ປະທານສະພາເຈາະຈີ້ມຫຼາຍບັນຫາການຈັດຕັ້ງປະຕິບັດແຜນງົບປະມານແຫ່ງລັດ

ທ່ານໄຊສົມພອນ ພົມວິຫານ ມີຄໍາຖາມເຈາະຈີ້ມວ່າ: 1) ການຈັດຕັ້ງປະຕິບັດແຜນງົບປະມານແຫ່ງລັດ 5 ເດືອນ ແລະ ຄາດຄະເນ 6 ເດືອນຕົ້ນປີ 2025 ທີ່ລັດຖະບານ ໄດ້ລາຍງານໃນກອງປະຊຸມຄັ້ງນີ້ ໂດຍທຽບໃສ່ມະຕິກອງປະຊຸມສະພາແຫ່ງຊາດ ສະບັບເລກທີ 154/ສພຊ, ລົງວັນທີ 12 ທັນວາ 2024 ບັນດາທ່ານຜູ້ແທນເຫັນວ່າສອດຄ່ອງ ແລະ ຄົບຖ້ວນ ແລ້ວບໍ? ໂດຍສະເພາະຄາດໝາຍດ້ານລາຍຮັບ, ລາຍຈ່າຍ, ດຸ່ນດ່ຽງງົບປະມານ, ການຊຳລະໜີ້ສິນ, ບັນຫາເຄັ່ງຮ້ອນ ແລະ ບັນຫາອື່ນ.

2) ການກໍານົດແຜນລາຍຮັບງົບປະມານ ປີ 2025 ຈໍານວນ 68,100 ຕື້ກີບ ເທົ່າກັບ 18.16% ຂອງ GDP ທ່ານຜູ້ແທນເຫັນວ່າເໝາະສົມ ແລະ ສອດຄ່ອງກັບຖານລາຍຮັບ ແລະ ທ່າແຮງດ້ານລາຍຮັບ ແລ້ວ ຫຼື ບໍ່? ຫຼື ເຫັນຄວນເພີ່ມອັດຕາສ່ວນລາຍຮັບ ຕໍ່ GDP ຂຶ້ນຕື່ມ? ດ້ານລາຍຈ່າຍ ຄາດຄະເນ ຈະປະຕິບັດໄດ້ 36,379 ຕື້ກີບ ຫຼື ເທົ່າກັບ 50.63% ຂອງແຜນການປີທ່ານຜູ້ແທນເຫັນວ່າສອດຄ່ອງ ຕາມແຜນລາຍຈ່າຍບຸລິມະສິດ ຂອງລັດຖະບານ ແລະ ທ້ອງຖິ່ນຂອງບັນດາທ່ານ ແລ້ວ ຫຼື ບໍ? ໂດຍສະເພາະ ການຊຳລະໜີ້ສິນໂຄງການລົງທຶນຂອງລັດ, ໄພພິບັດ, ກອງທຶນທາງ ແລະ ໜີ້ສິນອື່ນໆ.

3) ການນໍາໃຊ້ເງິນເກີນແຜນ ປີ 2024 ຕາມມະຕິ ກອງປະຊຸມສະພາແຫ່ງຊາດ ສະບັບເລກທີ 133/ສພຊ, ລົງວັນທີ 18 ພະຈິກ 2024 ທີ່ອະນຸຍາດໃຫ້ແຂວງ ນໍາໃຊ້ 50%, ຊຶ່ງທ່ານນາຍົກລັດຖະມົນຕີ ໄດ້ອອກຂໍ້ຕົກລົງຈັດຕັ້ງປະຕິບັດ ສະບັບເລກທີ 31/ນຍ, ລົງວັນທີ 17 ມີນາ 2025, ຜ່ານການຈັດຕັ້ງປະຕິບັດບັນດາທ່ານຜູ້ແທນເຫັນວ່າ ນໍາໃຊ້ໄປຕາມມະຕິ ແລະ ຂໍ້ຕົກລົງດັ່ງກ່າວ ແລ້ວ ຫຼື ບໍ່? ໂດຍສະເພາະການຊຳລະໜີ້ສິນບໍລິຫານ (ໄຟຟ້າ, ນໍ້າປະປາ, ໂທລະຄົມມະນາຄົມ), ການສົ່ງເສີມການຜະລິດເປັນສິນຄ້າ, ໂຄງການລົງທຶນບຸລິມະສິດ ແລະ ອື່ນໆ.ພ້ອມນີ້, ທ່ານຜູ້ແທນເຫັນຄວນມີມາດຕະການ ຕໍ່ຫົວໜ່ວຍງົບປະມານທີ່ນໍາໃຊ້ເງິນເກີນແຜນບໍ່ຖືກເປົ້າໝາຍ ຄືແນວໃດ?.

4) ຕໍ່ກັບການແກ້ໄຂຜົນການກວດສອບ-ກວດກາ ເຫັນວ່າລັດຖະບານ ໄດ້ເອົາໃຈໃສ່ໃນການແກ້ ໄຂ ແລະ ມີຄວາມຄືບໜ້າ ຊຶ່ງສາມາດເກັບກູ້ລາຍຮັບເຂົ້າງົບປະມານ ແຕ່ເຫັນວ່າຍັງແກ້ໄຂໄດ້ໜ້ອຍ, ບໍ່ທັນຂາດຕົວ ແລະ ບາງບັນຫາກໍບໍ່ໄດ້ຮັບການແກ້ໄຂ, ທ່ານຜູ້ແທນເຫັນວ່າຄວນມີ ວິທີການ ແລະ ມາດຕະການແນວໃດ? ເພື່ອສາມາດແກ້ໄຂຜົນການກວດສອບ-ກວດກາ ໃຫ້ ຫຼາຍຂຶ້ນກ້າວໄປເຖິງການແກ້ໄຂຢ່າງຂາດຕົວ.

ທ່ານໄຊສົມພອນ ພົມວິຫານເຈາະຈີ້ມຕື່ມວ່າ:ຕໍ່ທິດທາງແຜນການ 6 ເດືອນທ້າຍ ປີ 2025

1) ມະຕິກອງປະຊຸມສະພາແຫ່ງຊາດ ໄດ້ກຳນົດແຜນລາຍຮັບງົບປະມານ ປີ 2025 ຈໍານວນ 68,100 ຕື້ກີບ ເທົ່າກັບ 18.16% GDP, ອີງຕາມການລາຍງານຂອງລັດຖະບານຄາດຄະເນໝົດປີ 2025 ຈະເກັບລາຍຮັບໄດ້ຕາມແຜນ ຫຼື ເກີນແຜນການ ທີ່ສະພາແຫ່ງຊາດຮັບຮອງ, ບັນດາທ່ານຜູ້ແທນ ເຫັນວ່າການເກີນແຜນດັ່ງກ່າວ ແມ່ນສອດຄ່ອງຕາມຖານລາຍຮັບ ແລະ ທ່າແຮງດ້ານລາຍຮັບທັງໝົດແລ້ວບໍ່? ຫຼື ເຫັນວ່າການກໍານົດລາຍຮັບ ແມ່ນຕໍ່າກວ່າທ່າແຮງດ້ານລາຍຮັບທີ່ແທ້ຈິງ ຫຼື ແນວໃດ?.

2) ຕໍ່ທິດທາງແຜນວຽກຈຸດສຸມແຜນງົນປະມານແຫ່ງລັດ 6 ເດືອນທ້າຍ ປີ 2025 ໂດຍສະເພາະ ດ້ານ ລາຍຮັບ ເປັນຕົ້ນການຫັນເປັນທັນສະໄໝ, ການຜ່ອນຜັນພາສີ-ອາກອນ, ການເກັບ ລາຍຮັບທີ່ດິນ, ບັນທຶກການຂາຍສິນຄ້າ POS, ການອອກເລກປະຈໍາຕົວອາກອນ; ດ້ານລາຍ ຈ່າຍ, ແຫຼ່ງດຸ່ນດ່ຽງ, ບັນດາທ່ານຜູ້ແທນ ເຫັນວ່າ ຖືກຕ້ອງ, ສອດຄ່ອງ ແລະ ສາມາດຈັດຕັ້ງ ປະຕິບັດໄດ້ຄືແນວໃດ? ຈຸດສຸມທີ່ຄວນເອົາໃຈໃສ່ມີຄືແນວໃດ? ຫຼື ມີມາດຕະການເພີ່ມເຕີມ ຄືແນວໃດ?.

3) ເພື່ອຮັບປະກັນແຫຼ່ງດຸ່ນດ່ຽງງົບປະມານແຫ່ງລັດ ແລະ ການຊຳລະໜີ້ສິນພາຍໃນ ແລະ ຕ່າງປະເທດ ຕາມກຳນົດເວລາຊຳລະ, ລັດຖະບານ ໄດ້ມີແຜນການຊຳລະໄລຍະສັ້ນ, ກາງ ແລະ ໄລຍະຍາວ ຄືແນວໃດ? ແລະ ຈະຮັບປະກັນດ້ານແຫຼ່ງທຶນທີ່ແນ່ນອນ ແລະ ຍືນຍົງຄືແນວໃດ?.

4) ຕາມການລາຍງານຂອງລັດຖະບານ ເຫັນວ່າໄດ້ມີຄວາມພະຍາຍາມໃນການປະຕິຮູບລັດວິ ສາຫະກິດ ສໍາເລັດໄປແລ້ວ 10 ຫົວໜ່ວຍ ບັນດາຜູ້ແທນເຫັນວ່າ ການປະຕິຮູບລັດວິສາຫະກິດດັ່ງກ່າວ ມີປະສິດທິຜົນ ແລະ ສ້າງຜົນປະໂຫຍດໃຫ້ລັດຄືແນວໃດ?.ພ້ອມນັ້ນ, ການປະຕິ ຮູບ 4 ຫົວໜ່ວຍ ຍຸດທະສາດເຄັ່ງຮ້ອນຄື: ລັດວິສາຫະກິດໄຟຟ້າລາວ, ລັດວິສາຫະກິດນໍ້າມັນເຊື້ອໄຟລາວ, ລັດວິສາຫະກິດການບິນລາວ ແລະ ທະນາຄານນະໂຍບາຍ, ທ່ານຜູ້ແທນ ເຫັນວ່າຖືກຕ້ອງ, ສອດຄ່ອງກັບຄວາມເປັນຈິງ ແລ້ວ ຫຼື ບໍ່? ຈະສາມາດແກ້ໄຂບັນຫາຂອງລັດວິສາຫະກິດໄດ້ຢ່າງຂາດຕົວ ຫຼື ບໍ່?.

(ຂ່າວ: ວັນເພັງ)