ປະທານສນຊ ຕ້ອນຮັບ ປະທານບໍລິສັດຊີຈີເອັນ ພາວເວີ

ທ່ານ ຢາງຊາງລີ້ ໄດ້ສະແດງຄວາມຂອບໃຈເປັນຢ່າງຍິ່ງຕໍ່ ທ່ານປະທານ ສນຊ ທີ່ໃຫ້ການຕ້ອນຮັບຢ່າງອົບອຸ່ນ ພ້ອມທັງໄດ້ລາຍງານຈຸດປະສົງການມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ໃຫ້ທ່ານ ສິນລະວົງ ຄຸດໄພທູນ ໄດ້ຮັບຊາບ. ນອກຈາກນັ້ນໄດ້ລາຍງານກ່ຽວກັບປະຫວັດຫຍໍ້ຄວາມເປັນມາໃນການເຄື່ອນໄຫວດຳເນີນທຸລະກິດ ແລະ ບັນດາກິດຈະກໍາ ທີ່ກຸ່ມບໍລິສັດໄດ້ລົງທຶນ ໃນຂົງເຂດວຽກງານຕ່າງໆຢູ່ ສປປ ລາວ ເປັນຕົ້ນແມ່ນ ບໍລິສັດ ຊີຈີເອັນ ພາວເວີ ກຣຸບ ໄດ້ດໍາເນີນວຽກງານກໍ່ສ້າງຖານເຊື່ອມຕໍ່ພະລັງງານສະອາດພາກເໜືອຂອງລາວ ແລະ ໄດ້ຮັບຜົນດີ, ປັດຈຸບັນບັນດາໂຄງການໄຟຟ້າພະລັງງານ ແສງຕາເວັນ 1,000 ເມກາວັດ ໄລຍະທີ 1 ໄດ້ເລີ່ມການກໍ່ສ້າງຢ່າງເປັນທາງການ ແລະ ຢູ່ໃນລະຫວ່າງໄລຍະການກໍ່ສ້າງໂຄງການ.

ໂອກາດນີ້, ທ່ານປະທານ ສນຊ ກໍໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ ທ່ານ ຢາງຊາງລີ້ ພ້ອມດ້ວຍຄະນະ ທີ່ໄດ້ມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ເພາະວ່າປະເທດລາວ ເປັນປະເທດທີ່ພວມພັດທະນາບໍລິສັດຈະປະກອບສ່ວນຊອກຫາເພື່ອນຮ່ວມງານມາລົງທຶນໃນຫຼາຍຂົງເຂດຢູ່ລາວກໍເປັນການປະກອບສ່ວນທີ່ສຳຄັນ ເຂົ້າໃນການສ້າງສາພັດທະນາ ໃຫ້ ສປປ ລາວ ນັບມື້ມີຄວາມຮຸ່ງເຮືອງສີວິໄລເປັນກ້າວໄປ. ພ້ອມກັນນັ້ນ, ທ່ານ ຍັງໄດ້ຍົກໃຫ້ເຫັນພາລະບົດບາດ, ສິດ ແລະ ໜ້າທີ່ຂອງອົງການແນວລາວສ້າງຊາດ ໂດຍຫຍໍ້ ໃຫ້ຄະນະໄດ້ຮັບຮູ້ຕື່ມອີກ.