ປະກາດແຕ່ງຕັ້ງຄະນະກຳມະການ ປກຊ​ - ປກສ ແຂວງຫຼວງພະບາງ

ທ່ານ ບຸນເລື່ອມ ມະນີວົງ ໄດ້ຕາງໜ້າໃຫ້ຄະນະພັກ, ຄະນະນໍາ ກໍຄືຕາງໜ້າໃຫ້ຄະນະກຳມະການ ປກຊ-ປກສ ແຂວງຫຼວງພະບາງ ລາຍງານກ່ຽວກັບການຈັດຕັ້ງປະຕິບັດວຽກງານ ປກຊ - ປກສ ແຂວງ ໄລຍະຜ່ານມາໂດຍສັງເຂບ ຍົກໃຫ້ເຫັນສະພາບລວມໃນການນໍາພາ-ຊີ້ນໍາ, ຜົນງານທີ່ພົ້ນເດັ່ນໄດ້ເພີ່ມທະວີບົດບາດການນໍາພາ-ຊີ້ນໍາຂອງຄະນະພັກ 2 ກຳລັງໃຫ້ໜັກແໜ້ນ, ແທດຕົວຈິງ ແລະ ເດັດຂາດ, ປັບປຸງແບບແຜນນຳພາ, ວິທີເຮັດວຽກ, ນຳພາ, ບັນຊາແທດຕົວຈິງ, ບໍ່ຫ່າງເຫີນກຳລັງ, ບໍ່ຫ່າງເຫີນປະຊາຊົນ; ກຳປະຊາຊົນ ແລະ ຕິດຕາມກຳແໜ້ນຂຶ້ນບັນຊີບັນດາເປົ້າໝາຍເຄື່ອນໄຫວລີ້ຊ່ອນ, ແຊກຊຶມຢູ່ຮາກຖານທີ່ຈະກໍ່ໃຫ້ເກີດຄວາມບໍ່ສະຫງົບ ເພື່ອປ້ອງກັນສະກັດກັ້ນແກ້ໄຂໃຫ້ທັນເວລາ; ໄດ້ປະສານສົມທົບກັບເພື່ອນຮ່ວມງານ ແລະ ໄດ້ຮ່ວມມືກັບກອງບັນຊາການ ປກຊ-ປກສ ຂອງ ສສ ຫວຽດນາມ ແລະ ສປ ຈີນ ໃນການຕິດຕາມ, ກວດກາການ ເຄື່ອນໄຫວຂອງຊາວຕ່າງປະເທດ ເຄື່ອນໄຫວລະເມີດລະບຽບກົດໝາຍທັງໝົດ 19 ກໍລະນີ 67 ລາຍ, ຜູ້ຖືກຫາ 404 ຄົນ ຍິງ 22 ຄົນ, ບັນຫາທີພົ້ນເດັ່ນແມ່ນລັກແຕ່ງດອງ ຢູ່ກິນກັບຍິງສາວລາວແບບຜົວເມຍໂດຍບໍ່ໄດ້ຈົດທະບຽນແຕ່ງດອງຢ່າງຖືກຕ້ອງ, ໄດ້ສະກັດກັ້ນແກ້ໄຂຈັບກຸ່ມ, ຍຶດຊັບກຸ່ມແກ້ງສະແກມເມີ ສໍ້ໂກງທາງລະບົບໂທລະຄົມ (ຕອບແຊັດ) ໄດ້ຈຳນວນ 87 ຄົນ ພ້ອມຂອງກາງຈຳນວນໜຶ່ງ; ບັນຫາອຸບັດເຫດເກີດຂຶ້ນ 274 ລາຍ, ໄດ້ສຸມໃສ່ຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຢ່າງແຂງແຮງ ສາມາດມ້າງກຸ່ມແກ້ງຄ້າຂາຍຢາເສບຕິດໄດ້ 85 ລາຍ, ກັກຕົວຜູ້ຖືກຫາ 117 ຄົນ ຍິງ 15 ຄົນ, ຕ່າງປະເທດມີ 8 ກໍລະນີ, ຜູ້ຖືກຫາ 8 ຄົນ; ໄດ້ດໍາເນີນຄະດີຕໍ່ຜູ້ກະທຳຜິດທາງອາຍາຈຳນວນ 255 ລາຍ, ຜູ້ຖືກຫາ 264 ຄົນ ຍິງ 14 ຄົນ; ພົ້ນເດັ່ນແມ່ນການລັກຊັບ, ການສໍ້ໂກງຊັບ (ທາງອອນລາຍຄໍເຊັນເຕີ), ຄ້າມະນຸດ ແລະ ບັນຫາອື່ນໆ. ຈາກນັ້ນ, ສະຫາຍ ພົນຈັດຕະວາ ຈິດຖະໜອມ ບຸນເລີດ ຮອງຫົວໜ້າຫ້ອງການຄະນະກຳມະການປ້ອງກັນຊາດ-ປ້ອງກັນຄວາມສະຫງົບຂັ້ນສູນກາງ, ໄດ້ຂຶ້ນຜ່ານມະຕິຕົກລົງຂອງຄະນະເລຂາທິການສູນກາງພັກ ວ່າດ້ວຍການແຕ່ງຕັ້ງປະທານ, ຮອງປະທານ, ຜູ້ປະຈຳການ ແລະ ກຳມະການຄະນະກຳມະການ ປກຊ-ປກສແຂວງຫຼວງພະບາງ ຊຶ່ງປະກອບມີ: ສະຫາຍ ບຸນເລື່ອມ ມະນີວົງ ເປັນປະທານ, ສະຫາຍ ບຸນເຫຼືອ ສິນໄຊວໍຣະວົງ ເປັນຮອງປະທານ, ສະຫາຍ ພົນຈັດຕະວາ ສີວິໄຊ ເພັງສັນຕິສຸກ ເປັນຮອງປະທານ ທັງເປັນຜູ້ປະຈຳການ, ສະຫາຍ ພົນຈັດຕະວາ ຕຸຊົງ ປັດໃຈ ເປັນຮອງປະທານ, ສະຫາຍ ຄຳຫຼ້າ ລຽນປະດິດ ເປັນກຳມະການ, ສະຫາຍ ຈິນດາວົງ ໂພສີຄຳ ເປັນກຳມະການ, ສະຫາຍ ຄິນຄໍາ ເລັ່ງສະຫວັດ ເປັນກຳມະການ, ສະຫາຍ ພັນເອກ ທອງລາ ໄຊຍະວົງສັກ ເປັນກຳມະການ, ສະຫາຍ ພັນໂທ ໄມທົນ ຈັນດາລາ ເປັນກຳມະການ.

ໂອກາດນີ້, ສະຫາຍ ພົນເອກ ວິໄລ ຫຼ້າຄຳຟອງ ໄດ້ມອບມະຕິຕົກລົງໃຫ້ຜູ້ທີ່ໄດ້ຮັບການແຕ່ງຕັ້ງ ພ້ອມທັງມີຄໍາເຫັນໂອ້ລົມ ຍົກໃຫ້ເຫັນຄວາມສຳຄັນຕໍ່ການແຕ່ງຕັ້ງຄະນະກຳມະການ ປກຊ-ປກສ ຊຶ່ງເປັນວຽກງານທີ່ພັກໄດ້ຍົກສູງໃຫ້ເປັນວຽກງານຍຸດທະສາດທີ່ສຳຄັນ ນັບແຕ່ສູນກາງລົງຮອດທ້ອງຖິ່ນ, ເປັນວຽກງານທີ່ຂັບເຄື່ອນໃຫ້ການພັດທະນາເສດຖະກິດ-ສັງຄົມຂອງທ້ອງຖິ່ນ ກໍຄືຂອງລັດຖະບານ ພ້ອມນັ້ນທ່ານໄດ້ເນັ້ນໃຫ້ຄະນະກຳ ມະການທີ່ໄດ້ຮັບການແຕ່ງຕັ້ງ ພ້ອມກັນເອົາໃຈໃສ່ຜັນຂະຫຍາຍບັນດາທິດທາງຄາດໝາຍທີ່ວາງໄວ້ໃຫ້ມີຜົນ ສຳເລັດ ຮັບປະກັນເຮັດໃຫ້ທົ່ວແຂວງມີຄວາມສະຫງົບ, ມີຄວາມເປັນລະບຽບຮຽບຮ້ອຍຢ່າງໜັກແໜ້ນ.

ຂ່າວ: ອາພຸດເດດ ບຸບຜາ; ພາບ: ທະນູສີນ ອິດທິພົນ