ຫ້ອງການຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ເມືອງປາກລາຍ ແຂວງໄຊຍະບູລີ ໄດ້ຈັດກອງປະຊຸມ ຜ່ານແຜນປັບປຸງພັດທະນາການທ່ອງທ່ຽວ ຕິດພັນກັບການປະກາດ 19 ກົມກອງ ເປັນກົມກອງວັດທະນະທຳ ຂຶ້ນໃນອາທິດຜ່ານມານີ້ ທີ່ສະໂມສອນຫ້ອງວ່າການເມືອງ ພາຍໃຕ້ການເປັນປະທານຂອງທ່ານ ກອງສີ ວົງສີ ເຈົ້າເມືອງປາກລາຍ, ມີບັນດາທ່ານຫົວໜ້າ - ຮອງຫົວໜ້າຫ້ອງການ, ພະນັກງານວິຊາການຫ້ອງການທີ່ກ່ຽວຂ້ອງ ຕະຫຼອດຮອດນັກທຸລະກິດຜູ້ປະກອບການດ້ານບໍລິການ-ການທ່ອງທ່ຽວທົ່ວເມືອງເຂົ້າຮ່ວມ.
ໃນກອງປະຊຸມ, ບັນດາຜູ້ເຂົ້າຮ່ວມແມ່ນໄດ້ພ້ອມກັນຮັບຟັງ ແລະ ປະກອບຄໍາຄິດຄໍາເຫັນ, ສົນທະນາ ໃສ່ຮ່າງແຜນພັດທະນາການທ່ອງທ່ຽວຂອງເມືອງປາກລາຍ ເພື່ອປັບປຸງໃຫ້ມີຄວາມເປັນເອກະພາບ, ມີຄວາມເໝາະສົມກັບສະພາບຄວາມເປັນຈິງໃນປັດຈຸບັນ ເພື່ອນຳສະເໜີຕໍ່ຂັ້ນເທິງ. ຈາກນັ້ນ, ທ່ານ ສົມພອນ ລາດມົນຕີ ຫົວໜ້າຫ້ອງການ ຖວທ ເມືອງ ໄດ້ຜ່ານບົດສະຫຼຸບການຈັດຕັ້ງປະຕິບັດຂະບວນການແຂ່ງຂັນສ້າງກົົມກອງວັດທະນະທຳຢູ່ເມືອງວ່າ: ພາຍຫຼັງໄດ້ຮັບຄຳສັ່ງແນະນຳຂອງພະແນກ ຖວທ ແຂວງ ສະບັບເລກທີ 859/ຖວທ ຊຍ, ລົງວັນທີ 24 ມິຖຸນາ 2016 ວ່າດ້ວຍການສ້າງຄົນ, ຄອບຄົວ, ບ້ານ, ກົມກອງ ແລະ ເມືອງວັດທະນະທຳ. ດັ່ງນັ້ນ, ຫ້ອງການ ຖວທ ເມືອງໄດ້ຂໍທິດຊີ້ນຳ ຈາກຄະນະປະຈຳພັກເມືອງ ເພື່ອຈັດຕັ້ງປະຕິບັດການສ້າງກົມກອງວັດທະນະທຳ ຕາມຂັ້ນຕອນ 5 ບາດກ້າວ. ເມືອງປາກລາຍ ຂອງພວກເຮົາມີກົມກອງທັງໝົດ 30 ກົມກອງ (ໃນນີ້ມີ 2 ລັດວິສາຫະກິດ) ຊຶ່ງເຄື່ອນໄຫວຢູ່ພາຍໃຕ້ການຊີ້ນຳ-ນໍາພາໂດຍກົງຂອງອົງຄະນະພັກເມືອງ; ມີລັດຖະກອນທັງໝົດ 1.612 ຄົນ ຍິງ 812 ຄົນ. ບັນດາຫ້ອງການທີ່ສາມາດປະຕິບັດໄດ້ຕາມມາດຖານເງື່ອນໄຂຂອງການສ້າງຄົນ ແລະ ກົມກອງວັດທະນະທຳ ມີ 19 ຫ້ອງການ, ຍັງຄ້າງ 9 ຫ້ອງການ ແລະ 2 ລັດວິສະຫະກິດ.
ຕອນທ້າຍກອງປະຊຸມ, ທ່ານ ກອງສີ ວົງສີ ໄດ້ເປັນກຽດມອບໃບຢັ້ງຢືນ ແລະ ເປີດປ້າຍກົມກອງວັດທະນະທຳຢ່າງເປັນທາງການ.
(ຂ່າວ-ພາບ: ທອງສະຫວັດ ໄຊຍະລາດ)
ຄໍາເຫັນ