ໂດຍໃຫ້ກຽດຕ້ອນຮັບຂອງທ່ານ ດາວວົງ ພອນແກ້ວ ກໍາມະການສູນກາງພັກ ເລຂາພັກແຂວງເຈົ້າແຂວງສາລະວັນ ພ້ອມດ້ວຍຄະນະນຳເຂົ້າຮ່ວມ.
ໃນພິທີ, ທ່ານ ເຈົ້າແຂວງສາລະວັນ ໄດ້ລາຍງານການຈັດຕັ້ງປະຕິບັດວຽກງານຮອບດ້ານໂດຍສັງເຂບໃຫ້ຮູ້ວ່າ: ແຂວງສາລະວັນມີຄວາມສະຫງົບ-ຄວາມເປັນລະບຽບຮຽບຮ້ອຍດີ ໂດຍພື້ນຖານໄດ້ເອົາໃຈໃສ່ໃນການຕ້ານ, ສະກັດກັ້ນ ແລະ ແກ້ໄຂປະກົດການຫຍໍ້ທໍ້ຕ່າງໆທີ່ເກີດຂຶ້ນ, ເພີ່ມທະວີການຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບໃຫ້ກາຍເປັນຂອງທົ່ວປວງຊົນຢ່າງກວ້າງຂວາງ, ດ້ານເສດຖະກິດມີການຂະຫຍາຍຕົວຢ່າງຕໍ່ເນື່ອງ, ລວມຍອດມູນຄ່າຜະລິດຕະພັນພາຍໃນ (GDP) ປະຕິບັດໄດ້ 8,488 ຕື້ກີບ, ເທົ່າກັບ 99.39% ຂອງແຜນການ, ອັດຕາການຂະຫຍາຍຕົວຂອງເສດຖະກິດຢູ່ໃນລະດັບ 6.1%, ການຈັດເກັບລາຍຮັບເຂົ້າງົບປະມານປະຕິບັດໄດ້ 285.63 ຕື້ກີບ ເທົ່າກັບ 135.13% ຂອງແຜນດັດແກ້. ພ້ອມນັ້ນ ກໍໄດ້ຊຸກຍູ້ວຽກງານສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ອັນພົ້ນເດັ່ນໄດ້ສຸມໃສ່ຊຸກຍູ້. ສົ່ງເສີມ ແລະ ສ້າງຊື່ສຽງໃຫ້ແກ່ຜະລິດຕະພັນປີ້ງໄກ່ນາປົ່ງດ້ວຍການປັບປຸງຄຸນນະພາບເລັງໃສ່ການແປຮູບບັນຈຸໃສ່ຖົງ ແລະ ສາມາດສົ່ງຂາຍໄປຕ່າງແຂວງ ແລະ ຕ່າງປະເທດ, ທັງໄດ້ຊຸກຍູ້ກຸ່ມການຜະລິດ, ເຮັດທົດລອງໂຄງການຊາວນາຮັ່ງມີປັບປຸງນາໄຮ່ໃຫຍ່ຢູ່ເມືອງຄົງເຊໂດນ. ສໍາລັບການຈັດງານມະຫາກໍາກິລານັກຮຽນມັດທະຍົມສຶກສາທົ່ວປະເທດຄັ້ງທີ VII ແມ່ນມີຜົນສໍາເລັດຕາມຄາດໝາຍ, ເຊິ່ງສາມາດຍາດໄດ້ທັງໝົດ48 ຫຼຽນຄື: ຫຼຽນຄໍາ 12 ຫຼຽນ, ຫຼຽນເງິນ 20 ຫຼຽນ, ຫຼຽນທອງ 16 ຫຼຽນ ຈັດເປັນອັນດັບ 3 ໃນທົ່ວປະເທດ, ເອົາໃຈໃສ່ແກ້ໄຂບັນຫາການປະລະການຮຽນຂອງນັກຮຽນຊັ້ນປະຖົມ ແລະ ມັດທະຍົມ, ຍົກສູງຄຸນນະພາບການຮຽນ-ການສອນໃຫ້ມີຄຸນນະພາບສູງຂຶ້ນ. ໄດ້ເອົາໃຈໃສ່ປັບປຸງສະຖານທີ່ບໍລິການດ້ານສາທາລະນະສຸກ, ຍົກລະດັບຄວາມຮູ້ໃຫ້ແພດໝໍ, ໄດ້ຮັບຮອງ ແລະ ປະກາດລຳສາລະວັນ ເປັນມໍຣະດົກລະດົກແຫ່ງຊາດ ລະດັບທ້ອງຖິ່ນ ປະເພດນາມມະທຳ ແລະ ຄວາມຄືບໜ້າໃນການກະກຽມສະເຫຼີມສະຫຼອງ 3 ວັນປະຫວັດສາດ ແລະ ການກະກຽມດໍາເນີນກອງປະຊຸມໃຫຍ່ຂອງອົງຄະນະພັກເມືອງ, ປັດຈຸບັນ, ອົງຄະນະພັກເມືອງຕະໂອ້ຍ ໄດ້ສຳເລັດການດໍາເນີນກອງປະຊຸມໃຫຍ່ຂອງຕົນ.
ໃນໂອກາດນີ້, ທ່ານປະທານປະເທດ ກໍໄດ້ໃຫ້ກຽດໂອ້ລົມ ແລະ ເນັ້ນບາງບັນຫາທີ່ສຳຄັນຕໍ່ຄະນະພັກ, ຄະນະນຳຂອງແຂວງສາລະວັນ ເພີ່ມທະວີເອົາໃຈໃສ່, ກ່ອນອື່ນ ທ່ານໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງຕໍ່ຜົນສໍາເລັດທີ່ໄດ້ເອົາໃຈໃສ່ນໍາພາ-ຊີ້ນໍາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມພາຍໃນແຂວງກໍຄືເມືອງ, ສ້າງເງື່ອນໄຂໃຫ້ກັບປະຊາຊົນ ມີການພັດທະນາ, ມີຊີວິດການເປັນຢູ່ທີ່ດີຂຶ້ນ ໂດຍສະເພາະບັນດາພື້ນຖານໂຄງລ່າງ ໄດ້ອໍານວຍຄວາມສະດວກຫຼາຍດ້ານ. ພ້ອມດຽວກັນນັ້ນ, ທ່ານໄດ້ເນັ້ນໃຫ້ເອົາໃຈໃສ່ຊຸກຍູ້, ແກ້ໄຂສະພາບຄວາມຫຍຸ້ງຍາກດ້ານເສດຖະກິດໃນປັດຈຸບັນ ແລະ ຖືສຳຄັນຕໍ່ວຽກງານການສຶກສາອົບຮົມການເມືອງແນວຄິດໃຫ້ແກ່ຖັນແຖວພະນັກງານ, ປະຊາຊົນບັນດາເຜົ່າມີຄວາມເຂົ້າໃຈ ແລະ ເຊື່ອໝັ້ນຕໍ່ການນໍາພາຂອງພັກ ທີ່ມີຄວາມພະຍາຍາມ, ເອົາໃຈໃສ່ໃນທຸກໄລຍະ, ບັນດາຂະແໜງການທີ່ກ່ຽວຂ້ອງເອົາໃຈໃສ່ຊຸກຍູ້ສົ່ງເສີມປະຊາຊົນທໍາການຜະລິດ, ນຳເອົາບົດຮຽນ, ເຕັກນິກວິທີການປູກ-ການລ້ຽງ ໃຫ້ລົງເຖີງຊາວກະສິກອນໃຫ້ຫຼາຍຂຶ້ນ ແລະ ສ້າງຄວາມເຂັ້ມແຂງ ໂດຍຕ້ອງເປັນເຈົ້າການໃນການສ້າງເສດຖະກິດເອກະລາດເປັນເຈົ້າຕົນເອງ, ຊຸກຍູ້ສົ່ງເສີມລູກຫຼານ ໃນເກນອາຍຸໄດ້ເຂົ້າຮຽນ, ຄຽງຄູ່ກັບການສະກັດກັ້ນບັນຫາປະກົດການຫຍໍ້ທໍ້ຕ່າງໆ ແລະ ເອົາໃຈໃສ່ຄົ້ນຄວ້າຢ່າງເລີກເຊີ່ງ, ລະອຽດ, ຈະແຈ້ງ ແລະ ມີເປົ້າໝາຍ ໃນການກໍານົດການສ້າງຕາແສງ.
ຈາກນັ້ນ, ທ່ານປະທານປະເທດ ພ້ອມຄະນະ ກໍໄດ້ເດີນທາງໄປຢ້ຽມຢາມການຜະລິດນາໄຮ່ໃຫຍ່ບ້ານຫີນສິວເມືອງຄົງເຊໂດນ, ຕົວແບບຜະລິດກະສິກຳຢູ່ບ້ານຫຼັກ 94 ເມືອງລະຄອນເພັງ.
(ຂ່າວ-ພາບ: ວິໄລວອນ ສິດທິໄຊ)
ຄໍາເຫັນ