ປະທານຄະນະກຳມະການປົກຄອງແຂວງຄໍາມ່ວນ ລົງຕິດຕາມ ປະຕູປິດ-ເປີດນໍ້າ ຂົວປາກຊີມັງ

ການລົງຕິດຕາມໃນຄັ້ງນີ້ ສະທ້ອນໃຫ້ເຫັນເຖິງຄວາມຫ່ວງໃຍ ແລະ ການເອົາໃຈໃສ່ຢ່າງໃກ້ຊິດຂອງການນໍາແຂວງຕໍ່ສະພາບການນໍ້າ ທີ່ຍັງຄົງເປັນບັນຫາ ແລະ ອຸປະສັກໃນປັດຈຸບັນ ໂດຍສະເພາະບັນຫາປະຕູປິດ-ເປີດນໍ້າ ປາກຫ້ວຍຊີມັງ ທີ່ຍັງຕິດຂັດ ແລະ ບໍ່ສາມາດນໍາໃຊ້ງານໄດ້ ຊຶ່ງໄດ້ກາຍເປັນປັດໄຈສຳຄັນທີ່ສົ່ງຜົນຕໍ່ການລະບາຍນໍ້າ.ປະກອບກັບສະພາບຝົນທີ່ຕົກໜັກຕິດຕໍ່ກັນຫຼາຍວັນ ໄດ້ເຮັດໃຫ້ນໍ້າຝົນຈາກຫຼາຍພື້ນທີ່ໄຫຼລົງສູ່ຫ້ວຍຊີມັງ ແຕ່ບໍ່ສາມາດລະບາຍອອກສູ່ແມ່ນໍ້າຂອງໄດ້ຕາມປົກກະຕິ ສົ່ງຜົນໃຫ້ລະດັບນໍ້າເພີ່ມສູງຂຶ້ນຢ່າງໄວວາ ແລະ ມີທ່າອ່ຽງເພີ່ມຂຶ້ນຕໍ່ເນື່ອງ. ເຖິງແມ່ນວ່າປັດຈຸບັນ ຍັງບໍ່ມີລາຍງານວ່າພື້ນທີ່ການຜະລິດ ຫຼື ເຮືອນຊານຂອງປະຊາຊົນໄດ້ຮັບຜົນກະທົບຮ້າຍແຮງຈາກນໍ້າຖ້ວມໃນເຂດດັ່ງກ່າວ ແຕ່ຫາກສະພາບຝົນຍັງສືບຕໍ່ຕົກ ກໍມີຄວາມສ່ຽງສູງທີ່ອາດຈະເກີດສະພາບນໍ້າຖ້ວມເປັນວົງກວ້າງ ຫາກບໍ່ມີການແກ້ໄຂບັນຫາຢ່າງທັນການ ຊຶ່ງທ່ານປະທານຄະນະກຳມະການປົກຄອງແຂວງ ກໍໄດ້ຊີ້ນໍາໃຫ້ພະແນກໂຍທາທິການ ແລະ ຂົນສົ່ງແຂວງ ສົມທົບກັບບໍລິສັດຜູ້ຮັບເໝົາກໍ່ສ້າງ ເລັ່ງຊອກຫາວິທີການແກ້ໄຂໂດຍໄວ.

ໃນໂອກາດດຽວກັນນີ້ ທ່ານປະທານຄະນະກຳມະການປົກຄອງແຂວງຄໍາມ່ວນ ຍັງໄດ້ຕິດຕາມສະພາບນໍ້າບໍລິເວນເໜືອປະຕູນໍ້າ ພ້ອມທັງກວດກາຄວາມຄືບໜ້າຂອງໂຄງການກໍ່ສ້າງປ້ອງກັນຕາຝັ່ງເຈື່ອນເຂດແຄມແມ່ນໍ້າຂອງ ເພື່ອປະເມີນສະພາບພື້ນທີ່ ແລະ ຊອກຫາແນວທາງຮັບມືກັບສະຖານະການຢ່າງຮອບດ້ານ ເພື່ອຫຼຸດຜ່ອນຜົນກະທົບຕໍ່ຊີວິດ ແລະ ຊັບສິນຂອງປະຊາຊົນໃຫ້ໄດ້ຫຼາຍທີ່ສຸດ.

ຂ່າວ: ກອງຄໍາ