 |
ຊຸດຝຶກອົບຮົມໃນຄັ້ງນີ້ ດຳເນີນເປັນເວລາ 5 ວັນ (29/6-3/72026) ໂດຍມີເປົ້າໝາຍເພື່ອຍົກລະດັບຂີດຄວາມສາມາດໃຫ້ແກ່ພະນັກງານກາແດງ ແລະ ພະນັກງານຂັ້ນເມືອງ ໃນການນຳໃຊ້ເຄື່ອງມື EVCA, ການພັດທະນາລະບົບ CEWS ແລະ ການຈັດແຜນກະກຽມຕອບໂຕ້ໄພພິບັດ ເພື່ອເສີມສ້າງຄວາມພ້ອມ ແລະ ຄວາມທົນທານໃຫ້ແກ່ຊຸມຊົນ. ຫຼັງສິ້ນສຸດການຮຽນທິດສະດີ, ຜູ້ເຂົ້າຮ່ວມຈະໄດ້ລົງຝຶກປະຕິບັດຕົວຈິງໃນພື້ນທີ່ 3 ບ້ານເປົ້າໝາຍ ຂອງເມືອງບຸນໃຕ້ ແຂວງຜົ້ງສາລີ ແລະ 4 ບ້ານເປົ້າໝາຍ ຂອງເມືອງຜາອຸດົມ ແຂວງບໍ່ແກ້ວ.
 |
ໃນໂອກາດນີ້, ທ່ານປະທານອົງການກາແດງແຫ່ງຊາດລາວ ໄດ້ເນັ້ນໜັກໃຫ້ບັນດາສຳມະນາກອນ ຈົ່ງຕັ້ງໃຈສຶກສາ, ແລກປ່ຽນບົດຮຽນ ແລະ ຝຶກປະຕິບັດຢ່າງຈິງຈັງ ເພື່ອນຳເອົາຄວາມຮູ້ດັ່ງກ່າວໄປຖ່າຍທອດ ແລະ ຂະຫຍາຍຜົນໃຫ້ແກ່ຊຸມຊົນໃນພື້ນທີ່ຂອງຕົນຢ່າງມີປະສິດທິຜົນສູງ.
 |
ໃນໂອກາດເຄື່ອນໄຫວວຽກງານດັ່ງກ່າວ, ທ່ານ ຄຳລາວັນ ຈັນທະລາວັນ ພ້ອມດ້ວຍຄະນະ ຍັງໄດ້ນຳເອົາເຄື່ອງບັນເທົາທຸກ ເປັນຕົ້ນ: ເຄື່ອງນຸ່ງຫົ່ມ, ເກີບ ແລະ ປາກະປ໋ອງ ຈຳນວນ 101 ຊຸດ ລວມມູນຄ່າທັງໝົດ 100 ລ້ານກວ່າກີບ ໄປມອບໃຫ້ແກ່ປະຊາຊົນທີ່ທຸກຍາກຂາດເຂີນ. ໃນນີ້, ໄດ້ມອບໃຫ້ປະຊາຊົນ 51 ຄອບຄົວ ຢູ່ບ້ານນ້ຳສະນາມຢາງປາ, ບ້ານປູລິເກົ່າ ແລະ ບ້ານສະໂນເກົ່າ ເມືອງບຸນໃຕ້ ແຂວງຜົ້ງສາລີ ແລະ ອີກ 50 ຄອບຄົວ ຢູ່ບ້ານວຽງຄຳ, ບ້ານດອນສະອາດ, ບ້ານໜອງບົວ, ບ້ານບົວ ສົ້ມ, ບ້ານວັງວັນ ແລະ ບ້ານປາກກໍ ເມືອງຫຼາ ແຂວງອຸດົມໄຊ ເພື່ອຊ່ວຍແບ່ງເບົາຄວາມທຸກຍາກໃນເບື້ອງຕົ້ນ.
(ຂ່າວ: ອົງການກາແດງ)
ຄໍາເຫັນ