ປະທານສະພາແຫ່ງຊາດ ມອບເຄື່ອງຊ່ວຍເຫຼືອບັນເທົາທຸກໃຫ້ຜູ້ປະສົບໄພພາຍຸໝາກເຫັບ ຢູ່ເມືອງສີໂຄດຕະບອງ

ຈຸດປະສົງການລົງພື້ນທີ່ດັ່ງກ່າວຄັ້ງນີ້ ເພື່ອມອບເຄື່ອງອຸປະໂພກ-ບໍລິໂພກ ແລະ ອຸປະກອນຈຳເປັນ ໃຫ້ແກ່ປະຊາຊົນຜູ້ທີ່ເຮືອນຊານ ແລະ ຊັບສິນໄດ້ຮັບຄວາມເສຍຫາຍ ເພື່ອຊ່ວຍຟື້ນຟູຊີວິດການເປັນຢູ່ໃຫ້ກັບຄືນສູ່ສະພາບປົກກະຕິໂດຍໄວ ເປັນການສະແດງເຖິງຄວາມຫ່ວງໄຍຢ່າງໃກ້ຊິດ ຂອງພັກ ແລະ ລັດຖະບານ ທີ່ບໍ່ເຄີຍປະລະປະຊາຊົນໃນຍາມທຸກຍາກ ພ້ອມທັງປຸກລະດົມຈິດໃຈໃຫ້ປະຊາຊົນມີຄວາມອຸ່ນອ່ຽນທຸ່ນທ່ຽງ ແລະ ມີສະຕິເຂັ້ມແຂງໃນການສ້າງສາຄອບຄົວຄືນໃໝ່ ທ່ານປະທານສະພາແຫ່ງຊາດ ໄດ້ຮັບຟັງການລາຍງານສະພາບຄວາມເສຍຫາຍຕົວຈິງ ເພື່ອຊີ້ນຳໃຫ້ອຳນາດການປົກຄອງທ້ອງຖິ່ນ ເລັ່ງສົມທົບກັບຂະແໜງການແຮງງານ ແລະ ສະຫວັດດີການສັງຄົມ ກຳລັງ ປກຊ-ປກສ ແລະ ພາກສ່ວນກ່ຽວຂ້ອງ ດຳເນີນການສ້ອມແປງເຮືອນຊານ ແລະ ຟື້ນຟູພື້ນຖານໂຄງລ່າງ ໃຫ້ທັນການ.

ໂອກາດນີ້ ທ່ານ ໄຊສົມພອນ ພົມວິຫານ ໄດ້ສະແດງຄວາມເຫັນໃຈ ແລະ ຢ້ຽມຢາມຖາມຂ່າວຄວາມທຸກສຸກຂອງປະຊາຊົນແຕ່ລະຄອບຄົວຢ່າງເປັນກັນເອງ ພ້ອມທັງຍ້ອງຍໍຊົມເຊີຍຄວາມສາມັກຄີຮັກ ແພງ ຂອງອຳນາດການປົກຄອງ ແລະ ປະຊາຊົນພາຍໃນບ້ານ ທີ່ໄດ້ຊ່ວຍເຫຼືອເບິ່ງແຍງກັນໃນຍາມເກີດເຫດສຸກເສີນ ແລະ ຕາງໜ້າອຳນາດການປົກຄອງທ້ອງຖິ່ນ ແລະ ປະຊາຊົນບ້ານໂພນສົມບູນ ໄດ້ສະແດງຄວາມຂອບອົກຂອບໃຈຢ່າງເລິກເຊິ່ງ ມາຍັງທ່ານປະທານສະພາແຫ່ງຊາດ ພ້ອມດ້ວຍຄະນະນຳທຸກຂັ້ນ ທີ່ໄດ້ໃຫ້ຄວາມເມດຕາ ແລະ ນຳເອົາຄວາມອົບອຸ່ນ ມາສະໜອງໃຫ້ເຖິງພື້ນທີ່ ຊຶ່ງເປັນກຳລັງໃຈອັນຍິ່ງໃຫຍ່ ໃຫ້ແກ່ປະຊາຊົນໃນການສູ້ຊົນຜ່ານຜ່າຄວາມຫຍຸ້ງຍາກຄັ້ງນີ້.

(ແຫຼ່ງຂ່າວ: ວຽງຈັນໃໝ່)