ເອັສເຕບານລາໂຊເຮີນານເດສ ກໍາມະການກົມການເມືອງສູນກາງພັກກອມມູນິດກູບາ ປະທານສະພາແຫ່ງຊາດອໍານາດປະຊາຊົນແຫ່ງ ສ ກູບາ ໃນວັນທີ 4 ພະຈິກນີ້ ທີ່ຫ້ອງວ່າການສູນການພັກ ນະຄອນຫຼວງວຽງຈັນ ເນື່ອງໂອກາດທີ່ຄະນະຜູ້ແທນ ແຫ່ງ ສ ກູບາ ມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມການສະເຫຼີມສະຫຼອງວັນຄົບຮອບ 50 ປີ ແຫ່ງການສ້າງສາຍພົວພັນການທູດຂອງສອງປະເທດ ໃນລະຫວ່າງວັນທີ 3-6 ພະຈິກ 2024.
ໂອກາດນີ້, ປະທານປະເທດ ແຫ່ງ ສປປ ລາວ ໄດ້ກ່າວຄວາມຍິນດີຕ້ອນຮັບ ແລະ ສະແດງຄວາມປິຕິຍິນດີທີ່ໄດ້ພົບສະຫາຍ ເອັສເຕບານລາໂຊເຮີນານເດສ ໃນຄັ້ງນີ້; ພ້ອມດຽວກັນກໍໄດ້ຕີລາຄາສູງຕໍ່ການຢ້ຽມຢາມ ສປປ ລາວ ຂອງສະຫາຍໃນຄັ້ງນີ້ເປັນການຢ້ຽມຢາມ ສປປ ລາວ ເທື່ອທໍາອິດໃນນາມທີ່ເປັນປະທານສະພາແຫ່ງຊາດອໍານາດປະຊາຊົນແຫ່ງ ສ ກູບາ ຊຶ່ງການຢ້ຽມຢາມຂອງສະຫາຍແມ່ນຢູ່ໃນບັນຍາກາດທີ່ ສປປ ລາວ ພວກຂ້າພະເຈົ້າທີ່ຫາກໍສໍາເລັດການເປັນເຈົ້າພາບຈັດກອງປະຊຸມສຸດຍອດອາຊຽນຄັ້ງທີ 44 - 45 ແລະ ກອງປະຊຸມສະມັດຊາໃຫຍ່ລະຫວ່າງຊາດອາຊຽນ ຄັ້ງທີ 45. ໃນທ້າຍເດືອນຕຸລາຜ່ານມາ ແລະ ຍັງເປັນການປະກອບສ່ວນອັນສໍາຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມມາແຕ່ດົນນານບົນພື້ນຖານອຸດົມການສັງຄົມນິຍົມລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ກູບາ ເວົ້າລວມ, ເວົ້າສະເພາະແມ່ນລະຫວ່າງສະພາແຫ່ງຊາດແຫ່ງ ສປປ ລາວ ແລະ ສະພາແຫ່ງຊາດອໍານາດປະຊາຊົນແຫ່ງ ສ ກູບາ ໃຫ້ແຕກດອກອອກຜົນຍິ່ງຂຶ້ນ, ພ້ອມດຽວກັນ, ປະທານປະເທດ ແຫ່ງ ສປປ ລາວ ກໍໄດ້ຝາກຄວາມຢື້ຢາມຖາມຂ່າວອັນອົບອຸ່ນ ແລະ ອວຍພອນໄຊອັນປະເສີດຜ່ານສະຫາຍໄປຍັງ ສະຫາຍ ຣາອູນກາດໂຕຣຣຸດ ເລຂາທິການທີ I ພັກກອມມູນິດກູບາ, ສະຫາຍ ມີເກັນດີເອັດສ-ກາແນນເບີມູເດດສ ປະທານປະເທດແຫ່ງ ສ ກູບາ.
ສະຫາຍ ເອັສເຕບານລາໂຊເຮີນານເດສ ກໍໄດ້ກ່າວສະແດງຄວາມຂອບໃຈຕໍ່ ສະຫາຍ ທອງລຸນ ສີສຸລິດ ພ້ອມທັງລາຍງານກ່ຽວກັບການມາຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມການສະເຫຼີມສະຫຼອງວັນຄົບຮອບ 50 ປີແຫ່ງການສ້າງສາຍພົວພັນການທູດລະຫວ່າງ ສປປ ລາວ ແລະ ສ ກູບາ ໃນຄັ້ງນີ້, ພ້ອມດຽວກັນ, ກໍໄດ້ລາຍງານຜົນຂອງການພົບປະສອງຝ່າຍ ກັບ ສະຫາຍ ໄຊສົມພອນ ພົມວິຫານ ປະທານສະພາແຫ່ງຊາດລາວ ທີ່ໄດ້ເປັນອີກຂີດໝາຍສຳຄັນຂອງການເສີມຂະຫຍາຍສາຍພົວພັນການຮ່ວມມືຂອງສອງປະເທດ ເວົ້າລວມ, ເວົ້າສະເພາະແມ່ນລະຫວ່າງສອງອົງການນິຕິບັນຍັດຂອງສອງປະເທດ.
ໃນຕອນທ້າຍ, ປະທານປະເທດ ແຫ່ງ ສປປ ລາວ ກໍໄດ້ສະແດງຄວາມເອກອ້າງທະນົງໃຈທີ່ເຫັນວ່າຜ່ານມາເຖິງວ່າສະພາບພາກພື້ນ, ສາກົນມີການຜົນແປຢ່າງໄວວາ, ສັບສົນ, ສະພາບພາຍໃນຂອງສອງປະເທດກໍມີຄວາມຫຍຸ້ງຍາກບໍ່ໜ້ອຍ, ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອອັນດີງາມມາແຕ່ດົນນານບົນພື້ນຖານອຸດົມການສັງຄົມນິຍົມຍັງສືບຕໍ່ໄດ້ຮັບການເສີມຂະຫຍາຍຢ່າງບໍ່ຢຸດຢັ້ງທັງກວ້າງ ແລະ ເລິກໃນທຸກໆຂົງເຂດວຽກງານ, ພ້ອມທັງ, ສະແດງຄວາມຊົມເຊີຍ ແລະ ຕີລາຄາສູງຕໍ່ຜົນການພົບປະລະຫວ່າງສະຫາຍກັບສະຫາຍປະທານສະພາແຫ່ງຊາດລາວ ຊຶ່ງໄດ້ພ້ອມກັນຕີລາຄາຄືນການພົວພັນຮ່ວມມືລະຫວ່າງສອງອົງການນິຕິບັນຍັດຂອງສອງປະເທດໃນໄລຍະຜ່ານມາ, ແລກປ່ຽນຄຳຄິດຄຳເຫັນກ່ຽວກັບສະພາບການພາກພື້ນ, ສາກົນ ແລະ ພ້ອມກັນປຶກສາຫາລືທິດທາງແຜນການຮ່ວມມືໃນຕໍ່ໜ້າ, ຕີລາຄາສູງທີ່ສອງອົງການນິຕິບັນຍັດໄດ້ຮ່ວມກັນຈັດຕັ້ງຜັນຂະຫຍາຍບົດບັນທຶກວ່າດ້ວຍການຮ່ວມມືຂອງສອງສະພາແຫ່ງຊາດລາວ ແລະ ກູບາ. ພ້ອມນີ້, ກໍໄດ້ກ່າວຄວາມເຊື່ອວ່າໃນຖານະເປັນອົງການນິຕິບັນຍັດທີ່ມີບົດບາດໃນການຕິດຕາມກວດກາ, ບັນດາສະຫາຍຈະສືບຕໍ່ຊຸກຍູ້ການຈັດຕັ້ງປະຕິບັດບັນດາສົນທິສັນຍາ, ສັນຍາ ແລະ ຂໍ້ຕົກລົງລະຫວ່າງສອງລັດຖະບານເພື່ອເຮັດໃຫ້ການຮ່ວມມືທາງດ້ານເສດຖະກິດ, ການຄ້າ, ສາທາລະນະສຸກ, ກະສິກໍາ, ການສຶກສາ-ກິລາ, ທະນາຄານ, ຕຸລາການ ແລະ ອື່ນໆຂອງສອງປະເທດໃຫ້ໄດ້ຮັບການພັດທະນາສົມຄູ່ກັບການພົວພັນຮ່ວມມືທາງດ້ານການເມືອງ, ພ້ອມນີ້ກໍສືບຕໍ່ໃຫ້ການສະໜັບສະໜູນ ແລະ ຮ່ວມມືຊຶ່ງກັນ ແລະ ກັນໃນການເຄື່ອນໄຫວໃນເວທີລັດຖະສະພາພາກພື້ນ ແລະ ສາກົນເປັນຕົ້ນແມ່ນ AIPA, IPU ແລະ ອື່ນໆ, ເພື່ອປະກອບສ່ວນເຂົ້າໃນການປົກປັກຮັກສາສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາແບບຍືນຍົງໃນພາກພື້ນ ແລະ ສາກົນ.
ສະຫາຍ ທອງລຸນ ສີສຸລິດ ຍັງໄດ້ອວຍພອນໃຫ້ແກ່ການຢ້ຽມຢາມຢ່າງເປັນທາງການ ແລະ ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງສາຍພົວພັນການທູດລາວ-ກູບາ ຄົບຮອບ 50 ປີຢູ່ ສປປ ລາວ ຂອງສະຫາຍພ້ອມດ້ວຍຄະນະຈົ່ງປະສົບຜົນສໍາເລັດຢ່າງຈົບງາມ ແລະ ຂໍອວຍພອນໃຫ້ການພົວພັນຮ່ວມມືລະຫວ່າງສອງປະເທດລາວ-ກູບາຂອງສອງປະເທດພວກເຮົາຈົ່ງແຕກດອກອອກຜົນ ແລະ ໝັ້ນຄົງຂະໜົງແກ່ນຕະຫຼອດກາລະນານ.
(ຂ່າວ-ພາບ: ສຸກສະຫວັນ)
ຄໍາເຫັນ