 |
ທ່ານ ນາງ ພຸດດາວັນ ແກ່ນສານ ວິຊາການຂະແໜງສາມັນສຶກສາ ພະແນກສຶກສາທິການ ແລະ ກິລາແຂວງ ໄດ້ສະຫຼຸບການຈັດຕັ້ງປະຕິບັດກິດຈະກຳໄລຍະ 6 ເດືອນ (ເມສາ-ກັນຍາ 2026) ວ່າ: ໂຄງການນີ້ຈັດຕັ້ງປະຕິບັດໃນ 12 ບ້ານ (13 ໂຮງຮຽນ) ຢູ່ເມືອງສະໜາມໄຊ, ແຂວງອັດຕະປື, ມີງົບປະມານລວມທັງໝົດ 804,558 ໂດລາ (ໃນນັ້ນ ສຳລັບແຜນສົກຮຽນ 2025-2026 ແມ່ນ 119,612 ໂດລາ). ຜົນການຈັດຕັ້ງປະຕິບັດໄດ້ສຸມໃສ່ 3 ດ້ານຫຼັກ ຄື:1. ການສົ່ງເສີມການອ່ານ ແລະ ປັບປຸງຄຸນນະພາບການສຶກສາ: ໄດ້ສ້າງມຸມອ່ານ ແລະ ສະໜອງປຶ້ມອ່ານ, ປຶ້ມແບບຮຽນ ຈຳນວນ 290 ຫົວ, ອຸປະກອນການສອນ 39 ຊຸດ ໃຫ້ 13 ໂຮງຮຽນ; ມີການຝຶກອົບຮົມຄູ ແລະ ຜູ້ອຳນວຍການໂຮງຮຽນ ກ່ຽວກັບເຕັກນິກການຈັດກິດຈະກຳການອ່ານ ແລະ ການບໍລິຫານປຶ້ມ; 2. ການສຶກສາກ່ອນໄວຮຽນ: ໄດ້ປັບປຸງຫ້ອງກຽມປະຖົມ 6 ແຫ່ງ, ສະໜອງຊຸດອຸປະກອນເສີມທັກສະ 150 ຊຸດ ໃຫ້ເດັກ 150 ຄົນ, ແລະ ປະເມີນພັດທະນາການເດັກຫ້ອງກຽມປະຖົມ 132 ຄົນ (ຍິງ 69 ຄົນ) ໂດຍໃຊ້ເຄື່ອງມື IDELA ແລະ 3. ການມີສ່ວນຮ່ວມຂອງຊຸມຊົນ: ສ້າງຄວາມເຂັ້ມແຂງໃຫ້ຄະນະພັດທະນາການສຶກສາຂັ້ນບ້ານ, ຕັ້ງກຸ່ມອ່ານຊຸມຊົນ 11 ກຸ່ມ ມີອາສາສະໝັກ 22 ທ່ານ, ຈັດກິດຈະກຳອ່ານຮ່ວມອາທິດລະຄັ້ງ, ຈັດງານສະເຫຼີມສະຫຼອງການອ່ານ 5 ຊຸມຊົນ, ຝຶກອົບຮົມ ໃຫ້ ພໍ່ແມ່ 217 ຄົນ ກ່ຽວກັບການລ້ຽງລູກແບບສ້າງສັນ ແລະ ການສົ່ງເສີມການອ່ານໃນຄົວເຮືອນ. ການຈັດຕັ້ງປະຕິບັດ 3 ກິດຈະກຳຫຼັກ ສາມາດບັນລຸຕາມເປົ້າໝາຍ 100%.
ພ້ອມນີ້, ທ່ານນາງ ສົມສະນິດ ບົວໄລແສນ ຜູ້ປະສານງານໂຄງການ ປະຈຳເມືອງສະໜາມໄຊ ໄດ້ຜ່ານບົດສະຫຼຸບລາຍງານໃຫ້ຮູ້ວ່າ: ໂຄງການດັ່ງກ່າວຈັດຕັ້ງປະຕິບັດໂດຍ ອົງການສຸພານິມິດສາກົນ ປະຈຳ ສປປ ລາວ ຮ່ວມກັບ ກະຊວງສຶກສາທິການ ແລະ ກິລາ, ພະແນກສຶກສາທິການ ແລະ ກິລາ ແຂວງອັດຕະປື ແລະ ຫ້ອງການສຶກສາທິການ ແລະ ກິລາເມືອງສະໜາມໄຊ. ພື້ນທີ່ດຳເນີນໂຄງການ: 12 ບ້ານ, 13 ໂຮງຮຽນ ໃນເມືອງສະ
ໜາມໄຊ; ໄລຍະ: 5 ປີ, ຈາກ 1 ຕຸລາ 2022 ຫາ 30 ກັນຍາ 2026; ງົບປະມານລວມ: 804,558 ໂດລາ; ກິດຈະກຳໂຄງການ: 579,642 ໂດລາ (72%); ບໍລິຫານໂຄງການ: 224,916 ໂດລາ (28%); ຜູ້ໃຫ້ທຶນ: ອົງການສຸພານິມິດສາກົນ. ໂຄງການແນໃສ່ເດັກກ່ອນໄວຮຽນ ແລະ ເດັກປະຖົມ ປ1–ປ3 ໃຫ້ເຂົ້າເຖິງສື່ການຮຽນ-ການສອນ, ສົ່ງເສີມການອ່ານ, ເຮັດໃຫ້ພໍ່ແມ່ ແລະ ຊຸມຊົນເຫັນຄວາມສຳຄັນຂອງການສຶກສາ ແລະ ສົ່ງລູກຫຼານເຂົ້າຮຽນຕາມເກນອາຍຸ.
ໂຄງການໄດ້ສຸມໃສ່ 3 ດ້ານຫຼັກ ຄື:1. ປັບປຸງຄຸນນະພາບການສຶກສາ ປ1–ປ3: ຈັດພິມຄູ່ມືສົ່ງເສີມການອ່ານ, ຝຶກອົບຮົມຄູ ແລະ ຜູ້ອຳນວຍການ, ສະໜອງສື່/ປຶ້ມ/ມຸມອ່ານ, ປະເມີນທັກສະການອ່ານ, ກໍ່ສ້າງ ຫຼື ສ້ອມແປງລະບົບນ້ຳ ແລະ ສຸຂະອານາໄມ, 2. ສົ່ງເສີມການສຶກສາກ່ອນໄວຮຽນ: ພິມ ແລະ ຝຶກຄູຕາມຄູ່ມື, ສະໜອງສື່ການຮຽນ-ການສອນ, 3. ເສີມຄວາມເຂັ້ມແຂງໃຫ້ຄະນະພັດທະນາການສຶກສາຂັ້ນບ້ານ (ຄພສບ): ຝຶກສົ່ງເສີມການອ່ານ, ຈັດກິດຈະກຳອ່ານໃນຊຸມຊົນ, ສະໜອງປຶ້ມ/ອຸປະກອນ, ປູກຈິດສຳນຶກກ່ຽວກັບການປົກປ້ອງເດັກ ແລະ ໄວໜຸ່ມ, ຜູ້ໄດ້ຮັບຜົນປະໂຫຍດຕົ້ນຕໍ: 12 ບ້ານ, 1,863 ຄົວເຮືອນ, ປະຊາກອນທັງໝົດ 13,822 ຄົນ (ຍິງ 6,684 ຄົນ); ເດັກ 0–18 ປີ 5,177 ຄົນ (ຍິງ 2,544 ຄົນ); ນັກຮຽນຫ້ອງກຽມ–ປ5 1,458ຄົນ (ຍິງ 943ຄົນ); ຄູ ແລະ ຜູ້ອຳນວຍການ 54 ຄົນ (ຍິງ 27 ຄົນ); ອາສາສະໝັກກຸ່ມອ່ານຊຸມຊົນ (ລວມໄລຍະ 5 ປີ) 26 ຄົນ (ຍິງ 19 ຄົນ).
ຈາກຜົນສຳເລັດ ແລະ ຜົນງານດັ່ງກ່າວ, ຄະນະກຳມະການປົກຄອງແຂວງ ໄດ້ຕົກລົງຍ້ອງຍໍບຸກຄົນທີ່ມີຜົນງານດີເດັ່ນ 3 ທ່ານ; ສ່ວນໂຄງການໄດ້ຮັບການຍ້ອງຍໍຈາກພະແນກສຶກສາທິການ ແລະ ກິລາ ແຂວງ ໂດຍທ່ານ ກໍລະກັນ ສົມພັກດີ ຮອງຫົວໜ້າພະແນກສຶກສາທິການ ແລະ ກິລາແຂວງ ເປັນກຽດຂຶ້ນກ່າວມອບຢ່າງສົມກຽດ.ຂ່າວ:ໄຊຈະເລີນ-ພາບ:ພົມວິຫານ ໄຊຊະນະ
ຄໍາເຫັນ