ຂ່າວຕ່າງປະເທດລາຍງານ ເມື່ອບໍ່ດົນມານີ້, ອົງການເພື່ອການຮ່ວມມື ແລະ ການພັດທະນາທາງດ້ານເສດຖະກິດ (OECD) ໄດ້ເປີດເຜີຍບົດລາຍງານໂດຍລະບຸວ່າ: ເສດຖະກິດໂລກໃນປີ 2024 ມີທ່າອ່ຽງຂະຫຍາຍຕົວໄດ້ດີກວ່າທີ່ຄາດຄະເນໄວ້ກ່ອນໜ້ານີ້ ໂດຍໄດ້ຮັບແຮງໜູນມາຈາກທ່າອ່ຽງເສດຖະກິດທີ່ສົດໃສຂອງອາເມຣິກາ ຊຶ່ງຊ່ວຍຊົດເຊີຍການຫຼຸດລົງຂອງເສດຖະກິດໃນເອີໂຣໂຊນ.
OECD ລະບຸວ່າ: ບົດລາຍງານທ່າອ່ຽງເສດຖະກິດຄັ້ງຫຼ້າສຸດທີ່ເປີດເຜີຍເມື່ອບໍ່ດົນມານີ້ລະບຸວ່າ ການຂະຫຍາຍຕົວຂອງເສດຖະກິດໂລກໃນປີ 2024 ມີທ່າອ່ຽງຫຼຸດລົງສູ່ລະດັບ 2,9% ຈາກລະດັບ 3,1% ໃນປີ 2023 ແຕ່ໂຕເລກດັ່ງກ່າວຢູ່ໃນລະດັບສູງກວ່າ 2,7% ທີ່ OECD ເຄີຍຄາດຄະເນໄວ້ໃນເດືອນພະຈິກ 2023. ຂະນະດຽວກັນ, OECD ຍັງຄົງຮັກສາໂຕເລກການຄາດຄະເນການຂະຫຍາຍຕົວຂອງເສດຖະກິດໂລກໃນປີ 2025 ໄວ້ໃນລະດັບ 3% ໂດຍຄາດວ່າເສດຖະກິດໃນປີດັ່ງກ່າວຈະໄດ້ແຮງໜູນຈາກທະນາຄານກາງຫຼາຍແຫ່ງພາກັບປັບຫຼຸດອັດຕາດອກເບ້ຍ ເນື່ອງຈາກແຮງກົດດັນດ້ານເງິນເຟີ້ເລີ່ມອ່ອນແຮງລົງ. OECD ຄາດວ່າ: ເສດຖະກິດອາເມຣິກາຈະຂະຫຍາຍຕົວ 2,1% ໃນປີ 2024 ຊຶ່ງເພີ່ມຂຶ້ນຈາກໂຕເລການຄາດຄະເນກ່ອນໜ້ານີ້ທີ່ລະດັບ 1,5% ແລະ ຄາດວ່າ ເສດຖະກິດໃນປີ 2025 ຈະຂະຫຍາຍຕົວ 1,7% ຊຶ່ງບໍ່ປ່ຽນແປງຈາກການຄາດຄະເນເດີມ ເນື່ອງຈາກການປັບໂຕຫຼຸດລົງຂອງເງິນເຟີ້ຈະຊ່ວຍການຂະຫຍາຍຕົວຂອງຄ່າຈ້າງ ແລະ ຈະກະຕຸ້ນໃຫ້ທະນາຄານກາງອາເມຣິກາ (ເຟດ) ປັບຫຼຸດອັດຕາດອກເບ້ຍ. ໃນສ່ວນຂອງປະເທດຈີນ OECD ລະບຸວ່າ: ການທີ່ຈີນຍັງຄົງປະເຊີນກັບວິກິດການໃນຕະຫຼາດອະສັງຫາລິມະຊັບ ແລະ ພາວະຂາດຄວາມເຊື່ອໝັ້ນຂອງຜູ້ບໍລິໂພກເຮັດໃຫ້ການຂະຫຍາຍຕົວຂອງເສດຖະກິດຈີນມີທ່າອ່ຽງຫຼຸດລົງສູ່ລະດັບ 4,7% ໃນປີ 2024 ຈາກລະດັບ 5,2% ໃນປີ 2023 ໂດຍໂຕເລກດັ່ງກ່າວບໍ່ປ່ຽນແປງຈາກການຄາດຄະເນເມື່ອເດືອນພະຈິກ 2023. OECD ຍັງລະບຸຕື່ມວ່າ: ການຫຼຸດລົງຂອງເສດຖະກິດເຢຍລະມັນຈະສົ່ງຜົນກະທົບຕໍ່ເສດຖະກິດເອີໂຣໂຊນເປັນວົງກວ້າງ ໂດຍຄາດຄະເນວ່າການຂະຫຍາຍຕົວຂອງເສດຖະກິດເອິໂຣໂຊນໃນປີ 2024 ຈະຢູ່ໃນລະດັບພຽງ 0,6% ຈາກລະດັບ 0,5% ໃນປີ 2023 ຊຶ່ງໂຕເລກດັ່ງກ່າວຫຼຸດລົງຈາກລະດັບ 0,9% ທີ່ຄາດຄະເນໄວ້ກ່ອນໜ້ານີ້. ນອກຈາກນີ້, OECD ຍັງປັບຫຼຸດການຄາດຄະເນການຂະຫຍາຍຕົວຂອງເສດຖະກິດເອີໂຣໂຊນໃນປີ 2025 ລົງສູ່ລະດັບ 1,3% ຈາກໂຕເລກການຄາດຄະເນເດີມທີ່ລະດັບ 1,5%. ທັງນີ້, ໃນຂະນະທີ່ທ່າອ່ຽງເສດຖະກິດຂອງປະເທດຂະໜາດໃຫຍ່ມີຄວາມແຕກຕ່າງກັນ ແຕ່ OECD ເຫັນວ່າອັດຕາເງິນເຟີ້ໃນອາເມຣິກາ ແລະ ເອີໂຣໂຊນ ຫຼຸດລົງຫຼາຍກວ່າທີ່ຄາດຄະເນໄວ້ເມື່ອເດືອນພະຈິກ ຊຶ່ງອາດຈະປູທາງໃຫ້ເຟດເລີ່ມປັບຫຼຸດອັດຕາດອກເບ້ຍໃນໄຕມາດທີ 2 ຂອງປີນີ້ ແລະ ອາດຈະເຮັດໃຫ້ທະນາຄານກາງເອີຣົບ (ECB) ປັບຫຼຸດອັດຕາດອກເບ້ຍລົງໃນໄຕມາດທີ 3.
ຄໍາເຫັນ