ຮຽບຮຽງໂດຍ: ວິໄລພອນ ເພັດໄພບູນ
(ເນື່ອງໃນໂອກາດວັນຊາດໂອຕຣິດ 26 ຕຸລາ 1955 – 26 ຕຸລາ 2023)
ໂອຕຣິດ ເປັນອີກປະເທດໜື່ງທີ່ມີແຫຼ່ງທ່ອງທ່ຽວທີ່ ມີຄວາມງົດງາມຢູ່ໃນຕົວ ມີສະຖານທີ່ທ່ອງທ່ຽວໃຫ້ເລືອກໄດ້ຫຼາກຫຼາຍຮູບແບບ ທັງແບບທຳມະຊາດ ແລະ ສິ່ງກໍ່ສ້າງທີ່ຖືກອອກແບບມາດ້ວຍງານສິລະປະຫຼາກຫຼາຍສະໄໝທີ່ເຮັດໃຫ້ກາຍເປັນສະຖາປັດຕະຍະກຳທີ່ງົດງາມ ໂດຍສະເພາະປາສາດຕ່າງໆທີ່ມີຄວາມໂດດເດັ່ນ ແລະ ສວຍງາມເໝືອນກັບຮູບແຕ້ມ ແລະ ວັດທະນະທຳທີ່ຫຼາກຫຼາຍຕ່າງກໍດຶງດູດໃຫ້ນັກທ່ອງທ່ຽວເດີນທາງມາທີ່ໂອຕຣິດຕະຫຼອດເວລາ.
ໂອຕຣິດ ເປັນປະເທດທີ່ບໍ່ມີທາງອອກສູ່ທະເລໃນເອີຣົບກາງ ແລະ ມີຊາຍແດນທາງພາກເໜືອຕິດກັບເຢຍລະມັນ ແລະ ເຊັກ, ທາງພາກໃຕ້ຕິດກັບສະໂລເວນີ ແລະ ອີຕາລີ ສ່ວນທາງພາກຕາເວັນອອກຕິດກັບສະໂລວາກີ ແລະ ຮົງກາລີ , ທາງພາກຕາເວັນຕົກຕິດກັບສະວິດ ແລະ ເລັກເຕນສະແຕນ ໂດຍສະພາບພູມອາກາດຂອງໂອຕຣິດມີລັກສະນະເປັນພູ ແລະ ເນີນ ຊຶ່ງຫຼາຍຄົນເອີ້ນວ່າ ເປັນດິນແດນແຫ່ງພູຜາ ຊຶ່ງມີການໄຫຼຜ່ານຂອງແມ່ນ້ຳດານູບ ໂດຍຜ່ານລັດໂລເອີໂອຕຣິດ ແລະ ລັດອັບເປີໂອຕຣິດ ເພື່ອໄຫຼຕໍ່ໄປຍັງສາທາລະນະເຊັກ. ເນື້ອທີ່ດິນຂອງໂອຕຣິດມີ 3 ລັກສະນະຄື ພູຜາ, ທະເລສາບ ແລະ ແມ່ນ້ຳ. ດ້ວຍວັດທະນະທຳທີ່ໂດດເດັ່ນເຮັດໃຫ້ໂອຕຣິດມີສິ່ງດຶງດູດທີ່ໜ້າສົນໃຈຫຼາຍໄດ້ແກ່: ພະຣາຊະວັງເຊິນບຣຸນ (Schoenbrunn Palace) ຊຶ່ງເປັນສະຖານທີ່ທີ່ຮວບຮວມຜົນງານສິລະປະການຕົບແຕ່ງທີ່ດີ ພາຍໃນອຸທະຍານເຄີຍເປັນທີ່ຕັ້ງຂອງສວນສັດແຫ່ງທຳອິດຂອງໂລກ ແລະ ໄດ້ຮັບການແຕ່ງຕັ້ງໃຫ້ເປັນມໍລະດົກໂລກຈາກອົງການການສຶກສາ ວິທະຍາສາດ ແລະ ວັດທະນະທຳແຫ່ງສະຫະປະຊາຊາດ (UNESCO) ຖືວ່າເປັນສະຖານທີ່ທ່ອງທ່ຽວທີ່ມີຊື່ສ່ຽງທີ່ສຸດໃນນະຄອນຫຼວງວຽນນາ ເພາະພະຣາຊະວັງເປັນພະຣາຊະວັງລະດູຮ້ອນອັນຍິ່ງໃຫຍ່ຂອງຣາຊະວົງຮັບບວກ ສ້າງຂຶ້ນໂດຍພຣະປະສົງຂອງພຣະນາງ ມາເຣຍເທເຣຊ່າ ໃນທ້າຍສະຕະວັດທີ 17 ຊຶ່ງເປັນຈັກກະພັດດິນີ (Empress) ແຫ່ງຈັກກະພັດໂຣມັນ (Roman Empire) ທີ່ຕັ້ງໃຈວ່າ ຈະຕ້ອງສ້າງພຣະຣາຊະວັງແຫ່ງນີ້ໃຫ້ມີຄວາມງົດງາມ. ພະຣາຊະວັງເຊິນບຣຸນ ມີລັກສະນະເປັນຕຶກ 3 ຊັ້ນ ມີປີກ 2 ຂ້າງ ມີຄວາມງົດງາມສະອອນຕາ ຊຶ່ງທາງດ້ານນອກຂອງວັງທາດ້ວຍສີຄຳ ແລະ ດ້ານໃນມີຫ້ອງຫຼາຍເຖິງ 1.441 ຫ້ອງ ແຕ່ເປີດໃຫ້ນັກທ່ອງທ່ຽວເຂົ້າຊົມພຽງ 40 ຫ້ອງ ບໍ່ວ່າຈະເປັນ ຫ້ອງໜັງສື, ຫ້ອງນັ່ງຫຼີ້ນ, ຫ້ອງຈັດພິທີ, ຫ້ອງນອນ, ຫ້ອງກິນເຂົ້າ, ຫ້ອງຮູບຖ່າຍ ແລະ ອື່ນໆ ທຸກຫ້ອງລ້ວນແຕ່ຕົບແຕ່ງດ້ວຍວັດສະດຸທີ່ມີຄວາມປານີດ ຊຶ່ງມີທັງຫີນອ່ອນລາຍຄຳທີ່ເບິ່ງແລ້ວສວຍງາມອະລັງການຕາ ສ່ວນອ້ອມຮອບພຣະຣາຊະວັງທາງດ້ານຫຼັງປູກຕົ້ນໄມ້, ດອກໄມ້ຢ່າງສວຍງາມ ແລະ ສິ່ງດຶງດູດນັກທ່ອງທ່ຽວກໍຄືຮູບປັ້ນສິລະປະກ່ຽວກັບເທບນິຍາຍເກຣັກ ແລະ ໂຣມັນອີກຫຼາກຫຼາຍເຂົ້າມາແຊກແຊງຢູ່ຕາມຕົ້ນໄມ້ ເບິ່ງແລ້ວສ້າງຄວາມຮູ້ສຶກສະບາຍຕາ ຮູ້ສຶກຊຸ່ມເຢັນ.
ພະຣາຊະວັງຮຳບວກ ຫຼື ພະຣາຊະວັງລະດູໜາວ ຊື່ງພະຣາຊະວັງແຫ່ງນີ້ມີຫຼາຍຕຶກເພາະມີການຕໍ່ເຕີມ ແລະ ຂະຫຍາຍອອກໄປເລື້ອຍໆຈົນມີຂະໜາດໃຫຍ່ໃນປັດຈຸບັນກາຍເປັນພິພິທະພັນສະແດງສົມບັດອັນລ້ຳຄ່າຂອງຣາຊະວົງທີ່ເປີດສະແດງເຄື່ອງປະດັບຂອງຈັກກະພັດ ເຄື່ອງໃຊ້ແຕ່ງໂຕ ຊຶ່ງລວມທັງເສື້ອຜ້າ ເພັດພອຍ ແລະ ທອງຄຳອັນລ້ຳຄ່າທີ່ຫາເບິ່ງໄດ້ຍາກ. ນອກຈາກພະຣາຊະວັງຮຳບວກແລ້ວຍັງມີ ຈະຕຸຣັດສະເຕຟານ ຊຶ່ງເປັນທີ່ຕັ້ງຂອງມະຫາວິຫານເຊນສຕີເຟນຖືວ່າເປັນຈຸດສູນກາງຂອງນະຄອນຫຼວງວຽນນາ ຜູ້ຄົນຈຳນວນຫຼວງຫຼາຍມັກມາເດີນທ່ຽວທີ່ຈະຕຸຣັດແຫ່ງນີ້ ຊຶ່ງຖືເປັນສະຖານທີ່ສັກສິດ ແລະ ຖືວ່າເປັນສັນຍາລັກຂອງເມືອງວຽນອີກແຫ່ງໜຶ່ງ ແລະ ມະຫາວິຫານເຊນສຕີເຟນ ເປັນໂບສທີ່ສຳຄັນທີ່ສຸດຂອງໂອຕຣິດ ສ້າງຂຶ້ນເພື່ອອຸທິດແດ່ນັກບຸນສະເຕຟານເມື່ອປີ 1137 ໂດຍໂບດແຫ່ງນີ້ສ້າງຕາມສະຖາປັດຕະຍະກຳເອີຣົບ ພາຍໃນໂບດມີຂະໜາດໃຫຍ່ ສູງ ມີຍອດປາຍແຫຼມໆຫຼາຍຍອດ ຊຶ່ງສ່ວນທີ່ໂດດເດັ່ນທີ່ສຸດຂອງໂບດຄື ຫໍຄອຍທີ່ມີຄວາມສວຍງາມອ່ອນຊ້ອຍ ຊຶ່ງໃຊ້ເວລາກໍ່ສ້າງຫຼາຍກວ່າ 75 ປີ ນັກທ່ອງທ່ຽວທີ່ຂຶ້ນມາຢືນເທິງຫໍຄອຍແຫ່ງນີ້ສາມາດຊົມທັດສະນິຍະພາບທີ່ເມືອງວຽນຢ່າງສວຍງາມໄດ້ໂດຍອ້ອມຮອບ.
ຖະໜົນຄານເນີ ເປັນຖະໜົນການຄ້າໃຈກາງເມືອງວຽນທີ່ເຊື່ອມຕໍ່ລະຫວ່າງຖະໜົນວົງແຫວນຣິງສຕຣາເຊ່ກັບຈະຕຸຣັດສະເຕຟານ ຊຶ່ງຖືວ່າເປັນຖະໜົນຂາຍເຄື່ອງ ສາຍສຳຄັນຂອງວຽນນາເພາະມີຫ້າງຊັບພະສິນຄ້າ ແລະ ຮ້ານຄ້າຕ່າງໆຢ່າງຫຼວງຫຼາຍຕະຫຼອດສອງຂ້າງທາງ ມີສິນຄ້າໃຫ້ເລືອກຊື້ຢ່າງຫຼວງຫຼາຍທັງເສື້ອຜ້າທີ່ມີຍີ່ຫໍ້ດັງ, ເຄື່ອງແກ້ວຄຣິສຕັລເຈຍຣະໄນ ແລະ ຂອງທີ່ລະນຶກຕ່າງໆລວມທັງຮ້ານອາຫານ ຮ້ານກະແລ້ມ ແລະ ຮ້ານກາເຟແບບດັ້ງເດີມຂອງໂອຕຣິດໃຫ້ໄດ້ລອງຊິມອີກດ້ວຍ.
ສວນສາທາລະນະສະຕັດປາກເປັນສວນຂະໜາດໃຫຍ່ມີພື້ນທີ່ຫຼາຍກວ່າ 65.000 ຕາຕະລາງແມັດ ເປັນສວນສາທາລະນະປະຈຳເມືອງວຽນນາພາຍໃນສວນຮົ່ມເຢັນເຕັມໄປດ້ວຍຕົ້ນໄມ້ນ້ອຍໃຫຍ່ ແລ້ວຍັງມີຮູບປັ້ນນັກດົນຕີເອກຂອງໂລກທີ່ມີຊື່ສຽງ ຊຶ່ງອອກແບບຕາມຜູ້ຊ່ຽວຊານດ້ານສະຖາປັດຕະຍະກຳ ມີຜູ້ຄົນນິຍົມມາທ່ຽວພັກຜ່ອນ ແລະ ຍັງໃຊ້ເປັນສະຖານທີ່ອອກກຳລັງກາຍອີກດ້ວຍ. ນອກຈາກນີ້, ຍັງມີສວນສະນຸກພຣາເຕີ ທີ່ເປັນແຫຼ່ງທ່ອງທ່ຽວແບບສະໜຸກສະໜານມີເຄື່ອງຫຼິ້ນຢ່າງຫຼວງຫຼາຍ ໃຫ້ເລືອກຫຼິ້ນກັນຢ່າງສະໜຸກສະໜານເຊັ່ນ ມ້າໝຸນ ບ້ານຜີສິງ ໂຣນເລີໂຄສເຕີ ແລະ ອຶື່ນໆ. ນອກຈາກນີ້, ຍັງມີຊິງຊ້າສະຫວັນຂະໜາດໃຫຍ່ ເກົ່າແກ່ຖ້າຫາກຂຶ້ນໄປນັ່ງເທິງຊິງຊ້າສະຫວັນຈະໄດ້ຊົມທັດສະນີຍະພາບຂອງວຽນນາໄດ້ຢ່າງດີທີ່ສຸດ.
ຄໍາເຫັນ