ປະໂຫຍດໃນການຄ້ຳປະກັນດ້ານສະບຽງອາຫານເພື່ອຄໍ້າປະກັນສະບຽງອາຫານໃຫ້ແກ່ຄອບຄົວ ສ້າງເສດຖະກິດຄອບຄົວ ແລະ ປະກອບສ່ວນເຂົ້າໃນກິດຈະກຳອາຫານທ່ຽງໃນໂຮງຮຽນພ້ອມດຽວກັນນັ້ນເມື່ອມີການປູກ-ການລ້ຽງຫຼາຍໄດ້ຮັບຜົນຜະລິດຫຼາຍກໍກາຍເປັນສິນຄ້າທີ່ສາມາດສ້າງລາຍຮັບເຂົ້າໃນຄອບຄົວອີກດ້ວຍ.
ນາງ ໄຊສະໝອນ ໄຊຍະສິດ ອາຍຸ 31 ປີປະຊາຊົນຢູ່ບ້ານນາຊຽງດີເມືອງຮຸນ ແຂວງອຸດົມໄຊ ກໍເປັນອີກໜຶ່ງຄອບຄົວທີ່ໄດ້ຮັບທຶນຈາກໂຄງການຊ່ວຍເຫຼືອຂອງອົງການອາຫານໂລກໃນການລ້ຽງໄກ່ພັນໄຂ່ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນເມື່ອບໍ່ດົນມານີ້ວ່າ: ຕົນເອງມີຄວາມຮູ້ສຶກດີໃຈທີ່ໄດ້ຮັບທຶນການຊ່ວຍເຫຼືອການລ້ຽງໄກ່ພັນໄຂ່ເພາະເປັນຜົນດີຫຼາຍໃຫ້ແກ່ຄອບຄົວໂດຍສະເພາະແມ່ນໄດ້ນຳໃຊ້ໄຂ່ທີ່ຕົນລ້ຽງນັ້ນມາປຸງແຕ່ງອາຫານໃຫ້ລູກໆໄດ້ກິນແບບເຕັມທີ່ສ່ວນຫຼາຍອາຫານທີ່ຂາດບໍ່ໄດ້ແລະຕ້ອງມີໄວ້ໃນຄົວເຮືອນກໍຈະເປັນໄຂ່ຖ້າວ່າມີແຕ່ຊື້ໄຂ່ຈາກຕະຫຼາດກໍໄດ້ກິນແບບບາງຄາບອາດບໍ່ພຽງພໍຊຶ່ງພາຍຫຼັງໄດ້ມີໂຄງການສົ່ງເສີມການປູກ-ການລ້ຽງເຂົ້າມາໃຫ້ຄວາມຊ່ວຍເຫຼືອມອບທຶນໃຫ້ຕົນແລະຄອບຄົວແມ່ນເລືອກການລ້ຽງໄກ່ພັນໄຂ່ ຖ້າຈະເລືອກການປູກອີງໃສ່ເງື່ອນໄຂແມ່ນບໍ່ມີເນື້ອທີ່ພຽງພໍແລະໃນເວລານັ້ນກໍເຫັນວ່າໄຂ່ໄກ່ໃນທ້ອງຕະຫຼາດກໍມີຄາລາຂ້ອນຂ້າງແພງ, ປົກກະຕິໃນຄອບຄົວກໍໄດ້ປູກຜັກພໍແຕ່ໄດ້ກິນແລະກໍຕ່ຳຫູກ; ເມື່ອມີໂຄງການດັ່ງກ່າວເຂົ້າມາກໍແຮງເປັນການດີສຳລັບຕົນ. ໂຄງການໄດ້ນຳໄກ່ແມ່ພັນສາວມາມອບໃຫ້ໃນໄລຍະຕົ້ນເດືອນພະຈິກ 2024ຜ່ານມາໃນເບື້ອງຕົ້ນໂຄງການຈະໄດ້ສະໜອງອຸປະກອນສຳລັບເຮັດຄອກໄກ່ ຄົບຊຸດເປັນຕົ້ນ: ຕາໜ່າງ, ຖັງໃສ່ນ້ຳ, ສັງກະສີແລະອຸປະກອນອື່ນໆສຳລັບເຮັດຄອກໄກ່ພ້ອມໂຕໄກ່ພັນແມ່ສາວຈຳນວນ50 ໂຕ ແລະ ຫົວອາຫານຈຳນວນໜຶ່ງ.
ນາງໄຊສະໝອນໄຊຍະສິດໄດ້ໃຫ້ຮູ້ຕື່ມອີກວ່າ: ມາຮອດປັດຈຸບັນໄກ່ແມ່ນອອກໄຂ່ແລ້ວ ຫຼັງຈາກເລີ່ມເຫັນໄກ່ອອກໄຂ່ກໍຮູ້ສຶກມີຄວາມອຸ່ນໃຈຂຶ້ນເພາະວ່າຊ່ວຍຫຼຸດຜ່ອນການຊື້ໄຂ່ຈາກຕະຫຼາດເພື່ອມາປຸງແຕ່ງອາຫານໃຫ້ຄົນໃນຄອບຄົວໄດ້ກິນການປະກອບສ່ວນເຂົ້າໃນໂຄງການອາຫານທ່ຽງໃນໂຮງຮຽນແມ່ນມີຄວາມພູມໃຈຫຼາຍ ເມື່ອເຫັນລູກຫຼານໄດ້ກິນອາຫານອີ່ມ ການປຸງແຕ່ງກໍຖືກຫຼັກອະນາໄມ ກິນອາຫານທີ່ມີປະໂຫຍດ ຊຶ່ງເຮັດໃຫ້ລູກຫຼານມີສຸຂະພາບແຂງແຮງ, ມີເວລາຮຽນຫຼາຍຂຶ້ນ ບໍ່ກັບເມືອກິນເຂົ້າຢູ່ເຮືອນໃນຕອນທ່ຽງ ຫຼຸດຜ່ອນພາລະຂອງພໍ່ແມ່ໃນການແຕ່ງອາຫານທ່ຽງໃຫ້ລູກກິນໃນແຕ່ລະວັນ.ໃນຕໍ່ໜ້າຖ້າໄດ້ຜົນຜະລິດຫຼາຍເຫຼືອຈາກການປະກອບສ່ວນໃຫ້ທາງໂຮງຮຽນໃນໂຄງການອາຫານທ່ຽງຈຳນວນ 30% ແລ້ວກໍຍັງສາມາດນຳໄປຈຳໜ່າຍເພື່ອຕໍ່ຍອດໄດ້ ເມື່ອມີທຶນຮອນແລ້ວແຜນການໃນອະນາຄົດກໍຈະນຳໄກ່ແມ່ພັນໄຂ່ມາລ້ຽງເພີ່ມຂຶ້ນເລື້ອຍໆເພື່ອຄໍ້າປະກັນສະບຽງອາຫານ ແລະ ກາຍເປັນສິນຄ້າຂອງຄອບຄົວ.
ຄໍາເຫັນ