໍ່ສັງຄົມລາວ;ທັດສະນະຂອງພັກ ແລະ ນະໂຍບາຍຂອງລັດຕໍ່ການເຊື່ອຖືສາສະໜາ; ຍົກສູງສະຕິລະວັງຕົວຕໍ່ກົນອຸບາຍຂອງສັດຕູໃນການສວຍໃຊ້ສາສະໜາ; ດຳລັດ 315/ລບ ວ່າດ້ວຍການປົກປ້ອງ ແລະ ການເຄື່ອນໄຫວສາສະໜາ ຢູ່ ສປປ ລາວ. ນອກນັ້ນ, ມີການບັນຍາຍກ່ຽວກັບວຽກງານການບໍລິຫານຫ້ອງການອພສ ສູນກາງ ຈາກພະອາຈານຫົວໜ້າຫ້ອງການ ອພສ ສູນກາງ ແລະ ການປະກອບຄຳເຫັນຂອງພະອາຈານ ຫົວໜ້າກຳມາທິການປົກຄອງສົງ ອພສ ສູນກາງ. ສະນັ້ນ, ຈຶ່ງຮຽກຮ້ອງໃຫ້ພະອາຈານທຸກອົງ ຈົ່ງສຸມສະຕິປັນຍາເພື່ອຄົ້ນຄວ້າ ແລະ ແລກປ່ຽນບົດຮຽນຕ່າງໆນໍາບັນດາວິທະຍາກອນ ເພື່ອເຮັດແນວໃດໃຫ້ກອງປະຊຸມດັ່ງກ່າວໄດ້ຮັບຜົນສຳເລັດຕາມລະດັບຄາດໝາຍທີ່ວາງໄວ້.
ການຈັດກອງປະຊຸມຝຶກອົບຮົມໃນຄັ້ງນີ້ຂຶ້ນເພື່ອແນໃສ່ສຶກສາອົບຮົມດ້ານການເມືອງ-ແນວຄິດໃຫ້ແກ່ພະສົງ-ສາມະເນນໄດ້ຮັບຮູ້, ເຂົ້າໃຈແລະກຳແໜ້ນແນວທາງນະໂຍບາຍຂອງພັກແລະລະບຽບກົດໝາຍຂອງລັດໃນແຕ່ລະໄລຍະ ເພື່ອນຳໄປຄົ້ນຄວ້າເຂົ້າໃນວຽກງານຕົວຈິງທີ່ຮັບຜິດຊອບ.
(ຂ່າວ-ພາບ: ວັນເພັງ)