 |
ໂອກາດເຂົ້າຮ່ວມວາງສະແດງຜົນງານການກວດກູ້ລະເບີດລູກຫວ່ານ ທີ່ຕົກຄ້າງຢູ່ລາວ ໃນກອງປະຊຸມທົບທວນສົນທິສັນຍາວ່າດ້ວຍການເກືອດຫ້າມລະເບີດລູກຫວ່ານ ຮອບວຽນທີ 3 (3RC-CCM) ຢູ່ຫໍປະຊຸມແຫ່ງຊາດ. ທ່ານ ຄຳມະນີ ບຸນເຕີມ ພະນັກງານພົວພັນອາວຸໂສຂອງອົງການ HALO Trust ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນ ໃນວັນທີ 17 ກັນຍານີ້ວ່າ: ອົງການ HALO Trust ໄດ້ເລີ່ມຈັດຕັ້ງປະຕິບັດໂຄງການມາຕັ້ງແຕ່ປີ 2012 ຈົນເຖິງປັດຈຸບັນ ຊຶ່ງມີບົດບາດສໍາຄັນໃນການສໍາຫຼວດ, ທຳລາຍ ແລະ ເຜີຍແຜ່ຄວາມຮູ້ກ່ຽວກັບໄພອັນຕະລາຍຈາກລະເບີດຕົກຄ້າງ ເພື່ອແນໃສ່ຊ່ວຍເຫຼືອຊຸມຊົນທີ່ຍັງມີຄວາມສ່ຽງ. ໂດຍເລີ່ມປະຕິບັດງານຢູ່ ສປປ ລາວ ໂດຍສະເພາະໄດ້ສຸມໃສ່ຈັດຕັ້ງປະຕິບັດເກັບກູ້ ລບຕ ຢູ່ທົ່ວແຂວງສະຫວັນນະເຂດ ກວມເອົາ 13 ເມືອງ ແລະ 1 ນະຄອນ ຊຶ່ງໄດ້ເຄື່ອນໄຫວຕາມ 3 ກິດຈະກໍາຫຼັກຄື: ການເກັບກູ້ລະເບີດ; ການສໍາຫຼວດ ແລະ ທຳລາຍລະເບີດເຄື່ອນທີ່; ການໂຄສະນາສຶກສາຄວາມສ່ຽງໄພຈາກ ລບຕ. ໃນການຈັດຕັ້ງປະຕິບັດວຽກງານດັ່ງກ່າວຜ່ານມາ, ອົງການ HALO Trust ສາມາດເກັບກູ້ ແລະ ທຳລາຍລະເບີດລູກຫວ່ານໄດ້ຫຼາຍກວ່າ 90,000 ໜ່ວຍ, ໃນເນື້ອທີ່ເກັບກູ້ກວ້າງເຖິງ 64,000 ຕາແມັດ. ຢ່າງໃດກໍຕາມ, ໃນພື້ນທີ່ແຂວງສະຫວັນນະເຂດ ຍັງມີຫຼາຍເຂດທີ່ຖືກຈັດເປັນ "ພື້ນທີ່ສີແດງ" ຫຼື ເຂດຢືນຢັນຄວາມອັນຕະລາຍ ຕ້ອງໄດ້ສືບຕໍ່ໃນການເຂົ້າໄປແກ້ໄຂ. ທັງນີ້, ການປະຕິບັດງານດັ່ງກ່າວ ໂດຍໄດ້ຮັບການສະໜັບສະໜູນດ້ານງົບປະມານຈາກ 2 ປະເທດຄື: ສະຫະລັດ ອາເມຣິກາ ແລະ ລັດຖະບານປະເທດແຟັງລັງ (Finland). ນອກຈາກການເກັບກູ້, ອົງການ HALO Trust ຍັງໃຫ້ຄວາມສຳຄັນກັບການສ້າງຄວາມຕື່ນຕົວໃນຊຸມຊົນໂດຍການສົ່ງທີມງານລົງເຜີຍແຜ່ຂໍ້ມູນ-ຄວາມຮູ້ກ່ຽວກັບຮູບຮ່າງລັກສະນະຂອງວັດຖຸຕ້ອງສົງໄສ ແລະ ວິທີການດຳລົງຊີວິດໃຫ້ປອດໄພໃຫ້ປະຊາຊົນ ແລະ ນັກຮຽນຕາມໂຮງຮຽນໃນເຂດທີ່ມີຄວາມສ່ຽງ ລບຕ.
 |
ທ່ານ ຄຳມະນີ ບຸນເຕີມ ໄດ້ເນັ້ນຢໍ້າຕື່ມວ່າ: ບັນຫາລະເບີດຕົກຄ້າງບໍ່ແມ່ນເລື່ອງໄກໂຕ, ເຖິງວ່າບາງທ່ານຈະບໍ່ໄດ້ອາໄສຢູ່ໃນເຂດທີ່ມີຄວາມສ່ຽງ ລບຕ ແຕ່ຍັງມີປະຊາຊົນອີກຈຳນວນຫຼາຍທີ່ຕ້ອງປະເຊີນກັບຄວາມສ່ຽງໃນທຸກໆມື້. ດັ່ງນັ້ນ, ຈຶ່ງຂໍຝາກເຖິງປະຊາຊົນ ແລະ ທຸກພາກສ່ວນໃນສັງຄົມ ໃຫ້ເພີ່ມຄວາມລະມັດລະວັງ. ຫາກພົບເຫັນລະເບີດ ຫຼື ວັດຖຸຕ້ອງສົງໄສບໍ່ຄວນແຕະຕ້ອງ ຫຼື ເຄື່ອນຍ້າຍເອງ, ແຕ່ໃຫ້ຟ້າວແຈ້ງຫາອຳນາດການປົກຄອງບ້ານ, ເມືອງ, ແຂວງ ຫຼື ໂທຫາສາຍດ່ວນ 1603 ເພື່ອໃຫ້ເຈົ້າໜ້າທີ່ຜູ້ມີຄວາມຊ່ຽວຊານເຂົ້າໄປດຳເນີນການກວດສອບ ແລະ ທຳລາຍຢ່າງປອດໄພ.
 |
ຄໍາເຫັນ