ປະເມີນຜົນການຈັດຕັ້ງປະຕິບັດກົດໝາຍຂົງເຂດປ້ອງກັນຊາດ 2 ສະບັບ

ທ່ານ ພົນໂທ ທອງລອຍ ສີລິວົງ ຮອງລັດຖະມົນຕີກະຊວງປ້ອງກັນປະເທດ ໄດ້ຂຶ້ນລາຍງານ ກ່ຽວກັບການປະເມີນຜົນການຈັດຕັ້ງປະຕິບັດ ກົດໝາຍຂົງເຂດປ້ອງກັນຊາດຈຳນວນ 2 ສະບັບຄື: ກົດໝາຍວ່າດ້ວຍການປ້ອງກັນຊາດ, ກົດໝາຍວ່າດ້ວຍນາຍທະຫານກອງທັບປະຊາຊົນລາວ ຕໍ່ກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ໃນວັນທີ  6 ພະຈິກນີ້, ໂດຍການເປັນປະທານຂອງທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ.
ທ່ານ ພົນໂທ ທອງລອຍ ສີລິວົງ ລາຍງານວ່າ: ພາຍຫຼັງທີ່ກົດໝາຍວ່າດ້ວຍການປ້ອງກັນຊາດ ໄດ້ຖືກຮັບຮອງ ແລະ ປະກາດໃຊ້ ໃນປີ 2015 ກະຊວງປ້ອງກັນປະເທດ ກໍໄດ້ຈັດພິມປຶ້ມກົດໝາຍເພື່ອແຈກຢາຍໃຫ້ບັນດາກົມກອງ ແລະ ບຸກຄົນຈໍານວນໜຶ່ງ. ພ້ອມນັ້ນ, ກໍໄດ້ມີການເຄື່ອນໄຫວລົງໂຄສະນາເຜີຍແຜ່ກົດໝາຍໃຫ້ນາຍ ແລະ ພົນທະຫານ ຢູ່ບັນດາກົມກອງກໍາລັງຫຼວງ-ກໍາລັງທ້ອງຖິ່ນ ເພື່ອສ້າງຄວາມຮັບຮູ້ ແລະ ເຂົ້າໃຈຕໍ່ກົດໝາຍດັ່ງກ່າວໄດ້ 47 ກົມກອງ, ມີຈໍານວນພົນເຂົ້າຮ່ວມ 7.900 ກວ່າທ່ານ ຍິງ 1.147ທ່ານ. ໃນກົດໝາຍດັ່ງກ່າວ ມາດຕາທີ່ກໍານົດໃຫ້ຜັນຂະຫຍາຍອອກເປັນນິຕິກໍາໃຕ້ກົດໝາຍມີທັງໝົດ 6 ມາດຕາຄື: ມາດຕາ 14, 15, 30, 33, 36 ແລະ ມາດຕາ 61 ໄດ້ຜັນຂະຫຍາຍສໍາເລັດທັງ
ໝົດ ຊຶ່ງມີນິຕິກໍາໃຕ້ກົດໝາຍ 8 ສະບັບ. ກົດໝາຍວ່າດ້ວຍການປ້ອງກັນຊາດ ເປັນເຄື່ອງມືອັນສໍາຄັນໃນການຄຸ້ມຄອງ, ການເຄື່ອນໄຫວ, ຕິດຕາມ ກວດກາ ວຽກງານປ້ອງກັນຊາດ ເຮັດໃຫ້ວຽກງານດັ່ງກ່າວເປັນຄວາມຮັບຜິດຊອບຂອງທົ່ວປວງຊົນລາວ ແນໃສ່ຮັບປະກັນໃຫ້ປະເທດຊາດ ມີສະຖຽນລະພາບທາງດ້ານການເມືອງຢ່າງໜັກແໜ້ນ, ມີຄວາມໝັ້ນຄົງ ສາມາດເຊື່ອມໂຍງກັບພາກພື້ນ ແລະ ສາກົນ. ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ; ເປັນບ່ອນອີງພື້ນຖານໃຫ້ແກ່ການຊີ້ນໍາ-ບັນຊາ, ການປະຕິບັດໜ້າທີ່ຂອງກໍາລັງປ້ອງກັນຊາດ ເຮັດໃຫ້ວຽກງານປ້ອງກັນຊາດ ເປັນຄວາມຮັບຜິດຊອບຂອງທົ່ວປວງຊົນລາວ ແລະ ການເຄືຶ່ອນໄຫວເຮັດໜ້າທີ່ວຽກງານປ້ອງກັນຊາດທົ່ວປວງຊົນຮອບດ້ານ ໂດຍແມ່ນກໍາລັງປະກອບອາວຸດປະຊາຊົນເປັນຫຼັກແຫຼ່ງ. ພ້ອມດຽວກັນນີ້ ກົດໝາຍສະບັບດັ່ງກ່າວ ຍັງເປັນພື້ນຖານໃຫ້ແກ່ວຽກງານການສຶກສາອົບຮົມວຽກງານປ້ອງກັນຊາດໃຫ້ແກ່ແຕ່ລະເປົ້າໝາຍ ສະແດງອອກໃນໄລຍະຜ່ານມາ ໄດ້ຈັດຕັ້ງການຮຽນ-ການສອນວຽກງານປ້ອງກັນຊາດໃຫ້ແກ່ການນໍາພັກ-ລັດ ເປົ້າໝາຍ 1, 2, 3 ແລະ ນັກຮຽນນັກສຶກສາຢູ່ຕາມສະຖາບັນການສຶກສາທັງພາກລັດ ແລະ ເອກະຊົນຈໍານວນໜຶ່ງ. 
       ສໍາລັບກົດໝາຍວ່າດ້ວຍນາຍທະຫານກອງທັບປະຊາຊົນລາວ ສະບັບທໍາອິດ ຖືກຮັບຮອງເອົາໃນກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ V ສະບັບເລກທີ 07/ສພຊ, ລົງວັນທີ 22 ຕຸລາ 2004  ຊຶ່ງປະກອບມີ 7 ໝວດ, 33 ມາດຕາ. ຕໍ່ມາໄດ້ຮັບການປັບປຸງ 1 ຄັ້ງ ໃນປີ 2018 ແລະ ນໍາໃຊ້ຈົນເຖິງປັດຈຸບັນ. ກົດໝາຍວ່າດ້ວຍນາຍທະຫານກອງທັບປະຊາຊົນລາວ ໄດ້ເປັນບ່ອນອີງສໍາຄັນໃຫ້ແກ່ກະຊວງປ້ອງກັນປະເທດໃນການຄຸ້ມຄອງ ແລະ ກວດກາ ການເຄື່ອນໄຫວວຽກງານຂອງນາຍທະຫານໂດຍກົງຢ່າງຮອບດ້ານ ແລະ ໄດ້ເຮັດໃຫ້ນາຍທະຫານມີຄວາມໜັກແໜ້ນທາງດ້ານການເມືອງແນວຄິດ, ເຂັ້ມແຂງທາງດ້ານການຈັດຕັ້ງ, ມີລະບຽບວິໄນເຂັ້ມງວດ, ມີແບບແຜນທັນສະໄໝ, ເຮັດສໍາເລັດໜ້າທີ່ອັນມີກຽດ ເຮັດໃຫ້ກອງທັບປະຊາຊົນລາວມີຄວາມເຂັ້ມແຂງ ແລະ ເຕີບໃຫຍ່ຂະຫຍາຍຕົວເປັນກ້າວໆມາ. ໃນນັ້ນ, ໄດ້ມີການແບ່ງຂັ້ນຄຸ້ມຄອງ, ແບ່ງຄວາມຮັບຜິດຊອບ ແລະ ປະສານສົມທົບແໜ້ນແຟ້ນກົມກຽວ ລະຫວ່າງກໍາລັງຫຼວງ ແລະ ກໍາລັງທ້ອງຖິ່ນ; ໄດ້ກໍານົດການນໍາພາ, ບັນຊາ ແລະ ການກໍ່ສ້າງນາຍທະຫານ, ລະບົບຂັ້ນ, ຊັ້ນ, ການປະຕິບັດນະໂຍບາຍ, ມາດຕະການ, ອົງການຄຸ້ມຄອງ ແລະ ອົງການກວດກາ ນາຍທະຫານກອງທັບປະຊາຊົນລາວ.
    ທ່ານ ພົນໂທ ທອງລອຍ ສີລິວົງ ກ່າວຕື່ມວ່າ: ສຳລັບບົດຮຽນທີ່ຖອດຖອນໄດ້ມີດັັ່ງນີ້: 1)    ເພີ່ມທະວີບົດບາດການນໍາພາຂອງຄະນະພັກ-ຄະນະບັນຊາ ແຕ່ລະຂັ້ນໃນການຈັດຕັ້ງປະຕິບັດກົດໝາຍ; 2)ເອົາໃຈໃສ່ໂຄສະນາເຜີຍແຜ່ກົດໝາຍໃນຂົງເຂດວຽກງານປ້ອງກັນຊາດ ໃຫ້ພະນັກງານ-ນັກຮົບ, ພະນັກງານ-ລັດຖະກອນ, ນັກຮຽນ-ນັກສຶກສາ ຕະຫຼອດຮອດປະຊາຊົນບັນດາເຜົ່າ ໃຫ້ມີຄວາມຮັບຮູ້, ເຂົ້າໃຈຕໍ່ເນື້ອໃນກົດໝາຍ ແລະ ວຽກງານປ້ອງກັນຊາດ ເຮັດໃຫ້ວຽກງານດັ່ງກ່າວເປັນຄວາມຮັບຜິດຊອບຂອງທົ່ວປວງຊົນ; 3) ຍົກສູງການສຶກສາອົບຮົມວຽກງານປ້ອງກັນຊາດ ໃຫ້ສອດຄ່ອງແຕ່ລະເປົ້າໝາຍ ແລະ ຖືເອົາວຽກງານປ້ອງກັນຊາດທົ່ວປວງຊົນເປັນວຽກງານຍຸດທະສາດໜຶ່ງສອດຫ້ອຍເຂົ້າໃນທຸກຂົງເຂດວຽກງານ ແລະ ກໍານົດເປັນຫຼັກສູດການຮຽນ-ການສອນ ຢູ່ສະຖາບັນການສຶກສາຂັ້ນຕ່າງໆນັບແຕ່ຊັ້ນມັດທະຍົມຕອນປາຍຂຶ້ນໄປ; 4)ປະເມີນການຈັດຕັ້ງປະຕິບັດກົດໝາຍເປັນແຕ່ລະໄລຍະເພື່ອໃຫ້ເຫັນບັນຫາທີ່ບໍ່ສອດຄ່ອງ ແລະ ມີຄວາມຫຍຸ້ງຍາກໃນກາານຈັດຕັ້ງປະຕິບັດ; 5) ຕ້ອງເພີ່ມທະວີຄວາມສັກສິດໃນການຈັດຕັ້ງປະຕິບັດກົດໝາຍ. ພ້ອມນັ້ນ, ຍັງໄດ້ສະເໜີປັບປຸງກົດໝາຍວ່າດ້ວຍນາຍທະຫານກອງທັບປະຊາຊົນລາວຕາມແຜນການສ້າງ ແລະ ປັບປຸງກົດໝາຍ 5 ປີ (2021-2025) ຊຶ່ງຈະນໍາເຂົ້າຜ່ານຕໍ່ກອງປະຊຸມສະໄໝສາມັນ ເທື່ອທີ 9 ຂອງສະພາແຫ່ງຊາດຊຸດທີ IX (ຕົ້ນປີ 2025); ສະເໜີນໍາເອົາກົດໝາຍວ່າດ້ວຍການປ້ອງກັນຊາດເຂົ້າແຜນການສ້າງ ແລະ ປັບປຸງກົດໝາຍ 5 ປີ (2026-2030).
      (ຂ່າວ: ວັນເພັງ, ພາບ: ສຸກສະຫວັນ)