ປະທານປະເທດ ຕ້ອນຮັບ ຮອງປະທານຄະນະກຳມະການທະຫານສູນກາງພັກກອມມູນິດຈີນ

ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານການສູນກາງພັກ ປະທານປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ສະຫາຍ ພົນເອກ ເຫີ ເວີຍຕົງ ຄະນະກົມການເມືອງສູນກາງພັກຮອງປະທານຄະນະກຳມະການທະຫານສູນກາງ ແຫ່ງພັກກອມມູນິດຈີນ ພ້ອມດ້ວຍຄະນະ ໃນວັນທີ 5 ທັນວາຜ່ານມາທີ່ສຳນັກງານສູນກາງພັກ, ໃນໂອກາດເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ  5-8 ທັນວາ 2023.
        ໂອກາດດັ່ງກ່າວ, ສະຫາຍ ທອງລຸນ ສີສຸລິດ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ສະຫາຍ ພົນເອກ ເຫີ ເວີຍຕົງ ທີ່ໄດ້ນຳພາຄະນະເດີນທາງມາຢ້ຽມຢາມ ແລະ ເຮັດວຽກຮ່ວມກັບກະຊວງປ້ອງກັນປະເທດ ຂອງ ສປປ ລາວ ໃນຄັ້ງນີ້ ຊຶ່ງເປັນການປະກອບສ່ວນອັນສໍາຄັນ ເຂົ້າໃນການເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການເປັນຄູ່ຮ່ວມມືຍຸດທະສາດຮອບດ້ານ ໝັ້ນຄົງ ຍາວນານ ລະຫວ່າງ ລາວ-ຈີນ ຕາມທິດ 4 ດີ ກໍຄື ການເປັນຄູ່ຮ່ວມຊາຕາກຳ ລາວ-ຈີນ, ຈີນ-ລາວ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ໃຫ້ໄດ້ຮັບການເພີ່ມພູນຄູນສ້າງ ແລະ ເກີດດອກອອກຜົນຂຶ້ນໄປເລື້ອຍໆ. ທັງເປັນການຮັດແໜ້ນການພົວພັນຮ່ວມມື ວຽກງານດ້ານການທະຫານ ກໍຄື ລະຫວ່າງກະຊວງປ້ອງກັນປະເທດ ແລະ ທະຫານສູນກາງ ແຫ່ງພັກກອມມູນິດຈີນ ໃຫ້ໄດ້ຮັບການເສີມຂະຫຍາຍ ແລະ ພັດທະນາ ຂຶ້ນຢ່າງບໍ່ຢຸດຢັ້ງ, ທັງສືບຕໍ່ໃຫ້ການສະໜັບສະໜູນຊ່ວຍເຫຼືອ, ແລກປ່ຽນບົດຮຽນດ້ານການທະຫານ ຊຶ່ງກັນ ແລະ ກັນ ຕະຫຼອດໄປ.
ສະຫາຍ ພົນເອກ ເຫີ ເວີຍຕົງ ກໍໄດ້ສະແດງຄວາມຂອບໃຈຕໍ່ ສະຫາຍ ທອງລຸນ ສີສຸລິດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ, ພ້ອມທັງໄດ້ແຈ້ງໃຫ້ສະຫາຍເລຂາທິການໃຫຍ່ ປະທານປະເທດໄດ້ຮັບຊາບເຖິງຈຸດປະສົງຂອງການເດີນທາງມາຢ້ຽມຢາມ ສປປ ລາວ ໃນຄັ້ງນີ້.
ຂ່າວ-ພາບ: ທະນູທອງ