ປະເມີນ ຖວທ ສາລະວັນ ສ້າງເປັນສຳນັກງານຕົວແບບດ້ານວັດທະນະທຳ

ໃນວັນທີ 24 ຕຸລາ ຜ່ານມາ ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງສາລະວັນ ໄດ້ຈັດກອງປະຊຸມປະເມີນພະແນກ ຖວທ ແຂວງສ້າງເປັນສຳນັກງານຕົວແບບດ້ານວັດທະນະທຳ ໂດຍການເປັນປະທານຂອງທ່ານ ຄຳໄພ ໄຊຍະເດດ ຮອງຫົວໜ້າພະແນກ ຖວທ ແຂວງ ຜູ້ຊີ້ນຳວຽກວັດທະ ນະທຳ, ມີຄະນະກຳມະການສ້າງຕົວແບບດ້ານວັດທະນະທຳຂັ້ນແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
    ທ່ານ ມະນີວອນ ທອງພັນທິລາດ ຫົວໜ້າຂະແໜງວັດທະນະທຳ ໄດ້ຜ່ານບົດສະຫຼຸບແຜນການກໍ່ສ້າງຂອງພະແນກ ຖວທ ແຂວງ ຊຶ່ງປັດຈຸບັນພະແນກ ຖວທ ແຂວງສາລະວັນມີພະນັກງານທັງໝັດ 65 ຄົນ ຍິງ 25 ຄົນ, ໃນ 1 ປີຜ່ານມາສາມາດຍາດໄດ້ຜົນງານພົ້ນເດັ່ນຫຼາຍດ້ານເປັນຕົ້ນ: ສາມາດສະໜອງລະບົບໂທລະໂຄ່ງຈໍານວນ 80 ຊຸດໃຫ້ບັນດາເມືອງນຳໄປຕິດຕັ້ງຕາມບ້ານເປົ້າໝາຍຂອງເມືອງ, ປັດຈຸບັນລະບົບໂທລະໂຄ່ງກວມເອົາ 520 ບ້ານເທົ່າ 89.96% ຂອງຈຳນວນບ້ານທັງໝົດທົ່ວແຂວງ, ສາມາດສ້າງບ້ານວັດທະນະທຳໄດ້ 14 ບ້ານ, ຄອບຄົວວັດທະນະທຳໄດ້ 890 ຄອບຄົວ, ທົ່ວແຂວງສາມາດສ້າງຄອບຄົວວັດທະນະທໍາໄດ້ 50.328 ຄອບຄົວເທົ່າ 63,61% ຂອງບ້ານວັດທະນະທຳໃນຈຳນວນ 340 ບ້ານເທົ່າ 58,82% ຂອງຈໍານວນບ້ານທັງໝົດ, ສໍານັກງານ ແລະ ຫ້ອງການຕົວແບບດ້ານວັດທະນະທຳມີທັງໝົດ 68 ສຳນັກງານ-ຫ້ອງການ, ໃນນີ້ຂັ້ນແຂວງມີ 11 ພະແນກການ, ອົງການທຽບເທົ່າ, ມີນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າມາທ່ຽວແຂວງສາລະວັນທັງໝົດ 83.130 ເທື່ອຄົນ ສາມາດສ້າງລາຍຮັບໄດ້ 5.655.066 ໂດລາ ທຽບໃສ່ແຜນປີປະຕິບັດໄດ້ 62,14%. ພ້ອມນັ້ນຄະນະກຳມະການສ້າງສຳນັກງານຕົວແບບດ້ານວັດທະນະທຳຂັ້ນແຂວງ ໄດ້ກວດກາປະເມີນສຳນັກງານພະແນກ ຖວທ ແຂວງ ເພື່ອກວດກາຄວາມເປັນລະບຽບຮຽບຮ້ອຍໃຫ້ຖືກຕ້ອງຕາມມາດຖານເງື່ອນໄຂ ຂອງການສ້າງຕົວແບບທາງດ້ານວັດທະນະທໍາຕື່ມອີກ. ຂ່າວ-ພາບ: ລັດຕະນາ ແສງສຸວັນ